Mukanda wa Luka 7:1-50
-
Fumu wa masuta wamonesa gutshigina guakoma (1-10)
-
Yesu wafuzumuna mona yala mumoshi wa mukhetu wa gafunda gu Nayina (11-17)
-
Yesu washimana Yone Mubatiji (18-30)
-
Yesu wafuisa gindongo gia athu abola milonga (31-35)
-
Yesu watotesela mukhetu mumoshi gubola guenji (36-50)
-
Gifezegeselo gia athu akhalele nu mukudi (41-43)
-
7 Hamanesele muene guwambela athu ndaga akhalele naye guawambela, wanginyine mu Kaphelenauma.
2 Fumu mumoshi wa masuta wakhalele nu muenya mudimo akhalele muzumba muavula. Uvi muenya mudimo muene wakhalele mukata muavula, wakhalele mutshigina gufua.
3 Tangua diavuile muene lukuma lua Yesu, watumile akulu a enya Yuda ha guya gumumona, ha gumuwambela ha guza musaga muenya mudimo wenji.
4 Ene ayile gudi Yesu, amububidile muavula egi: “Muthu owu udi watagana egi umukalegele ndaga eyi,
5 handaga muene wana zumba gifutshi gietu, muene nji watungile sinagoga yetu.”
6 Yesu wayile nawo. Hahetele muene hehi nu inzo, fumu wa masuta watumine mafuta enji ha gumuwambela egi: “Fumu, udisagesago, handaga ame ngushigo ngatagana hagula aye ungine monzo yami.
7 Gishina giene ngamonyi egi ngushigo ngatagana hagula nguze gudi aye. Uvi zuela mbimbi hagula muenya mudimo wami asagewe.
8 Handaga ame nji ngudi nu mafumu ngana tumagela. Gungima diami ngudi nu masuta ana gungutumagela. Gula ngawambela suta mungoshi egi, ‘Nda!’ wana guya. Gula ngawambela muko egi, ‘Iza!’ wana guza. Gula ngawambela muenya mudimo wami egi, ‘Tshita ndaga eyi!’ wana guyikalagala.”
9 Havile Yesu ndaga eji, wadihudile, wabalumugile, wawambelele athu avula anyi akhalele gumulandula egi: “Ngudi gumiwambela egi, ikhale mukatshi dia enya Isalele, khenji ngumona muthu udi nu gutshigina guakoma luholo elu.”
10 Tangua mafuta a fumu wa masuta avutugile gu inzo, asangele muenya mudimo wavui gale muabonga.
11 Tangua diazonda gungima, Yesu wayile gu dimbo diana tamegewa egi Nayina. Alandudi enji nu athu ako avula akhalele muya n’enji.
12 Hahetele muene hehi nu mufulo wa dimbo, watagenele nu athu muzoga; akhalele mubata muthu wa gufua, mona yala mumoshi ha mumoshi wa mukhetu wa gafunda. Athu ako avula akhalele muza nu mukhetu muene.
13 Tangua Fumu wamonele mukhetu muene, wamuvidile khenda jiavula. Wamuwambelele egi: “Bemba gudila.”
14 Wasuenele, wakuatele gitanda* giakhalele nu mvumbi, athu akhalele mubata mvumbi amaganele. Gungima wazuelele egi: “Mona yala, ngudi guguwambela egi zuga mu molu!”
15 Muvuala wakhalele wa gufua wazugile mu molu, wasendesele guzuela. Yesu wamuhanele gudi gin’enji.
16 Athu agasue avuile woma, asendesele gutumbuisa Nzambi egi: “Profete wakoma wazoga mukatshi dietu,” nu “Nzambi wavuila athu enji khenda.”
17 Lukuma luenji luamuanganele mu membo agasue a Yudea nu mu membo ako agasue a hehi.
18 Alandudi a Yone ayile mutela Yone lumene lua ndaga eji jiagasue.
19 Yone watamegele alandudi enji mbadi, waatumine gudi Fumu ha gumuhula egi: “Aye Muthu udi naye guza, nga ndo tudi naye gunengena muthu muko?”
20 Tangua diahetele ene gudi Yesu, amuwambelele gamba: “Yone Mubatiji watutuma ha guguhula egi: ‘Aye Muthu udi naye guza, nga ndo tudi naye gunengena muthu muko?’”
21 Mu tangua diene, Yesu wasagele athu avula akhalele nu ukhashi nu misongo yakola nu nyuma jiabola; wakanguile nji meso a ifofo yavula.
22 Hene, waawambelele egi: “Ndenu muwambele Yone ndaga eji muamona nu muadivuila. Ifofo idi mumona, ikata idi muwenda, enya hute adi musagewa, ifua matshui idi muvua, athu a gufua adi mufuzumuga, lukuma luabonga ludi mulongesewa gudi phutu.
23 Gusuanguluga gukhale gudi muthu gashigo mumona nga gima gimoshi gudi ame giajiya gumukhakhuisa.”
24 Havutugile alandudi a Yone, Yesu wasendesele guwambela athu mukunda nu Yone egi: “Itshi muayile mutala mu mavu a luselenga? Tende diakhalele munyigishiwa gudi funji ba?
25 Itshi muayile mutala? Muayile mutala muthu wasudigile milele yawaha ba? Athu ana sudiga milele yawaha nu adi nu umonyi ana khala mu jinzo jia mafumu.
26 Itshi muayile mutala giwa? Muayile mutala profete ba? Ngudi gumiwambela giamatshidia egi, muene udi nu ndando yavula gubalega profete.
27 Mukanda wa Nzambi udi muzuela mukunda nu muene egi: ‘Tala! Ngudi mutuma mutumiwi wami gutuama diaye,* muene mbawulondega njila gutuama diaye!’
28 Ngudi gumiwambela egi, mukatshi dia athu agasue avalewe gudi akhetu, gushigo nu mumoshi udi wakoma gubalega Yone. Uvi muthu wazonda mu Ufumu wa Nzambi udi wamubalega gukoma.”
29 (Tangua athu agasue nu afutshishi a gitadi avuile ndaga yene, azuelele egi Nzambi udi muthu wabonga, handaga ene abatijiwe gudi Yone.
30 Uvi afalese nu alongeshi a Mikhuala atunyile utuameji waahanele Nzambi,* handaga atunyile gubatijiwa gudi Yone.)
31 “Ngajiya gufuanesa athu a gindongo egi nu nanyi? Ene adi gifua akuatshi?
32 Ene adi gifua ana azonda adi hashi ha zando adi muwambela ana ako mu dijui diakola egi: ‘Tuamishigile jimbinga hagula mukine, uvi enue muakinyilego. Tuamiyimbidile ngimbo jia gikenene, uvi enue muadidilego.’
33 Luholo lumoshi nji, Yone Mubatiji wajile, gashigo mudia mapha nga munua vinyo, uvi enue mudi muzuela egi: ‘Muene udi nu demo.’
34 Mun’a muthu waza, udi mudia nu udi munua, uvi enue mudi muzuela egi: ‘Talenu! Muthu yowu wafudila gudia nu munui wa matombe. Futa dia afutshishi a gitadi nu enya gubola!’
35 Uvi, ndunge jiana monega mu midimo yajio yagasue.”*
36 Mufalese mumoshi wakhalele mutamega Yesu ha guza mudia gumbo dienji. Hene Yesu wanginyile monzo ya Mufalese muene, wakhalele gu mesa.
37 Mukhetu mumoshi wakhalele mujiyiwa mu dimbo egi muenya gubola, wavuile egi Yesu wakhalele mudia* gumbo dia Mufalese. Hene wajile nu mulondo wa alabasita wakhalele nu mananashi a vumba diabonga.
38 Wayile gungima dia Yesu, wafugamele gu ikanzo yenji, wasendesele gudila. Wasendesele gutebesa ikanzo ya Yesu nu masoji enji nu guyikukumuna nu sanga dia muto wenji. Wahanele ikanzo ya Yesu beze nu gisemo giagasue, wayimbile mananashi a vumba diabonga.
39 Tangua Mufalese munu watamegele Yesu gumbo dienji wamonele ndaga eyi, wasendesele gudizuelela mu mutshima egi: “Muthu yowu nga udi diago profete, nga wajiyi gale gula mukhetu owu udi gumukuata udi mukhetu wa luholo lutshi; udi muenya gubola.”
40 Uvi Yesu wamulezele egi: “Simona, ngudi nu ndaga imoshi ya guguwambela.” Muene wamuvutudile gamba: “Mulongeshi, nguwambele!”
41 “Athu mbadi akhalele nu mukudi wa muthu mumoshi wana somba athu makuta; muthu wa thomo wakhalele nu mukudi wa denye 500, uvi muko denye 50.
42 Ene akhalelego nga nu gima gimoshi gia gufuta mukudi wene. Hene, muthu waasombele makuta waatotesele mukudi wawo nu khenda jiagasue. Watangiza egi mukatshi dia athu awa mbadi, nanyi mbawuzumba muavula muthu munu waasombele makuta?”
43 Simona wamuvutudile gamba: “Ngatangiza egi idi muthu munu atotesele mukudi wakoma.” Yesu wamuwambelele egi: “Wazuela muabonga.”
44 Yesu wabalumugile gu khanda yakhalele mukhetu muene, wawambelele Simona egi: “Udi mumona mukhetu owu? Ame nganginyi monzo yaye; aye wanguhanelego meya mukunda nu ikanzo yami. Uvi mukhetu owu watebesa ikanzo yami nu masoji enji nu wayikukumuna nu sanga dienji.
45 Aye wanguhanelego beze, uvi sendese nganginyi monzo yaye, mukhetu owu khenji gabembago guhana ikanzo yami beze nu gisemo giagasue.
46 Aye wangumbilego maji mu muto, uvi mukhetu owu wangumba mananashi mu ikanzo yami.
47 Gishina giene ngudi guguwambela egi ikhale gubola guenji gudi guakoma* luholo lutshi, guatotesewa, handaga muene wanguzumba muavula. Uvi muthu adi mutotesela hazonda, wana guzumba nji hazonda.”
48 Gungima wawambelele mukhetu muene egi: “Gubola guaye guatotesewa.”
49 Athu anyi akhalele mudia nu Yesu gu mesa asendesele guzuela mukatshi diawo egi: “Muthu owu udi nanyi udi mutotesela athu nu gubola guawo?”
50 Uvi wawambelele mukhetu muene egi: “Gutshigina guaye guaguhuluisa; nda mu guhuima.”
Mbimbi goshi'a diyiji
^ Nga “gitanda ana gubatela mvumbi.”
^ Mu Greke: “gutuama dia phala yaye.”
^ Nga “longo diaahanele Nzambi.”
^ Nga “gudi an’enji agasue.”
^ Nga “gudia gu mesa.”
^ Nga “guavula.”
