Luta 1:1-22
1 Mu masugu anyi manzuji akhalele muhinyina,* nzala yanginyile mu gifutshi; muthu mumoshi wakatugile gu Beteleheme ya gu Yuda nu mukaji’enji nu an’enji mbadi a mala, wayile mukhala gifua ngenji gu Moaba.
2 Muthu muene jina dienji diakhalele Elimeleke,* mukaji’enji jina dienji Naomi,* an’enji a mala mbadi majina awo akhalele Malona* nu Kiliona.* Akhalele enya Efrata ya gu Beteleheme ya gu Yuda. Tangua ahetele gu Moaba, atungile guene.
3 Gungima, Elimeleke mulumi’a Naomi wafuile. Naomi wasalele nu an’enji mbadi a mala.
4 Gungima ana a mala ene azudile akhetu a gu Moaba mu ulo; mumoshi jina dienji Orpa, uvi muko Luta. Akhalele guene ivo hehi nu kumi.
5 Gungima Malona nu Kiliona afuile nji, Naomi wasalele ngenyi yala ndo ana ndo.
6 Naomi nu iwaji* yenji adilondele ha gukatuga gu Moaba, handaga wavuile egi Yehowa wakuatesele akombeledi enji, waahanele ima ya gudia.*
7 Naomi wakatugile nu iwaji yenji fundo diakhalele ene ha guvutuga mu mavu a Yuda. Tangua akhalele muvutuga gu Yuda,
8 wawambelele iwaji yenji egi: “Muthu nu muthu avutuge gumbo dia gin’enji. Yehowa amimonesele guzumba guavula, gifua luholo muamonesele guzumba guene gudi ame nu gudi an’ami a mala tangua akhalele nu monyo.
9 Yehowa amikuatese hagula muthu nu muthu ahete yala hagula mukhale mu ubambi.”* Gungima waahanele beze, adidile mangololo.
10 Uvi ene akhalele gumuwambela egi: “Ndo, esue mbatuya n’aye gudi akuaku’aye.”
11 Uvi Naomi waawambelele egi: “An’ami a akhetu, vutugenu. Mukunda natshi mudi mutshigina gungulandula? Ngudi luko nu luholo lua guvuala an’a mala ajiya gubua alumi’enu ba?
12 An’ami a akhetu, vutugenu. Ndenu handaga ngudi gale muthu wa gukola, ngushigo luko nu luholo lua guzudiwa mu ulo. Ngatshima ngajiya gudifelela ha guheta yala mangino nu ha guvuala ana a mala,
13 mbamuanengenena uu nu tangua mbaakula ba? Mbamutuna guzudiwa luko mu ulo mukunda nu ene ba? Ndo an’ami a akhetu, ngudi nu gikenene giavula mukunda nu enue, handaga Yehowa wanguhanyi ndola.”
14 Adidile luko mangololo, Orpa wahanele giwaji gienji beze, gungima wayile genji. Uvi Luta wasalele nu Naomi.
15 Naomi wamuwambelele egi: “Tala! Orpa* wavutuga gudi akuaku’enji nu gudi nzambi jienji. Vutuga n’enji.”
16 Uvi Luta wamuwambelele egi: “Ungushinjigago ha gugubemba, ungutunyisago nji ha guya nu aye handaga fundo mbawuya diene mbanguya; fundo mbawubanda diene mbangubanda. Athu aye mbaabua athu ami, Nzambi waye mbawubua Nzambi wami.
17 Fundo mbawufua, diene ame nji mbangufua, mbangufundjiwa nji guene. Yehowa anguhane ndola yakola gula ndaga iko yatukhaphumuna nu aye gutuama egi gufua gutukhaphumune.”
18 Tangua diamonele Naomi egi Luta wakhalele jigi-jigi egi khuta uya n’enji, wabembele gumutunyisa.
19 Alanduile guya uu nu tangua ahetele gu Beteleheme. Tangua ahetele guene, dimbo diagasue diabuile nyiga-nyiga, akhetu akhalele muhula egi: “Yowu Naomi ba?”
20 Uvi Naomi wakhalele guawambela egi: “Mungutamegago egi Naomi.* Ngutamegenu egi Mara* handaga Nzambi wa Ngolo Jiagasue wangumonesa malamba avula.
21 Ngakhalele nu ima yagasue tangua ngayile, uvi Yehowa wanguvutula mago a githuhu. Mukunda natshi mudi gungutamega egi Naomi, Yehowa wanguluisa, Nzambi wa Ngolo Jiagasue wangubatela malamba.”
22 Lulu lumene lua Naomi hakatugile muene gu Moaba hamoshi nu giwaji gienji Luta, muenya gu Moaba. Ahetele gu Beteleheme gu gisendeselo gia sungi ya gukatula mbuto jia orje.
Mbimbi goshi'a diyiji
^ Mu Hebelu: “musophesa.”
^ Yakotelesa egi: “Nzambi Wami udi Fumu.”
^ Yakotelesa egi: “Muthu Wana Gusuanguluisa.”
^ Yajiya gukhala egi jina edi diakatuga mu Hebelu, didi mukotelesa egi “gukhala waguleba; gukata.”
^ Yakotelesa egi: “Muthu Wahuila; Muthu Waheta gu Suga.”
^ Nga “ivuaji.”
^ Mu Hebelu: “mapha.”
^ Mu Hebelu: “fundo dia guhuluguga.”
^ Nga “mufuagaji waye; mbanda waye.”
^ Yakotelesa egi: “Muthu Wana Gusuanguluisa.”
^ Yakotelesa egi: “Gulula.”
