Luta 2:1-23
2 Mu fami ya mulumi’a Naomi, guakhalele nu yala mumoshi wakhalele nu umonyi wavula; yala muene jina dienji Boaze, wakhalele mu fami ya Elimeleke.
2 Lusugu lumoshi, Luta muenya gu Moaba wawambelele Naomi egi: “Ngabuba, ngubembe nguye mu mahia ha gunona mbuto jidi musala gu isusu mu dihia dia muthu wa mutshima wabonga.” Naomi wamuvutudile egi: “Nda mun’ami.”
3 Luta wayile, wasendesele gunona mbuto gungima dia athu akhalele mukatula mbuto mu dihia. Uvi gakhalelego mujiya egi dihia diene diakhalele dia Boaze, muenya fami ya Elimeleke.
4 Mu tangua diene, Boaze wakatugile gu Beteleheme, wajile. Wawambelele athu akhalele mukatula mbuto egi: “Yehowa akhale n’enu.” Ene amuvutudile egi: “Yehowa agukuatese.”
5 Boaze wahudile muvuala wa yala wakhalele mutuameza athu akhalele mukatula mbuto egi: “Mon’a mukhetu yowu udi mu fami ya nanyi?”
6 Muvuala muene wamuvutudile egi: “Muenya gu Moaba, Naomi waji n’enji.
7 Wanguhudi egi: ‘Ngabuba, ngajiya gunona mbuto jiasadi* mu dihia nu gubungisa isusu ya gubatula yabembi athu adi mukatula mbuto ba?’ Yowu mutshita mudimo, sendese haji muene mu gimenegena. Khuta luenyelu luaya muene muhuluguga hazonda mu gisasa.”
8 Boaze wawambelele Luta egi: “Mun’ami, tegelela. Uyigo munona mbuto mu dihia diko, uyigo nji fundo diko. Khala hehi nu enya mudimo ami a akhetu.
9 Tala muabonga fundo adi mukatula mbuto, nda nawo. Ngawambela enya mudimo ami a mala egi agusagesago.* Gula wavua luhungu,* nda unue meya adi mu mabungu anyi athayi enya mudimo ami a mala.”
10 Luta wafugamele phala mu mavu, gungima wawambelele Boaze egi: “Mukunda natshi wangumonesela mutshima wabonga ngegi? Ame ngudi gami ngenji, mukunda natshi udi gudisagesa mukunda nu ame?”
11 Boaze wamuvutudile egi: “Anguwambela ndaga jiagasue wakalegele mukunda nu giwaji* giaye tangua diafuile mulumi’aye. Wabembele sh’aye nu gin’aye nu gifutshi gienu ha guya gudi athu wakhalelego mujiya.
12 Yehowa agukuatese mukunda nu ndaga wakalagala. Yehowa Nzambi wa Isalele agukuatese luko muavula* handaga waza gudisuega mu mahambu enji.”
13 Luta wamuwambelele egi: “Fumu, mvudi yavula mukunda nu ukuateshi waye. Wanguhana diago gikhesa. Wanguwambela mbimbi jiabonga* ikhale ngushigo muenya mudimo waye.”
14 Mu tangua dia gudia, Boaze wawambelele Luta egi: “Suena gugu udie dipha. Bonda gitshinyi giaye gia dipha mu vinegre.” Hene Luta wakhalele hashi hehi nu athu akhalele mukatula mbuto. Gungima Boaze wamuhanele mbuto jia gukalanga. Luta wadile, wakutshile, jiko jiasalele.
15 Hazugile muene ha gunona mbuto, Boaze wawambelele enya mudimo enji egi: “Mubembenu anone nji mbuto jidi gu isusu yagubatula,* mumukalagalago gubola.
16 Tangua mudi mujitshiga mbuto mu itungu, munanelenu ndambo mumubembele gungima hagula anone. Mumutunyisago ha gukatula mbuto.”
17 Luta wanonele mbuto mu dihia uu nu mu ngueze. Tangua diasuwile* muene mbuto jiene, jiakhalele efa imoshi* ya orje.
18 Gungima Luta wazanguile mbuto jiene, wayile najio guembo, wajilezele giwaji gienji. Wazolele nji ima ya gudia inyi yasalele, wamuhanele nayo.
19 Giwaji gienji wamuhudile egi: “Gui wayi munona mbuto mangino? Gui watshitshi mudimo? Nzambi akuatese muthu wagumonesela mutshima wabonga.” Luta wawambelele giwaji gienji dihia dia muthu diayile mutshita muene mudimo. Wamuwambelele egi: “Mangino ngatshitshi mudimo mu dihia dia Boaze.”
20 Naomi wawambelele giwaji gienji egi: “Yehowa amukuatese, handaga udi Nzambi wana monesa guzumba gua giamatshidia gudi athu a monyo nu gudi athu a gufua.” Wazuelele luko egi: “Yala muene udi phangi’etu. Udi mukatshi dia athu adi naye gutusumba ha gutukatula mu malamba.”
21 Luta muenya gu Moaba wazuele egi: “Yala muene wanguwambela luko egi: ‘Khala hehi nu enya mudimo ami uu nu tangua mbaamanesela gukatula mbuto jiagasue mu dihia.’”
22 Naomi wawambelele Luta egi: “Mun’ami idi ndaga yabonga egi uye utshite mudimo nu enya mudimo a Boaze a akhetu ha fundo dia guya mumonesewa lamba mu dihia diko.”
23 Hene Luta wakhalele mukhala hehi nu enya mudimo a Boaze a akhetu. Wanonele mbuto mu dihia uu nu tangua diahuile sungi ya gukatula mbuto jia orje nu sungi ya gukatula mbuto jia ble. Wakhalele mukhala nu giwaji gienji.
Mbimbi goshi'a diyiji
^ Nga ndo, yajiya gukhala egi: “itungu.”
^ Mu Hebelu: “agukuatshigo.”
^ Nga “phuila.”
^ Nga ”givuaji.”
^ Mu Hebelu: “aguhane gishimbigo giatagana.”
^ Mu Hebelu: “mbimbi jiaye jiakuata mutshima wami.”
^ Nga ndo, yajiya gukhala egi: “itungu.”
^ Nga “tangua diasunguine.”
^ Balitre hehi nu 22. Tala App. B14.
