Luta 3:1-18
3 Lusugu lumoshi, Naomi wawambelele giwaji gienji Luta egi: “Mun’ami, ngudi naye gugukambela yala* wajiya gugubamba hagula ukhale nu gusuanguluga.
2 Boaze udi mukuaku’etu, muene fumu wa mavuala a akhetu anyi watshitshi nawo mudimo. Mangino mu ngueze, uza muya musuwa orje ha fundo dia gusuwila* mbuto.
3 Zua meya, dikunge ndambo ya maji a vumba diabonga, sudiga milele yaye yabalega gubonga,* nda ha fundo dia gusuwila mbuto. Nengena gula Boaze wamanesa gudia nu gunua, udimonese giwa gudi muene.
4 Gula waya mubanda, kamba gujiya fundo didi muene mubanda. Gungima nda, katula mulele watshuigi muene gu malu enji, banda hene. Muene mbawuguwambela ndaga udi naye gukalagala.”
5 Luta wamuvutudile egi: “Ngudi mukalagala ndaga jiagasue wanguwambela.”
6 Hene wabulumugile ha fundo dia gusuwila mbuto, wakalegele ndaga jiagasue jiamuwambelele giwaji gienji.
7 Mu tangua diene, Boaze wadile, wanuile, wakhalele nu gusuanguluga. Wayile mubanda hehi nu fundo abungishile mbuto. Gungima Luta wayile mage-mage, wakatudile mulele wakhalele mutshuiga malu a Boaze, wabandele.
8 Mukatshi dia phipha, Boaze wasendesele gundendema. Wabalumugile gu khanda iko, wamonele mukhetu mumoshi wagubanda gu malu enji.
9 Wamuhudile egi: “Aye nanyi?” Muene wamuvutudile egi: “Ame muenya mudimo waye Luta. Ngubambe* handaga aye udi naye gutusumba ha gutukatula mu malamba.”
10 Boaze wamuwambelele egi: “Mun’ami, Yehowa agukuatese. Wamonesa guzumba gua giamatshidia muavula gubalega mbala ya thomo, handaga watuna gulandula mavuala a mala, ikhale adi phutu nga enya umonyi.
11 Henyaha mun’ami uvuigo woma. Mbangugukalegela ndaga jiagasue wazuela, handaga athu agasue a mu dimbo* adi mujiya egi udi mukhetu wa makalegelo abonga diago.
12 Idi yadiago egi ame ngudi naye gumisumba ha gumikatula mu malamba. Uvi gudi nu phangi’a Elimeleke muko wangubalega ame wajiya gumisumba ha gumikatula mu malamba.
13 Banda gale haha mu phipha ya mangino. Mu gimenegena gula yala muene waza gugusumba ha gugukatula mu malamba, idi ndaga yabonga. Uvi gula gatshiginyilego gugusumba, ngudi gudiloga mu jina dia Yehowa Nzambi wa monyo egi ame hakhami mbangumisumba ha gumikatula mu malamba. Banda haha uu nu mu gimenegena.”
14 Hene Luta wabandele gu malu enji uu nu mu gimenegena. Gungima wazugile gutuama egi guma gutshie, hagula athu amumonyigo. Boaze wamuwambelele egi: “Tshita yagasue hagula athu ajiyigo egi mukhetu mumoshi waji ha fundo dia gusuwila mbuto.”
15 Boaze wazuelele luko egi: “Zangula mulele waye wa holu, usunune muabonga.” Luta wasunuine mulele wenji, Boaze wamumbidile izongelo samano* ya orje, wamuhagele nayo ha muto. Gungima Boaze wavutugile mu dimbo.
16 Luta wavutugile gudi giwaji gienji. Giwaji gienji wamuhudile egi: “Mun’ami ndaga jiabalega gikuatshi?” Luta wamuwambelele ndaga jiagasue jiamukalegele Boaze.
17 Wazuelele luko egi: “Wanguhanyi izongelo samano eyi ya orje. Wazuedi egi: ‘Uvutugago mago a githuhu gudi giwaji giaye.’”
18 Naomi wamuwambelele egi: “Mun’ami khala haha uu nu tangua uza mujiya luholo ndaga eyi mbayihua; handaga Boaze uza mutshita yagasue ha gumanesela mulonga owu mangino.”
Mbimbi goshi'a diyiji
^ Nga “inzo.”
^ Nga “gusunguna.”
^ Nga “sudiga milele yaye ya holu.”
^ Nga “ngutshuige mulele waye.”
^ Mu Hebelu: “mifulo yagasue ya athu ami.”
^ Yajiya gukhala egi: Izongelo samano ya seya, nga balitre hehi nu 44. Tala App. B14.
