Luta 4:1-22
4 Boaze wakandugile gu mufulo wa dimbo, wakhalele hashi. Mu tangua diene, phangi’a Elimeleke yago Boaze wawambelele Luta egi muene wakhalele naye guasumba ha guakatula mu malamba wakhalele mubalega. Boaze wamuwambelele egi: “Yala* iza, khala hashi.” Muthu muene wajile, wakhalele hashi.
2 Boaze wazudile manene a dimbo kumi, waawambelele egi: “Khalenu hashi.” Akhalele hashi.
3 Gungima Boaze wawambelele phangi’a Elimeleke egi: “Naomi munu wakatugile gu Moaba, udi naye gusumbisa mavu a phangi’etu Elimeleke.
4 Hene ngatangiza egi ngudi naye guguwambela mulonga wene: ‘Sumba mavu ene ha meso a athu agasue a mu dimbo nu ha meso a manene. Gula watshigina gusumba luko mavu ene, asumbe. Uvi gula watuna gaye nguwambele; ngudi naye guyijiya handaga aye muthu wa thomo udi nu ginemo gia gusumba mavu ene, uvi ame ngudi gungima.’” Muthu muene wazuelele egi: “Ayi, ngatshigina gusumba luko mavu ene.”
5 Gungima Boaze wamuwambelele luko egi: “Lusugu mbawusumba mavu ene gudi Naomi, udi naye nji guasumba gudi Luta muenya gu Moaba mukaji’a yala yonu wafuile, hagula mavu ene alandule gukhala a ana a muthu wafuile.”
6 Yala muene wamuvutudile egi: “Ngajiyilego guasumba luko, gula ndo ngajiya gubua phutu.* Aye hakhaye asumbe mu jina diami, uvi ame ngajiyilego guasumba luko.”
7 Mu tangua dikulu gu Isalele, gula muthu udi nu ginemo gia gusumba luko ima gudi muthu muko nga guyisombegesa, akhalele mutshita luholo elu: Muthu muene wakhalele mukatula saphata dienji dimoshi, adihanyi gudi muthu muko. Akhalele mutshita ngenyi ha gumonesa egi adivua nu amanesela mulonga wene.
8 Hene tangua yala muene wawambelele Boaze egi: “Sumba gaye mavu ene,” wakatudile saphata dienji dimoshi.
9 Gungima Boaze wawambelele manene a dimbo nu athu agasue akhalele hene egi: “Mangino enue hakhenu muadimonela luholo ngudi musumba gudi Naomi ima yagasue ya Elimeleke nu ima yagasue ya Kiliona nu Malona.
10 Ngudi muzula nji Luta muenya gu Moaba mu ulo, mukaji’a Malona hagula ima ya Malona wafuile ilandule gukhala ya an’enji, nu hagula jina dienji ditotshigo mukatshi dia aphangi’enji nu mukatshi dia athu a mu dimbo diawo. Mangino enue hakhenu muadimonela ndaga eji.”
11 Athu agasue akhalele ha mufulo wa dimbo nu manene, azuelele egi: “Ayi, tudi mathemua a ndaga eji. Yehowa akuatese mukhetu udi mungina monzo yaye hagula akhale gifua Rashele nu Lea anyi avualele giphuta giagasue gia Isalele. Ndaga jiaye jiagasue jikhale jiabonga mu dimbo dia Efrata, lukuma luaye lukhale luabonga* mu Beteleheme.
12 Ana anyi mbaaguhana Yehowa mu njila ya mukhetu yowu abue gifua fami ya Phelese munu Tamale wavualele nu Yuda.”
13 Hene Boaze wazudile Luta mu ulo, gungima wabungishile n’enji muila. Yehowa wakuatesele Luta ha gumita, wavualele mona wa yala.
14 Gungima akhetu a gu Beteleheme awambelele Naomi egi: “Yehowa atumbuishiwe handaga mangino wagukuatesa ha guheta muthu wa gugusumba ha gugukatula mu malamba. Athu agasue a gu Isalele atumbuise jina dienji!
15 Mona* yowu waguhana luko ngolo,* muene mbawugukuatesa tangua mbawubua muthu wa gukola; handaga giwaji* giaye wamuvuadi, wana guguzumba diago. Mona muene udi nu ndando yavula gubalega ana a mala sambadi.”
16 Naomi wazudile mona muene, wamuhagele ha thulo yenji, wabuile giledi gienji.*
17 Gungima akhetu akhalele mujinga nawo hehi ahanele mona muene jina. Azuelele egi: “Avualela Naomi mona wa yala,” amuhanele jina egi Obede. Obede wakhalele sh’a Yese, Yese wakhalele sh’a Davidi.
18 Eyi senga ya giphuta gia Phelese: Phelese wakhalele sh’a Heselona;
19 Heselona wakhalele sh’a Rama, Rama wakhalele sh’a Aminadaba;
20 Aminadaba wakhalele sh’a Nashona, Nashona wakhalele sh’a Salamona;
21 Salamona wakhalele sh’a Boaze, Boaze wakhalele sh’a Obede;
22 Obede wakhalele sh’a Yese, Yese wakhalele sh’a Davidi.
Mbimbi goshi'a diyiji
^ Jina dia muthu owu diasonegewego.
^ Mu Hebelu: “ngajiya gutotesa uhinganyi wa ima yami.”
^ Mu Hebelu: “gujiyisa jina.”
^ Yakotelesa egi: “Mujigulu wa Naomi.”
^ Nga “waguhana luko monyo.”
^ Nga ”givuaji.”
^ Nga “ndeji yenji.”
