Makalegelo a Apostolo 10:1-48
-
Vizio yamonele Koneliyo (1-8)
-
Vizio yamonele Phetelo yakhalele mumonesa shitu jiaphelegetesewe (9-16)
-
Phetelo waya gumbo dia Koneliyo (17-33)
-
Phetelo udi mulongesa lukuma luabonga gudi athu ashigo enya Yuda (34-43)
-
“Nzambi gashigo nu khadilo dia gukhaphumuna” (34, 35)
-
-
Enya ifutshi iko aheta nyuma ya Nzambi nu abatijiwa (44-48)
10 Guakhalele nu yala mumoshi mu dimbo dia Sezalea, jina dienji Koneliyo, wakhalele fumu wa masuta.*
2 Wakhalele mukombeledi wa Nzambi. Muene nu athu agasue a monzo yenji akhalele muvuila Nzambi woma, wakhalele nji mukhaphela phutu ima. Wakhalele mukombelela Nzambi tangua diagasue.
3 Mu tangua dia thathu gungima dia midi,* wamonele muanjelo wa Nzambi mu vizio, wajile gumuwambela egi: “Koneliyo!”
4 Koneliyo wamutalele nono nu woma wagasue, wamuhudile egi: “Fumu, mulonga utshi?” Muene wamuwambelele egi: “Nzambi wavua gukombelela guaye nu wamona ima* wana khaphela phutu, muene gashigo guyibuita mutshima.
5 Henyaha tuma athu aye gu dimbo dia Yopha atamege yala mumoshi, jina dienji Simona, wana tamegewa egi Phetelo.
6 Yala muene udi gumbo dia muthu mumoshi wana kulula ilema ya shitu, jina dienji Simona. Inzo yenji idi gu khulo ya kianga.”
7 Muanjelo wakhalele muta n’enji maga wayile. Mu tangua diene, Koneliyo watamegele enya mudimo enji mbadi nu suta mumoshi wakhalele muvila Nzambi woma, wa mukatshi dia enya mudimo enji.
8 Waawambelele ndaga jiagasue, gungima waatumine ha guya gu dimbo dia Yopha.
9 Mu lusugu lualanduile, hakhalele ene mu njila nu hahetele ene hehi nu dimbo, Phetelo wanginyine holu dia inzo* mu tangua dia midi* ha gukombelela.
10 Uvi wavile nzala yakola, wakhalele mutshigina gudia, hakhalele ene mulonda ima ya gudia, Phetelo wamonele vizio.
11 Wamonele dilu mukanguga, gima gimoshi* gifua mulele wa linene wakoma wakuatewa mu songi nguana udi mubulumuga ha mavu.
12 Mukatshi dienji muakhalele nu shitu jia maluholo agasue jia idiatelo nguana, nu ima yana guwenda vumo mu mavu nu tunjila tua gosa.
13 Gungima dijui diamuwambelele egi: “Phetelo, zuga. Ishiye udie!”
14 Uvi Phetelo wazuelele egi: “Ndo Fumu, handaga khenji ngadile galego gima gia usala.”
15 Dijui diamuwambelele luko mbala ya mbadi egi: “Bemba gutamega ima yaphelegetesa Nzambi egi idi ya usala.”
16 Ndaga eyi yakalegewe mbala ya thathu. Mu tangua diene ima* yamonele Phetelo yakatudiwe, ayile nayo mu dilu.
17 Phetelo wakhalele gudihula gula vizio yene yakhalele mukotelesa itshi. Uvi mu tangua diene, athu atumiwe gudi Koneliyo akhalele amonyi gale inzo ya Simona, akhalele a gumagana ha mufulo.
18 Atamegele nu ahudile gula Simona wana tamegewa egi Phetelo wakhalele guene.
19 Mu tangua diene, Phetelo wakhalele yowu genji mutangiza vizio inyi yamonele muene. Uvi nyuma yamuwambelele egi: “Tala! Gudi nu mala thathu adi gugukamba.
20 Zuga, bulumuga, nda nawo, utunyigo handaga ame ngaatumi.”
21 Phetelo watulugile, wayile gudi athu ene. Waawambelele egi: “Muthu mudi mukamba, ame yowu. Itshi muajila haha?”
22 Azuelele gamba: “Koneliyo, fumu wa masuta watutumi, udi muthu wabonga nu wana vuila Nzambi woma; athu a mu gifutshi giagasue gia enya Yuda ana zuela nji ndaga jiabonga mukunda nu muene. Muanjelo wa gijila wamuwambelele ha gugutamega gumbo dienji, hagula ategelele ndaga udi naye guzuela.”
23 Phetelo waanginyishile monzo, waahanele fundo dia gubanda.
Hatshiele gisugu, wayile nawo, aphangi ako a gu Yopha ayile nji n’enji.
24 Mu lusugu lualanduile ahetele mu dimbo dia Sezalea. Koneliyo wakhalele guanengena. Wakhalele wabungisa gale enya fami yenji nu mafut’enji akola.
25 Tangua dianginyile Phetelo, Koneliyo wayile gumutagana, Wabuile gu malu enji, wamufugamele.
26 Uvi Phetelo wamuzugishile, wamuwambelele egi: “Zuga mu molu; ame nji ngudi muthu.”
27 Hakhalele muene muzuela n’enji, wanginyile monzo, wasangele athu avula a gudibungisa.
28 Waawambelele egi: “Mudi mujiya muabonga egi idi gijila gudi muenya Yuda ha gudibungisa nga ha guya mutala muthu gashigo muenya Yuda. Uvi Nzambi wangumonesa egi ngushigo naye gutamega nga muthu mumoshi egi muenya usala.
29 Gishina giene, ngatunyilego ha guza tangua watumi athu ha gungutamega. Henyaha nguwambelenu gima muangutamegela.”
30 Koneliyo wamuwambelele egi: “Masugu nguana abalega gale, yakhalele mu kumbi edi, ngakhalele mukombelela monzo yami mu kumbi dia thathu gungima dia midi,* ngamonele yala mumoshi mumagana gutuama diami, milele yenji yakhalele muhenya.
31 Wanguwambelele egi: ‘Koneliyo, Nzambi wavua gukombelela guaye. Muene ganago gubuita mutshima mu ima ya khenda wana hana phutu.
32 Henyaha tuma athu gu dimbo dia Yopha aye atamege Simona, wana tamegewa egi Phetelo. Muene udi gumbo dia muthu mumoshi wana kulula ilema ya shitu, jina dienji Simona; inzo yenji idi gu khulo ya kianga.’
33 Ngatumi athu mu tangua diene ha guya gugukamba. Watshita muabonga luholo waza haha. Henyaha mukut’etu agasue tudi gutuama dia Nzambi hagula tuvue ndaga jiagasue jia guwambela Yehowa ha guzuela.”
34 Gungima Phetelo wazuelele egi: “Henyaha ngakotelesa diago egi Nzambi gashigo nu khadilo dia gukhaphumuna.
35 Uvi muene wana tshigina muthu wagasue wana gumuvila woma nu wana kalagala ndaga jiabonga, ikhale muthu muene udi muenya gifutshi gitshi.
36 Watumine mbimbi gudi enya Isalele ha gualongesa lukuma luabonga lua guhuima mu njila ya Yesu Klisto, Fumu wa athu agasue.
37 Enue mudi mujiya ndaga athu akhalele muzuelela sendese gu Galilea uu nu gu Yudea yagasue gungima dia gubatijiwa guakhalele mulongesa Yone:
38 mukunda nu Yesu wa gu Nazaleta, luholo Nzambi wamumbile maji mu nyuma nu wamuhanele ngolo, nu luholo luawendele muene gifutshi giagasue nu gukalagala ndaga jiabonga nu gusaga athu agasue akhalele musagesewa gudi Diabulu, handaga Nzambi wakhalele n’enji.
39 Esue tuamonele ndaga jiagasue jiakalegele muene mu gifutshi gia enya Yuda nu gu Yelusalema. Ene amukhokhele ha mutshi, amushiyile.
40 Uvi Nzambi wamufuzumuine mu lusugu lua thathu, wamumosele gudi athu,
41 gamonegelego gudi athu agasue, uvi gudi matemue anyi adiangele gutombewa gudi Nzambi, gudi esue tuadile nu tuanuile n’enji gungima dia gufuzumuga guenji mu gufua.
42 Watutumine luko ha gulongesa athu nu guamonesa haphelo egi Nzambi wamutombele ha gukhala nzuji wa athu a monyo nu a gufua.
43 Baprofete agasue adi muzuela mukunda nu muene egi muthu wagasue washa gutshigina gudi muene, gubola guenji mbagutotesewa mu jina dienji.”
44 Hakhalele Phetelo muzuelela ndaga eji, nyuma ya Nzambi yabulumugile holu dia athu agasue akhalele mutegelela mbimbi ya Nzambi.
45 Alandudi ambiwe gu mukanda,* anyi ajile nu Phetelo adihudile ha gumona egi nyuma ya Nzambi* yamuanganele nji gudi athu anyi akhalelego enya Yuda.
46 Handaga a avuile muzuela mu mazuelelo angane nu gutumbuisa gukoma gua Nzambi. Gungima Phetelo wazuelele egi:
47 “Luholo athu awa aheta nyuma ya Nzambi gifua esue, nanyi wajiya guatunyisa ha gubatijiwa mu meya?”
48 Phetelo wazuelele egi a abatize mu jina dia Yesu Klisto. Gungima amutogele ha gusala nawo masugu azonda.
Mbimbi goshi'a diyiji
^ Yakotelesa egi wakhalele mutuameza masuta 100 a enya Italiya.
^ Mu Greke: “mu tangua dia divua.”
^ Nga “ima ya khenda.”
^ Mu tangua dikulu, jinzo jiavula jiakhalele nu fundo dimoshi gosa. Athu akhalele mukalagala ndaga jiavula ha fundo diene.
^ Mu Greke: “mu tangua dia samano.”
^ Mu Greke: “gima gimoshi gifua kinda.”
^ Mu Greke: “kinda.”
^ Mu Greke: “mu kumbi dia divua.”
^ Nga “athu a gujinginyina.”
^ Nga “guhana gua nyuma ya Nzambi.”
