Makalegelo a Apostolo 11:1-30
11 Apostolo nu aphangi akhalele gu Yudea avuile egi enya ifutshi iko atshiginyile nji mbimbi ya Nzambi.
2 Tangua diakandugile Phetelo gu Yelusalema, athu anyi akhalele jigi-jigi gu mukhuala wa gumbiwa gu mukanda asendesele gumumanesa,
3 amuwambele egi: “Wayile gumbo dia athu anyi ambiwego gu mukanda, wadile nawo.”
4 Phetelo waakotelesele luholo ndaga jiagasue jiabalegele, wazuelele egi:
5 “Ngakhalele mukombelela mu dimbo dia Yopha, mu tangua diene ngamonele vizio, ngamonele gima gimoshi* gifua mulele wa linene wakoma wakuatewa gu songi nguana mukatuga mu dilu mubulumuga. Mulele wene wajile fundo ngakhalele.
6 Tangua ngawutalele mukatshi, ngamonele shitu jia idiatelo nguana jia ha mavu, nu shitu jia mu foto, nu ima yana wenda vumo mu mavu, nu tunjila tua gosa.
7 Ngavuile nji dijui gunguwambela egi: ‘Phetelo, zuga, ishiye udie!’
8 Uvi ngazuelele egi: ‘Ndo Fumu, handaga gima gia usala khenji gianginyile galego mukano diami nga hazonda.’
9 Dijui diakatugile mu dilu dianguwambelele luko mbala ya mbadi egi: ‘Bemba gutamega ima yaphelegetesa Nzambi egi ima ya usala.’
10 Ndaga eyi yakalegewe luko mbala ya thathu. Gungima, ima yagasue yakatudiwe, yayile mu dilu.
11 Mu tangua diene, athu thathu akhalele a gumagana ha mufulo wa inzo tuakhalele. Athu ene akatugile gu dimbo dia Sezalea, a atumile ha guza gungukamba.
12 Nyuma yanguwambelele egi nda nawo, utunyigo. Tuayile nji nu aphangi awa a mala 6, tuanginyile nawo monzo ya muthu muene.
13 “Watuwambelele luholo luamonele muene muanjelo wa gumagana monzo yenji nu luholo amuwambelele egi: ‘Tuma athu gu dimbo dia Yopha ha gutamega Simona, wana tamegewa egi Phetelo.
14 Mbawumiwambela ndaga mbajimikuatesa ha guhuluishiwa, aye nu athu agasue a monzo yaye.’
15 Tangua ngasendesele guzuela, nyuma ya Nzambi yabulumugile gudi ene gifua luholo yatubulumugidile nji esue gu gisendeselo.
16 Mu tangua diene, ngatangijile mbimbi yazuelele Fumu egi: ‘Yone wabatijile athu nu meya, uvi enue mbamubatijiwa nu nyuma ya Nzambi.’
17 Hene gula Nzambi waahanele nyuma yenji gifua luholo watuhanele esue tuashile gutshigina gudi Yesu Klisto, ame ngudi nanyi ha gukanga Nzambi njila ha gukalagala gutshigina guenji?”
18 Havile ene ndaga jiji, abembele gusha giphapha,* atumbuishile Nzambi, azuelele egi: “Gula idi ngenyi, na Nzambi wahana nji athu a ifutshi iko luendu lua gubalumuna mitshima hagula ahete monyo.”
19 Alandudi anyi alengele mukunda nu usageshi wazogele gungima dia gufua gua Etiene, amuanganele, ayile uu nu gu Fenisia nu gu Shiphele nu gu Antiokia, uvi akhalele mulongesa phamba enya Yuda.
20 Uvi athu ako a gu Shiphele nu gu Silene ayile gu Antiokia, asendesele gulongesa lukuma luabonga lua Fumu Yesu gudi athu akhalele muzuela Greke.
21 Yehowa wakhalele guakuatesa. Hene athu avula abalumuine mitshima yawo, abuile alandudi a Fumu.
22 Aphangi a mu hungu dia gu Yelusalema avile lumene luawo, hene atumine Barnabase gu Antiokia.
23 Tangua diahetele muene, wamonele luholo Nzambi wavidile alandudi khenda jiavula. Wasuangulugile, waakolesele mukut’awo agasue ha gutumagela Fumu nu mutshima wagasue.
24 Barnabase wakhalele muthu wabonga, wakhalele nu gutshigina guakola. Wakhalele ya guzala pha nu nyuma ya Nzambi, gishina giene, athu avula ashile gutshigina gudi Fumu.
25 Gungima, wayile gu Talese ha gukamba Saula.
26 Tangua amumonele, wayile n’enji gu Antiokia. Akhalele gudibungisa nu aphangi a mu hungu givo gia mudidi, alongesele athu avula, alandudi a gu Antiokia akhalele athu a thomo atamegewe egi Aklisto mu utuameji wa Nzambi.
27 Mu masugu ene baprofete akatugile gu Yelusalema, abulumugile gu Antiokia.
28 Mumoshi mukatshi diawo jina dienji Agabo, wazugile mu molu, wazuelele mu njila ya nyuma ya Nzambi egi nzala yakola mbayiza ha mavu agasue. Nzala yene yajile mu tangua dia Klode.
29 Alandudi adivile ha gutuma ima ha gukuatesa* aphangi’awo a gu Yudea. Muthu nu muthu watumine gifua muakhalele guvula gua ima yenji.
30 Atshitshile diago ngenyi, ahanele ima yene gudi Barnabase nu Saula ha guya nayo gudi akulu.
Mbimbi goshi'a diyiji
^ Mu Greke: “gima gimoshi gifua kinda.”
^ Mu Greke: “ahenele tedie.”
^ Nga “ha gutshita mudimo wa gukuatesa.”
