Makalegelo a Apostolo 12:1-25
12 Mu tangua diene, fumu Helode wasendesele gusagesa aphangi a mu hungu.
2 Washiyile Yakoba phangi’a Yone nu phogo ya khusa.
3 Hamonele muene egi ndaga yene yasuanguluishile enya Yuda, wakuatele nji Phetelo. (Yakhalele mu sungi ya Wano wa Mapha Ashigo nu Levire.)
4 Wamukuatele, wamumbile mu bologo. Wamuhanele gudi mahunji nguana a masuta ha gumubamba. Hunji diagasue diakhalele nu masuta nguana. Matangi’enji akhalele egi amuzole* gu meso a athu agasue gungima dia Wano wa Pake.
5 Phetelo wakhalele mu bologo, uvi aphangi mu hungu akhalele mukombelela Nzambi muavula mukunda nu muene.
6 Helode wakhalele mutshigina gumuzola ha meso a athu agasue, uvi mu phipha yene, Phetelo wakhalele wa gubanda hakatshi dia masuta mbadi, wagujitshiga malenge mbadi. Masuta ako akhalele ha mufulo wa bologo ha gubamba bologo.
7 Uvi muanjelo wa Yehowa wazogele hene, kiajiji gialemele mu bologo. Wanyigishile Phetelo mu phatshi, wamuzugishile, wamuwambelele egi: “Zuga muphushi!” Malenge akhalele agujitshiga mu mago enji abuile.
8 Muanjelo wamuwambelele egi: “Sudiga milele* nu saphata jiaye.” Wasudigile. Gungima wamuwambelele egi: “Sudiga mulele waye wa holu, ngulandule.”
9 Phetelo wazogele, wamulanduile. Uvi gakhalelego mujiya egi ndaga jiagasue jiakhalele mukalagala muanjelo jiakhalele jia giamatshidia. Wakhalele mumona gifua idi vizio.
10 Abalegele mubambi wa bologo wa thomo nu wa mbadi. Tangua ahetele ha mufulo wa guzogela mu bologo ha gungina mu dimbo, gijidigo gia utadi giadikangulugile. Hazogele ene, awendele ndambo mu bala-bala dimoshi, gungima muanjelo wamubembele.
11 Phetelo wakotelesele giwa ndaga yakhalele mubalega. Wazuelele egi: “Henyaha ngajiya giwa egi Yehowa watumi muanjelo wenji ha guza gunguhuluisa ha mago a Helode nu gu ndaga jiagasue enya Yuda akhadi gudifelela ha gumona.”
12 Hakotelesele muene ndaga eyi, wayile gumbo dia Madiya, gin’a Yone, wakhalele mutamegewa luko egi Mako. Athu avula adibungishile guene, akhalele mukombelela.
13 Tangua diakokuele muene ha mufulo, muenya mudimo mumoshi wa mukhetu, jina dienji Lode, wajile ha gumuzuluila.
14 Havuile muene dijui dia Phetelo, wasuangulugile muavula, gakangudilego luko mufulo, uvi wavutugile muphushi monzo ha guawambela egi Phetelo udi ha mufulo.
15 Ene amuwambelele egi: “Aye udi muenya malui.” Uvi muene wakhalele muzuela egi ndo idi muene. Hene asendesele guzuela egi: “Idi muanjelo wenji.”
16 Uvi mu tangua diene, Phetelo wakhalele ha mufulo, wakhalele mukokola. Tangua azuluile mufulo, amumonele, adihudile muavula.
17 Uvi muene waawambelele gu koko ha guhena tedie. Waawambelele nji luholo Yehowa wamuzolele mu bologo. Waalezele egi: “Wambelenu Yakoba nu aphangi ndaga jiji.” Gungima wazogele, wayile fundo diko.
18 Hatshiele gisugu, masuta abuile zaga-zaga. Akhalele gudihula gula Phetelo udi gui.
19 Helode wamukambele muavula, uvi gamumonelego. Wahudile abambi a bologo, wazuelele egi adi naye guhanewa ndola. Gungima wakatugile gu Yudea, wabulumugile gu Sezalea, wasalele guene masugu azonda.
20 Helode wavidile enya dimbo dia Tile nu Sidona khabu.* Enya membo ene adivile ha guza gumumona, hene abubidile Bulasto munu wakhalele mutshita mudimo gumbo dia fumu,* ha guakuatesa hagula avutule guhuima nu fumu Helode, handaga ifutshi yawo yakhalele muheta ima ya gudia mu gifutshi gia fumu Helode.
21 Mu lusugu adivile ene, Helode wasudigile milele ya ufumu, wakhalele ha nguasa ya gusophesa, wasendesele gutshita diskur.
22 Gungima, athu anyi akhalele hene asendesele guzuela mu dijui diakola egi: “Didi dijui dia nzambi, dishigo dijui dia muthu!”
23 Mu tangua diene, muanjelo wa Yehowa wabetele Helode, handaga gahanelego lutumbu gudi Nzambi. Tungongo* tuamudile, hene wafile.
24 Uvi mbimbi ya Yehowa yakhalele mumuangana, athu avula akhalele mubua alandudi.
25 Tangua Barnabase nu Saula amanesele mudimo wa gukuatesa aphangi gu Yelusalema, avutugile, ayile nu Yone wakhalele mutamegewa nji egi Mako.
Mbimbi goshi'a diyiji
^ Nga “gumusophesa.”
^ Nga “dikange mulele ha kete.”
^ Nga “wakhalele mutshigina guluisa.”
^ Mu Greke: “fumu wana tala sugu ya gubanda.”
^ Nga “misanda.”
