Makalegelo a Apostolo 13:1-52
13 Gu Antiokia guakhalele nu baprofete nu alongeshi mu hungu gifua Barnabase nu Simeone wakhalele mutamegewa egi Muthu Wabuita,* nu Lusiuse wa gu Silene, nu Saula, nu Manaene wanginyile khalasa dimoshi nu guvelenele Helode.
2 Akhalele mukalegela Yehowa mudimo* nu akhalele mutuna gudia mukunda nu gukombelela. Nyuma ya Nzambi yazuelele egi: “Nguhagelenu Barnabase nu Saula mukunda nu mudimo ngaatamegele.”
3 Hene, atunyile luko gudia mukunda nu gukombelela. Akalegele gisambu, gungima a ahagele mago, a abembele ha guya.
4 Nyuma ya Nzambi yatumine athu awa mbadi, abulumugile gu Seleukia. Tangua ahetele guene, anginyile mu wato, ayile gu Shiphele.
5 Tangua ahetele gu Salamine, asendesele gulongesa mbimbi ya Nzambi mu sinagoga jia enya Yuda. Akhalele nji nu Yone ha guakuatesa.
6 Tangua abalegele hongo diagasue, ahetele gu Phafo, ataganele nu muenya Yuda mumoshi, jina dienji Bar-Yesu. Muthu muene wakhalele nganga nu profete wa mambo.
7 Wakhalele nu guvelenele* mumoshi, jina dienji Segio Phaula, muthu watema. Guvelenele muene watamegele Barnabase nu Saula handaga wakhalele nu nzala yakola ya guvua mbimbi ya Nzambi.
8 Uvi nganga yene yana tamegewa nji egi Elimase, yakhalele mutuna malongo awo. Wakambele nji gutunyisa guvelenele hagula gatshiginago ndaga akhalele gumulongesa. (Jina dia Elimase didi mukotelesa egi nganga.)
9 Saula wana tamegewa nji egi Phaula wazalele nu nyuma ya Nzambi. Watalele muthu muene nonoo,
10 wamuwambelele egi: “Aye yala wazala pha nu ndaga jiagasue jia mambo nu jiabola, udi mun’a Diabulu, udi mbalagaji ya ndaga jiagasue jiabonga. Tangua ditshi mbawubemba guhengelesa njila jiabonga jia Yehowa?
11 Koko dia Yehowa didi holu diaye, aye mbawubua gifofo, mbawushigo mumona kumbi mu masugu azonda.” Mu tangua diene, Elimase wamonele gimbundu-mbundu, gu meso guamubuitshile. Wayile nu guphaphata khanda nu khanda ha gukamba muthu wa gumukuata gu koko ha gumutuameza.
12 Hamonele guvelenele ndaga eyi, wabuile mulandudi wa Yesu. Washimanele muavula mukunda nu malongo a Yehowa.
13 Phaula nu athu akhalele nawo anginyine mu masuwa gu Phafo, azawugile, ahetele gu Phelega ya gu Phamfilia. Uvi Yone waabembele, wavutugile gu Yelusalema.
14 Akatugile gu Phelega, ahetele gu Antiokia a gu Phisidia. Mu Lusugu lua Guhuluguga anginyile mu sinagoga, akhalele hashi.
15 Tangua amanesele gutanga Mukhuala nu mikanda ya Baprofete, atuameji a sinagoga a alezele egi: “Mala, aphangi, gula mudi nu mbimbi ya guzuela ha gukolesa athu, izuelenu.”
16 Phaula wazugile mu molu, wathuphuile koko ha guwambela athu ha guhena tedie, gungima wazuelele egi:
“Mala, enya Isalele nu enue athu ako muana vila Nzambi woma, tegelelenu.
17 Nzambi wa athu awa enya Isalele watombele akhakh’etu, waabuishile gifutshi gia ngolo tangua diakhalele ene ngenji gu Ejipitu. Waazolele nu koko dienji dia ngolo.
18 Nzambi gaavidilego khabu muphushi mukunda nu gubola guatshitshile ene ivo 40 mu mavu a luselenga.
19 Washiyile ifutshi 7 mu mavu a Kanana, gungima wahanele mavu awo gudi akhakh’etu gifua khapho diawo.
20 Ndaga eji jiagasue jiabuile mu sungi ya ivo 450.
“Gungima waahanele manzuji uu nu mu tangua dia profete Samuele.
21 Uvi gungima, amutogele ha guahana fumu. Nzambi waahanele Saula mun’a Kishi, muenya giphuta gia Benyamine. Waahinyine ivo 40.
22 Tangua Nzambi wakatuile Saula, waahanele Davidi ha gukhala fumu wawo. Wazuelele mukunda nu Davidi egi: ‘Ngamona Davidi mun’a Yese, muthu wana kalagala diago ndaga ngana tshigina; muene mbawutshita ndaga jiagasue ngudi mutshigina.’
23 Mu njila ya ajigulu* a yala owu, Nzambi wahanele Yesu, muhuluishi wa Isalele gifua muatendelele muene.
24 Gutuama dia guza guenji, Yone wakhalele mulongesa athu agasue a gu Isalele egi abatijiwe ha gumonesa egi abalumuna mitshima mu gubola guawo.
25 Uvi hamanesele Yone mudimo wenji, wazuelele egi: ‘Enue mudi mutangiza egi ame ngudi muene? Ngushigo muene ndo. Uvi talenu! Muthu udi muza gungima diami, ngushigo ngatagana ha gumukatula saphata gu malu.’
26 “Mala, aphangi, enue ajigulu a Abalahama nu athu ako ana guvila Nzambi woma, mbimbi ya guhuluga ayitumine mukunda nu esue.
27 Handaga enya gu Yelusalema nu mafumu awo amujiyilego. Uvi tangua akalegele ndaga gifua manzuji, atagenesele ndaga jiazuelele Baprofete, jinyi muana tanga mu dijui diakola mu Lusugu luagasue lua Guhuluguga.
28 Amonelego nga gima gimoshi giabola gia gumushiyila, uvi awambelele Philato ha gumushiya.
29 Tangua atagenesele ndaga jiagasue jiasonegewe mukunda nu muene, amutuluile gu mutshi, amuhagele mu malumba.*
30 Uvi Nzambi wamufuzumuine.
31 Masugu avula, wamonegele gudi athu anyi akatugile nji gu Galilea ha gukanduga gu Yelusalema. Mangino, athu ene adi matemue enji gudi athu ako.
32 “Hene tudi gumilongesa lukuma luabonga luatadila ndaga yalayele Nzambi gudi akhakh’etu.
33 Nzambi wayitagenesele yagasue mukunda nu esue an’awo hafuzumuine muene Yesu, gifua luholo idi ya gusonega mu mukanda wa mbadi wa ngimbo egi: ‘Aye udi mun’ami; mangino ame ngabua sh’aye.’
34 Nzambi wamufuzumuine mu gufua, muene mbagashigo mukhala luko muthu udi nu muila wajiya gufua nga gufukha. Nzambi wamonesele egi ndaga yene idi ya giamatshidia, hazuelele muene egi: ‘Mbangumikalegela ndaga jidi mumonesa guzumba gua giamatshidia ngalayele Davidi.’
35 Mukanda uko wa ngimbo udi muzuela egi: ‘Aye mbawushigo mubemba egi muthu wana gugukombelela nu mutshima umoshi afukhe.’
36 Davidi wakombelele Nzambi* mu gindongo gienji, wafile, wafundiwe nu akhakh’enji, wafukhile.
37 Uvi, muthu wafuzumuiwe gudi Nzambi gafukhilego.
38 “Hene aphangi, ngudi gumiwambela egi Nzambi mbawumitotesela gubola guenu mu njila ya gufua gua muthu yowu.
39 Mukhuala wa Moize wajiyilego gumibuisa athu abonga. Uvi mukunda nu gufua gua muthu yowu, Nzambi mbawutamega muthu wagasue udi musha gutshigina egi muthu wabonga.
40 Hene temenu hagula ndaga eji jidi muzuelewa mu mikanda ya Baprofete jimibuilago.
41 ‘Enue athu muana segulula talenu, shimanenu nu fuenu handaga ngudi mutshita mudimo mu masugu enu. Enue mbamushigo guwutshigina nga hazonda, ikhale muthu wamiwambela nawo muabonga.’”
42 Hakhalele ene muzoga, athu a abubidile ha gualongesa luko ndaga eji mu Lusugu luko lua Guhuluguga.
43 Hamanesele ene gudibungisa mu sinagoga, enya Yuda avula nu athu ako akhalelego enya Yuda* anyi akhalele mukombelela Nzambi, alanduile Phaula nu Barnabase. Tangua akhalele muta nawo maga, Phaula nu Barnabase akolesele athu ene ha gufubidila mu guzumba gua Nzambi.*
44 Hataganele Lusugu luko lua Guhuluguga, yakhalele mumonega gifua athu a mu dimbo diagasue adibungishile ha gutegelela mbimbi ya Yehowa.
45 Tangua enya Yuda amonele athu avula, avile fuwa diakola, asendesele gushinga Phaula nu gutuna ndaga jiakhalele muene muzuela.
46 Phaula nu Barnabase a awambelele haphelo* egi: “Mbimbi ya Nzambi yakhalele naye thomo gulongesewa gudi enue. Uvi luholo muayituna nu muamonesa egi mushigo muatagana ha guheta monyo wa mayilago, na tuaya getu gudi enya ifutshi iko.
47 Handaga Yehowa watulezele egi: ‘Ngagutombele ha gukhala muanya mukunda nu ifutshi, ha gubata guhuluga uu nu gu suga ya mavu.’”
48 Tangua enya ifutshi iko avile ndaga eyi, asuangulugile. Asendesele gutumbuisa mbimbi ya Yehowa. Athu agasue anyi akhalele nu mitshima yatagana ha guheta monyo wa mayilago abuile alandudi.
49 Mbimbi ya Yehowa yakhalele nji mumuangana muavula mu gifutshi giagasue.
50 Uvi enya Yuda ashinjigile manene a dimbo nu akhetu a lutumbu anyi akhalele muvila Nzambi woma ha gusagesa Phaula nu Barnabase. A akayele mu mavu awo.
51 Phaula nu Barnabase abundile malu awo ha gukatula fuphi mukunda nu athu ene, gungima ayile gu Ikoniome.
52 Alandudi akhalele nu gusuanguluga tangua diagasue, alanduile guzala nu nyuma ya Nzambi.
Mbimbi goshi'a diyiji
^ Mu Greke: “Nigele.”
^ Nga “mudimo wa gukuatesa athu ako.”
^ Guvelenele wa provense ya Enya Roma. Tala Ukoteleshi wa Mbimbi.
^ Mu Greke: “vungu.”
^ Nga “malumba a guwunguluga.”
^ Nga “wakalegele gutshigina gua Nzambi.”
^ Mu Greke: “baprozelite.”
^ Nga “ha gulandula guheta khenda jiavula jia Nzambi.”
^ Nga “nu gikhesa giagasue.”
