Makalegelo a Apostolo 14:1-28
14 Phaula nu Barnabase anginyile mu sinagoga ya enya Yuda ya gu Ikoniome. Alongesele muabonga diago, gishina giene enya Yuda avula nu enya Greke abuile alandudi a Yesu.
2 Uvi enya Yuda anyi atunyile gusha gutshigina mu ndaga jiakhalele mulongesa Phaula nu Barnabase, ashinjigile enya ifutshi iko ha guvua khabu nu ha guluisa aphangi.
3 Phaula nu Barnabase asalele masugu avula gu Ikoniome, Yehowa waahanele ngolo ha gulongesa lukuma ludi mumonesa egi wavidile athu khenda jiavula, waakuatesele nji ha gutshita ndaga jia gushimana.
4 Uvi athu avula a mu dimbo diene adikhaphele; ako akhalele gu khanda ya enya Yuda uvi ako gu khanda ya apostolo.
5 Enya ifutshi iko nu enya Yuda nu mafumu awo akhalele gudilondega ha guasagesa nu guasonona maseso.
6 Havile ene ngenyi, alengele, ayile mu membo a gu Likaonia nu Liseta nu Delebe nu mu membo ako a hehi.
7 Akhalele mulongesa lukuma luabonga guene.
8 Mu dimbo dia Liseta guakhalele nu yala mumoshi wakhalele malu a gufua, wakhalele hashi. Wavalewe gikata, khenji gawendelego nga lusugu lumoshi.
9 Yala muene wakhalele mutegelela Phaula hakhalele muene muzuela. Phaula wamutalele nonoo, wamonele egi wakhalele nu gutshigina hagula asagewe.
10 Hene, wamuwambelele mu dijui diakola egi: “Zuga mu molu.” Yala muene wazugile, wasendesele guwenda.
11 Tangua athu avula amonele ndaga yakalegele Phaula, akalugile mu zuelelo dia Likaonia egi: “Nzambi jiabua gifua athu, jiaza mubulumuga gudi esue!”
12 Asendesele gutamega Barnabase egi Zeuse, uvi Phaula egi Helemese handaga muene wakhalele muzuela muavula.
13 Nganga-nzambi wa Zeuse wakhalele nu tempelo yenji ha mufulo wa dimbo. Wajile nu ngombe nu ipho* ya iyaji ha mufulo wene wa dimbo. Wakhalele mutshigina guhana milambu hamoshi nu athu ako.
14 Uvi tangua apostolo Barnabase nu Phaula avuile ndaga eyi, atawuile milele yawo, anginyile muphushi mukatshi dia athu, azuelele mu dijui diakola egi:
15 “Mala, mukunda natshi mudi mukalagala ndaga eji? Esue nji tudi athu gifua enue. Tudi gumilongesa lukuma luabonga hagula mubembe ndaga eji jiabola, muze gudi Nzambi wa monyo wafugile dilu nu mavu nu kianga nu ima yagasue idi muene.
16 Mu indongo yabalega, wabembele athu a ifutshi yagasue ha gukalagala ndaga jiakhalele guasuanguluisa.
17 Uvi muene gabembelego gukalagala ndaga jiabonga ha gumimonesa gula udi nanyi. Wamihanele mvula nu sungi jia mbuto, wamihanele ima ya gudia yavula nu wazalesele mitshima yenu nu gusuanguluga.”
18 Ikhale azuelele ndaga eji, uvi yakhalelego ndaga yaleba ha gutunyisa athu ene avula ha guahana milambu.
19 Uvi enya Yuda anyi akatugile gu Antiokia nu gu Ikoniome ashinjigile athu ha gusonona Phaula maseso. Atangijile egi wafi hene amuzolele hanze ya dimbo.
20 Uvi tangua alandudi ajile ha fundo diakhalele muene, wazugile, wanginyile mu dimbo. Lusugu lualanduile, muene nu Barnabase ayile gu Delebe.
21 Alongesele lukuma luabonga guene, abuishile athu avula alandudi. Gungima avutugile gu Liseta, gu Ikoniome nu gu Antiokia.
22 Akolesele alandudi mu membo ene, a akuatesele ha gukhala nu gutshigina guakola, a awambelele egi: “Ha gungina mu Ufumu wa Nzambi tudi naye gutagana nu malamba avula.”
23 Atombele akulu mu mahungu agasue, alombele Nzambi, atunyine nji gudia mukunda nu gukombelela. Gungima ahanele akulu ene gudi Yehowa handaga ene ashile gutshigina gudi muene.
24 Gungima abalegele gu Phisidia, ayile gu Phamfilia.
25 Alongesele mbimbi ya Nzambi gu Phelega, gungima ayile gu Ataliya.
26 Akatugile guene, anginyile mu wato, ayile gu Antiokia, fundo aphangi atogele Nzambi egi a avuile khenda jiavula hagula atshite mudimo wakatugile ene gumanesela.
27 Tangua ahetele, abungishile hungu diagasue. Awambelele aphangi ndaga jiavula jiakalegele Nzambi mu njila yawo nu luholo luakangudile muene njila* gudi enya ifutshi iko ha gusha gutshigina gudi muene.
28 Asalele guene masugu avula nu alandudi.
