Makalegelo a Apostolo 15:1-41
-
Gumana guazogele gu Antiokia mukunda nu ndaga yatadila gumbiwa gumukanda (1, 2)
-
Abatele ndaga yene gu Yelusalema (3-5)
-
Akulu nu apostolo adibungishile (6-21)
-
Mukanda watumine hunji dia akulu atuameji (22-29)
-
Gutuna mahatshi (28, 29)
-
-
Mahungu ahetele gikhesa mukunda nu mukanda wene (30-35)
-
Phaula nu Barnabase adikhapha (36-41)
15 Athu ako akatugile gu Yudea abulumugile, asendesele gulongesa aphangi egi: “Gula muambiwego gu mukanda gifua mudi muzuela Mukhuala wa Moize, muajiyilego guhuluishiwa.”
2 Uvi asendesele gumana mangololo nu gusha iphapha yakola* nu Phaula nu Barnabase. Hene aphangi atombele Phaula nu Barnabase nu athu ako mukatshi diawo ha gukanduga gu Yelusalema gudi apostolo nu akulu ha guawambela mulonga wene.
3 Aphangi’a mu hungu ayile guatuala mu njila, Phaula nu athu anyi akhalele muya nawo abalegele gu Fenisia nu gu Samaliya, akhalele muya nu guwambela aphangi luholo athu a ifutshi iko abalumuine mitshima. Ndaga yene yasuanguluishile aphangi agasue mangololo.
4 Tangua ahetele gu Yelusalema, aphangi a mu hungu nu apostolo nu akulu a ayambele nu gusuanguluga guagasue. Gungima, Phaula nu Barnabase a atele lumene lua ndaga jiagasue akalegele mu ukuateshi wa Nzambi.
5 Uvi alandudi ako anyi akhalele thomo mu gahunji ga Afalese azugile mu molu, azuelele egi: “Adi naye gumbiwa gu mukanda, adi naye guawambela ha gutumagela Mukhuala wa Moize.”
6 Hene apostolo nu akulu adibungishile ha gutadila mulonga wene muabonga.
7 Gungima dia guzuelela mulonga wene muavula, Phetelo wazugile mu molu, waawambelele egi: “Mala, aphangi, mudi mujiya muabonga egi gu gisendeselo Nzambi wangutombele mukatshi dienu hagula mu njila yami, athu a ifutshi iko avue mbimbi ya lukuma luabonga nu atshigine.
8 Nzambi yonu wana jiya mutshima wa muthu wamonesele egi waatshiginyile tangua diaahanele muene nyuma yenji gifua luholo watuhanele esue.
9 Nzambi gamoneselego ukhaphumunyi nga hazonda mukatshi diawo nu esue, uvi waphelegetesele mitshima yawo mukunda nu gutshigina guawo.
10 Henyaha mukunda natshi mudi mulola Nzambi luholo mudi muhaga ginemo ha phanga jia alandudi, ginyi nga akhakh’etu nga esue tuajiyilego gubata?
11 Uvi tudi nu gutshigina egi tudi muhuluishiwa mu khenda jiavula jia Fumu Yesu luholo lumoshi nu ene.”
12 Athu agasue ahenele tedie, akhalele mutegelela Barnabase nu Phaula tangua akhalele muzuelela ndaga jiavula jia gushimana akalegele mu ukuateshi wa Nzambi mukatshi dia enya ifutshi iko.
13 Hamanesele ene guzuela, Yakoba wazuelele egi: “Mala, aphangi, ngutegelelenu.
14 Simeone* wazuedi muabonga luholo Nzambi watangijile enya ifutshi mbala ya thomo ha gutomba athu mukatshi diawo mukunda nu jina dienji.
15 Ndaga yene idi gudivua nu mbimbi jia Baprofete gifua luholo idi ya gusonega egi:
16 ‘Gungima dia ndaga eji mbanguza luko, mbanguzumbula luko tenta* ya Davidi inyi yabuile; mbanguyitunga luko nu mbanguyilondega
17 hagula athu anyi asala angukambe ame Yehowa nu mutshima umoshi, hamoshi nu enya ifutshi yagasue, athu adi mutamegewa mu jina diami. Ame Yehowa ngudi muzuela, ame ngudi mutshita ndaga eji.
18 Sendese mualeha, ngazuelele egi ngudi mutshita ndaga eji.’
19 Hene matangi’ami* adi egi tusagesago enya ifutshi adi mubalumuna mitshima ha guza gudi Nzambi.
20 Uvi tuasonegele ha gutuna ima yagasue idi gudivua nu isongo nu ha gutuna uthambi* nu shitu jiakamewe ha muminyo* nu mahatshi.
21 Handaga sendese mu tangua dikulu, Moize wana khala nu athu ana gulongesa mbimbi jienji mu membo agasue, handaga mu Lusugu luagasue lua Guhuluguga ana tanga mikanda yenji mu dijui diakola mu sinagoga hagula athu ategelele.”
22 Apostolo nu akulu nu hungu diagasue adivile ha gutomba athu ako mukatshi diawo ha guatuma nu Phaula nu Barnabase gu Antiokia. Atumile Yudasa wakhalele mutamegewa egi Barsaba nu Silase, anyi akhalele nu inemo yakoma mukatshi dia aphangi.
23 Mukanda a ahanele ha guya nawo wakhalele muzuela egi:
“Esue aphangi’enu apostolo nu akulu. Tuamisonegela enue aphangi a gu Antiokia, a gu Siliya nu gu Silisia, enue mudi mu ifutshi. Moyo wenu!
24 Tuavi egi athu ako mukatshi dietu azuelele mbimbi jiamisagesele. Akambele gumiwunganesa,* uvi ishigo esue tuaatumine ha guzuela ndaga jiene.
25 Mukut’etu agasue tuadivi ha gutomba aphangi ha guatuma hamoshi nu Barnabase nu Phaula, aphangi tuana guzumba muavula,
26 adi muhana monyo wawo mukunda nu jina dia Fumu wetu Yesu Klisto.
27 Tuatuma nji Yudasa nu Silase hagula ene nji ateme gumikotelesela ndaga jiene jimoshi.
28 Handaga nyuma ya Nzambi nu esue tuamonyi egi ishigo ndaga yabonga ha gumilunda ginemo giko, phamba ndaga eji jia ndando:
29 Gutuna ima yahanewe milambu gu isongo, nu mahatshi, nu shitu jiakamewe ha muminyo,* nu uthambi.* Gula muatuna diago ndaga eji, mbamukhala muabonga. Salenu kiawaha!”
30 Athu ene akatugile, abulumugile gu Antiokia. Abungishile alandudi agasue fundo dimoshi, a ahanele mukanda.
31 Tangua atangele mukanda wene, asuangulugile mangololo luholo ahetele mbimbi jiakhalele guahana ngolo.
32 Yudasa nu Silase akhalele nji baprofete, hene akalegele badiskur avula ha guhana aphangi gikhesa nu ha guakolesa.
33 Asalele guene masugu azonda. Hakhalele ene muvutuga gudi athu a atumine, aphangi a awambelele ha guvutuga muabonga.
34 ——
35 Uvi Phaula nu Barnabase asalele gu Antiokia. Ene nu alandudi ako avula akhalele mulongesa nu gumuanga lukuma luabonga lua mbimbi ya Yehowa.
36 Gungima dia masugu azonda, Phaula wawambelele Barnabase egi: “Tuvutuge tutale aphangi mu membo agasue anyi tualongesele mbimbi ya Yehowa ha gujiya gula adi gikuatshi.”
37 Barnabase wakhalele mutshigina guya nu Yone, munu wakhalele mutamegewa nji egi Mako.
38 Uvi Phaula watunyile egi ashigo muya n’enji handaga Yone waabembele gu Phamfilia, gayilego nawo mu mudimo wa gulongesa mbimbi ya Nzambi.
39 Amanele mangololo, gungima adikhaphele. Barnabase wazanguile Mako, anginyile mu masuwa, ayile gu Shiphele.
40 Phaula wazudile Silase, aphangi akombelele Yehowa hagula amukuatese, gungima wayile genji.
41 Phaula wabalegele gu Siliya nu gu Silisia, wakhalele muya nu gukolesa mahungu.
Mbimbi goshi'a diyiji
^ Nga “gumba maya akola.”
^ Yakotelesa egi Phetelo.
^ Nga “gisasa; inzo.”
^ Nga “desizio.”
^ Mu Greke: “Porneya.” Tala Ukoteleshi wa Mbimbi.
^ Nga “shitu ya gudifuila; nga ndo shitu yabatudiwego muminyo.”
^ Nga “mionyo yenu.”
^ Nga “shitu ya gudifuila; shitu yashiyiwe uvi mahatshi nu guzoga ndo; nga ndo shitu yashiyiwe uvi nu gubatuiwa ndo muminyo.”
^ Mu Greke: “Porneya.” Tala Ukoteleshi wa Mbimbi.
