Makalegelo a Apostolo 18:1-28
18 Gungima dia ndaga eji, Phaula wakatugile gu Atene, wayile gu Kolinto.
2 Wataganele nu muenya Yuda mumoshi guene jina dienji Akila, muenya gu Phonte, muene nu mukaji’enji Prisile akatugile gu Italiya masugu ene handaga Klode wambile mukhuala egi enya Yuda agasue adi naye gukatuga gu Roma. Phaula wayile guatala.
3 Luholo mukut’awo agasue akhalele mutshita mudimo wa gutunga matenta, Phaula wayile mukhala gumbo diawo. Akhalele mutshita mudimo hamoshi.
4 Mu lusugu luagasue lua guhuluguga Phaula wakhalele mutshita diskur* mu sinagoga, wakhalele mukuatesa nji enya Yuda nu enya Greke ha gusha gutshigina mu ndaga jiakhalele muzuela muene.
5 Silase nu Timote akatugile gu Maseduane, ahetele fundo diakhalele Phaula. Mu tangua diene, Phaula wasendesele gudihana muavula ha gulongesa mbimbi ya Nzambi nu gumonesa gudi enya Yuda egi Yesu udi Klisto.
6 Uvi luholo akhalele mutuna gumutegelela nu akhalele gumushinga, Phaula wabundile milele yenji ha gukatula fuphi, waawambelele egi: “Mahatshi’enu akhale ha mito yenu. Ame ngushigo gami nu gubola. Henyaha na ngaya gami gudi enya ifutshi iko.”
7 Gungima wazogele mu sinagoga, wayile gumbo dia yala mumoshi jina dienji Titiuse Yustuse. Yala muene wakhalele mukombeledi wa Nzambi. Inzo yenji yakhalele hehi nu sinagoga.
8 Uvi mutuameji mumoshi wa sinagoga, jina dienji Kilisiphe, wabuile mulandudi wa Fumu hamoshi nu athu agasue a monzo yenji. Enya gu Kolinto avula anyi avile lukuma luabonga ashile gutshigina gudi Fumu nu abatijiwe.
9 Mu phipha imoshi, Fumu wawambelele Phaula mu vizio egi: “Uvuigo woma, landula gulongesa, ubembigo,
10 handaga ame ngudi naye. Gushigo nga muthu mumoshi mbawuguluisa ha gugutshita gubola. Ngudi nu athu avula mu dimbo edi.”
11 Hene Phaula wasalele guene givo gimoshi nu mbeji 6, wakhalele gualongesa mbimbi ya Nzambi.
12 Tangua diakhalele Galiyo guvelenele* wa provense ya Akaya, enya Yuda adibungishile ha guluisa Phaula, ayile n’enji gu tribinale.
13 Azuelele egi: “Muthu yowu udi mutshiginyisa athu ha gukombelela Nzambi mu luholo lushigo gudivua nu mukhuala.”
14 Tangua diakhalele mutshigina guzuela Phaula, Galiyo wawambelele enya Yuda egi: “Enue enya Yuda, gula nga muthu yowu wakalagala mulonga wakoma nga wa khuta, nga ngazudi diago kumbi ha gumitegelela muabonga.
15 Uvi luholo idi milonga ya guditenda mukunda nu mbimbi nu majina nu mikhuala yenu, enue hakhenu imaneselenu. Ame ngajiyilego gusophesa milonga ya luholo elu.”
16 Gungima waakayele gu tribinale.
17 Mukut’awo agasue akuatele Sosetene mutuameji wa sinagoga, asendesele gumubeta gu tribinale. Uvi guvelenele Galiyo gadinginyishilego nga hazonda mu ndaga yene.
18 Phaula wasalele luko guene masugu avula, gungima adilayele nu aphangi, wanginyile mu masuwa, wayile gu Siliya, wayile nu Prisile nu Akila. Wakuluile sanga dienji mu dimbo dia Sanekelea mukunda nu gudiloga guadilogele muene.
19 Tangua ahetele gu Efeso, Phaula waabembele mu dimbo, uvi muene wanginyine mu sinagoga, wasendesele guta maga* nu enya Yuda ha guakuatesa ha gukotelesa mbimbi ya Nzambi.
20 Enya Yuda ene akhalele gumuwambela ha gusala nawo masugu avula, uvi muene watunyine.
21 Gungima wadilayele nawo, waawambelele egi: “Gula Yehowa watshigina, mbanguza luko ha gumitala.” Hene, Phaula wanginyile mu masuwa gu Efeso,
22 wabulumugile gu Sezalea. Wakandugile gu Yelusalema ha guya mumenega aphangi mu hungu, gungima wabulumugile gu Antiokia.
23 Wasalele guene masugu azonda, gungima wayile mu membo avula a gu Galatiya nu Filigia ha gukolesa gutshigina gua alandudi agasue.
24 Muenya Yuda mumoshi wa gu dimbo dia Alekisandeliya, jina dienji Apholo, wahetele gu Efeso. Wakhalele mujiya guzuela muabonga, wakhalele nji mujiya Mbimbi ya Nzambi muabonga diago.
25 Amulongesele malongo a Yehowa,* nyuma ya Nzambi yamuhuile ngolo jia guzuela nu jia gulongesa muabonga ndaga jiatadila Yesu, uvi muene wakhalele mujiya phamba gubatiza gunu guakhalele mulongesa Yone.
26 Wakhalele mulongesa mu sinagoga nu gikhesa. Tangua Prisile nu Akila amuvile, amuzanguile, ayile n’enji, amukotelesele muabonga malongo a Nzambi.*
27 Apholo wakhalele mutshigina guya gu Akaya, hene aphangi a gu Efeso asonegele aphangi a gu Akaya mukanda egi amuyambe kiawaha. Tangua diahetele muene guene, wakuatesele muavula athu anyi ashile gutshigina mukunda nu khenda jiavula jia Nzambi.
28 Wakhalele mumonesa nu ngolo jiagasue ha meso a athu agasue egi malongo a enya Yuda akhalele a mambo. Wakhalele nji guamonesa mu Mbimbi ya Nzambi egi Yesu udi Klisto.
Mbimbi goshi'a diyiji
^ Nga “wakhalele mutangiza nawo.”
^ Tala Ukoteleshi wa Mbimbi.
^ Nga “gutangigiza nawo.”
^ Nga “njila ya Yehowa.”
^ Nga “njila ya Nzambi.”
