Makalegelo a Apostolo 19:1-41
19 Tangua diakhalele Apholo gu Kolinto, Phaula wayidile gu njila yakhalele gualeha nu Kianga, wabulumugile gu Efeso. Wasangele alandudi ako guene.
2 Waahudile egi: “Muahetele nyuma ya Nzambi tangua muabuile alandudi a Yesu ba?” Ene amuvutudile egi: “Ndo getu, khenji tuavile galego egi nyuma ya Nzambi yakhala guene.”
3 Muene waahudile luko egi: “Gubatijiwa gua luholo lutshi muabatijiwe giwa?” Ene amuvutudile egi: “Gubatijiwa gua Yone.”
4 Phaula waawambelele egi: “Yone wakhalele mubatiza athu ha gumonesa egi abalumuna mitshima mu gubola guawo. Wakhalele guawambela ha gusha gutshigina gudi muthu wakhalele naye guza gungima dienji, yakotelesa egi gudi Yesu.”
5 Tangua alandudi ene avile ngenyi, abatijiwe mu jina dia Fumu Yesu.
6 Gungima Phaula waahagele mago, ahetele nyuma ya Nzambi. Asendesele guzuela mu mazuelelo angane nu gulongesa athu Mbimbi ya Nzambi.
7 Mukut’awo agasue akhalele mala 12.
8 Mu mbeji thathu, Phaula wakhalele muzuela nu gikhesa giagasue mu sinagoga, wakhalele mukalagala ba diskur, wakhalele nji muta maga nu athu ha guakuatesa hagula atshigine ndaga jiatadila Ufumu wa Nzambi.
9 Uvi athu ako akhalele enya mito yakola, akhalelego mutshigina ndaga jiakhalele mulongesa muene. Akhalele nji muzuela ndaga jiabola mukunda nu Njila ya Fumu ha meso ya athu avula. Hene, Phaula waabembele, wayile nu alandudi. Wakhalele mukalagala ba diskur lusugu nu lusugu mu khalasa dia Tilanuse.
10 Walongesele mu khalasa diene ivo mbadi, hene enya Yuda nu enya Greke agasue akhalele mu provense ya Azi avile mbimbi ya Fumu.
11 Nzambi wakhalele mukuatesa Phaula ha gukalagala ndaga jiavula jia gushimana.
12 Athu akhalele mubatela akhashi ibanji ya milele nu milele ya mudimo inyi yakuatele muila wa Phaula. Ngenyi, enya misongo asagewe, nyuma jiabola jiazogele nji gudi athu akhalele najio.
13 Uvi enya Yuda anyi akhalele muwenda khanda nu khanda ha gukaya bademo, aphagele nji gukalegela jina dia Fumu Yesu ha gukaya nyuma jiabola gudi athu akhalele najio. Akhalele muzuela egi: “Mu jina dia Yesu udi Phaula mulongesa ngudi guguwambela egi zoga.”
14 Mukatshi dia athu akalegele ndaga yene, guakhalele nji nu ana a mala 7 a fumu mumoshi wa nganga-nzambi wa enya Yuda, jina dienji Seva.
15 Nyuma yabola yaawambelele egi: “Ngudi mujiya Yesu, ngudi mujiya nji Phaula; uvi enue mudi akhuatshi?”
16 Mu tangua diene muthu wakhalele nu nyuma jiabola waaluishile, waabalegele jingolo nu waabingile mukut’awo agasue. Hene azogele phushi monzo thowa nu jiphuta mu muila, alengele.
17 Enya Yuda nu enya Greke agasue akhalele gu Efeso avile ndaga yene. Mukut’awo agasue avile woma. Athu akhalele mutumbuisa jina dia Fumu Yesu.
18 Athu avula abuile alandudi a Yesu akhalele muza muzuelela haphelo ndaga akhalele mukalagala.
19 Athu avula akhalele mukalagala ndaga jia wanga abungishile mikanda yawo, ayimbile tshuya ha meso a athu agasue. Atangele mikanda yene, amonele egi ndando yenji yakhalele utadi wa siliva 50 000.
20 Luholo Yehowa udi nu ngolo jiavula, mbimbi yenji yakhalele mumuangana mu mafundo avula, yakhalele nji mubinga.
21 Gungima dia ndaga eji, Phaula watshiginyile gubalegela* gu Maseduane nu gu Akaya ha guya gu Yelusalema. Wazuelele egi: “Gula ngaheta guene, ngudi naye nji guya gu Roma.”
22 Hene watumine athu mbadi mukatshi dia athu akhalele gumukuatesa, Timote nu Elasto ha guya gu Maseduane. Uvi muene wasalele ndambo ya masugu mu provense ya Azi.
23 Mu tangua diene, athu azolele matululu avula mukunda nu Njila ya Fumu.
24 Guakhalele nu yala mumoshi jina dienji Demeteliuse, wakhalele mbembo. Wakhalele mulonda tuyifuanesa tua tempelo ya Aletemise nu utadi wa siliva. Mudimo wenji wakhalele mukuatesa nji mbembo jiko ha guheta umonyi wavula.
25 Wabungishile mbembo jiko, waawambelele egi: “Mala, mudi mujiya muabonga egi mudimo wuwu wene wana gutukuatesa ha guheta umonyi.
26 Uvi henyaha mudi mumona, mudi muvua nji luholo Phaula owu udi mutshiginyisa nu udi musombegesa matangi a athu avula gu Efeso nu mu provense yagasue ya Azi egi nzambi jialondewe nu mago jishigo nzambi jia giamatshidia.
27 Ngudi muvua nji woma egi ndaga yene mbayituma athu ha guzuela ndaga jiabola mukunda nu mudimo wetu. Mbaamona nji tempelo yakoma ya nzambi Aletemise gifua gima gia githuhu. Athu agasue a mu provense ya Azi nu a ha mavu agasue ana kombelela nzambi Aletemise mbaashigo luko gumunemesa mukunda nu ndaga jidi muzuela Phaula.”
28 Tangua avile ngenyi, avile khabu jiabala. Asendesele gukaluguga egi: “Aletemise nzambi wa enya gu Efeso udi nzambi wakoma!”
29 Dimbo diagasue diabuile tunga-tunga, athu akhalele musha matululu, adibungishile ayile muphushi ha fundo akhalele mukalegela teyatre. Akuatele Gayuse nu Aristarke, enya gu Maseduane akhalele muwenda nu Phaula.
30 Phaula watshiginyile gungina mukatshi dia athu ene, uvi alandudi amutunyishile.
31 Mafut’enji anyi akhalele mulonda mawano nu jisaga, amutumine nji mbimbi ha gumububila egi gayigo ha fundo dia teyatre.
32 Mu tangua diene athu akhalele mukaluluga, akhalele muzuela ima ya gudisha, gudivua guakhalelego guene. Hene athu avula akhalelego mukotelesa gishina adibungishile ha fundo diene.
33 Azolele Alekisandele mukatshi dia athu, munu enya Yuda akhalele mushinjiga gutuama. Alekisandele wathuphuile koko dienji ha guwambela athu egi ahene tedie, hagula a akotelesele ndaga.
34 Uvi tangua athu ajiyile egi Alekisandele muene wakhalele muenya Yuda, mukut’awo agasue akalulugile matangua mbadi. Akhalele muzuela egi: “Aletemise nzambi wa enya gu Efeso udi nzambi wakoma!”
35 Uvi fumi’a dimbo waahenesele tedie, wazuelele egi: “Enya gu Efeso, nanyi gashigo mujiya egi dimbo dia Efeso diene diana gubamba tempelo ya nzambi wakoma Aletemise nu gifuanesa gienji giabuile mu dilu?
36 Ndaga eji jishigo jia gushila iphapha ndo. Buisenu mitshima, mukalagalago ndaga gutangiza ndo.
37 Handaga athu awa muaza nawo haha ashigo nzangi jiana kuya tempelo nu ashingilego nzambi wetu.
38 Gula Demeteliuse nu athu ana tshita n’enji mudimo adi nu mulonga nu muthu, ene adi mujiya masugu tribinale yana sophesa milonga. Adi mujiya nji baguvelenele,* aye a afunde guene.
39 Uvi gula gudi nu ndaga iko, adi naye guyitadila gudi athu anyi mafumu ahanele ginemo gia gusophesa milonga.
40 Ndaga eyi yakalegewa mangino yajiya gutukambela diago milonga. Ajiya gutufunda egi tudi muzola nguma handaga tushigo nga nu gima gia guzuela gidi mumonesa gishina athu awa avula adi mushila matululu.”
41 Hamanesele muene guzuela ndaga eji, wawambelele athu ha guvutuga gumbo diawo.
Mbimbi goshi'a diyiji
^ Nga “wazudile desizio dia guya.”
^ Baguvelenele a provense ya enya Roma. Tala Ukoteleshi wa Mbimbi.
