Makalegelo a Apostolo 2:1-47
2 Uvi mu lusugu lua Wano wa Pantekote, mukut’awo agasue akhalele fundo dimoshi.
2 Sagumugu, matululu akola akatugile mu dilu, akhalele gifua matululu a funji yakola. Inzo akhalele yazalele nu matululu ene.
3 Madimi gifua a tshuya azogele, adikhaphele, akhalele holu dia muto wa muthu wagasue mukatshi diawo.
4 Mukut’awo agasue azalele nu nyuma ya Nzambi. Asendesele guzuela mu mazuelelo ako, gifua luholo nyuma yakhalele guaawambela ha guzuela.
5 Mu tangua diene, enya Yuda a mu ifutshi yagasue ya ha mavu anyi akhalele gudihana ha gukombelela Nzambi, akhalele gu Yelusalema.
6 Hazogele matululu ene, athu ajile avula ha fundo diene; akhalele gudihula handaga muthu nu muthu wakhalele guavua muzuela mu zuelelo dienji.
7 Akhalele gudihula muavula, azuelele egi: “Athu awa agasue adi muzuela, ashigo enya gu Galilea ba?
8 Henyaha luholo lutshi muthu nu muthu mukatshi dietu udi guategelela mu zuelelo dienji?*
9 Enya gu Phaletiya, nu enya gu Mede, nu enya gu Elama, nu enya gu Mezopotamiya, nu enya gu Yudea, nu enya gu Kaphadosia nu enya gu Phonte, nu enya gu provense ya Azi,
10 nu enya gu Filigia, enya gu Phamfilia, enya gu Ejipitu, nu enya gu khanda ya Libia hehi nu Silene; nu enya gu Roma anyi ajile mutala dimbo dia Yelusalema, enya Yuda nu athu anyi akhalelego enya Yuda;
11 nu enya gu Krete nu Alaba—tudi guavua muzuela ndaga jia gushimana jia Nzambi mu mazuelelo etu.”
12 Yadiago, mukut’awo agasue akhalele gudihula, abuile tunga-tunga. Akhalele muzuela egi: “Ndaga eyi idi mukotelesa itshi?”
13 Uvi athu ako akhalele gualela, akhalele muzuela egi: “Matombe a akuata.”
14 Uvi Phetelo nu apostolo agasue Kumi nu Mumoshi azugile mu molu. Phetelo wazuelele mu dijui diakola egi: “Enya gu Yudea nu athu agasue a gu Yelusalema, jiyenu ndaga eyi, tegelelenu muabonga ndaga ngudi gumiwambela.
15 Athu awa anuilego matombe gifua luholo mudi mutangiza, handaga tudi mu tangua dia divua gutuama dia midi.*
16 Uvi ndaga eyi yene yazuelele profete Yowele egi:
17 ‘Nzambi udi muzuela egi, “mu masugu a gisugishilo, mbangumuanga ndambo ya nyuma yami gudi athu a maluholo agasue. An’enu a mala nu a akhetu, mbaazuela jiprofesi; an’enu a mavuala mbaamona vizio; athu enu a gukola mbaalota nzoji.
18 Mu masugu ene, mbangumuangela enya mudimo ami a mala nu a akhetu ndambo ya nyuma yami, ene mbaazuela profesi.
19 Mu masugu ene, mbangutshita ndaga jia gushimana gosa mu dilu nu hashi ha mavu—gifua mahatshi, tshuya nu mishi yavula.
20 Gutuama dia guza gua lusugu luakoma lua Yehowa, tangua mbadibuita, mbeji mbayibenga gifua mahatshi.
21 Muthu wagasue mbawutamega jina dia Yehowa mbawuhuluishiwa.”’
22 “Enya Isalele tegelelenu mbimbi eji: Nzambi wamimonesele Yesu wa gu Nazaleta haphelo, wamukuatesele ha gutshita ndaga jia gushimana mukatshi dienu gifua luholo mudi mujiya.
23 Amuhanele gudi mbalagaji jienji gifua muadiangele guyijiya Nzambi nu muakhalele gutshigina* guenji. Muamuhanele gudi athu abola hagula amukhokhe ha mutshi, muamushiyile.
24 Uvi Nzambi wamufuzumuine, wamuhuluishile mu gufua* handaga gufua guakhadilego nu ngolo jia gumukuata mayilago.
25 Davidi wazuelele mukunda nu Yesu egi: ‘Ngana haga Yehowa tangua diagasue gutuama diami;* muene udi gu koko diami dia madia, gushigo nga gima gimoshi giajiya gungunyigisa.
26 Gishina giene mutshima wami wasuangulugile. Ngasendesele guzuela nu gusuanguluga guavula diago. Mbangulandula* gukhala nu felela;
27 handaga aye mbawushigo gungubemba mu Malumba,* mbawushigo mubemba egi muthu wana gugukombelela nu mutshima umoshi afukhe.
28 Wangukuatesele ha gujiya njila jia monyo; mbawungusuanguluisa muavula gutuama diaye.’*
29 “An’etu, ngudi gumiwambela diago ndaga haphelo mukunda nu khakh’etu Davidi egi, wafile, amufundjile; malumba enji uu nu mangino wawa guene.
30 Wakhalele profete, wakhalele mujiya egi Nzambi wamuhanele laji egi mujigulu’enji* mumoshi mbawukhala ha nguasa yenji ya ufumu.
31 Wadiangele gumona gufuzumuga gua Klisto, hene wazuelele egi mbaashigo gumubemba mu Malumba,* muila wenji mbawushigo mufukha.*
32 Nzambi wafuzumuine Yesu, tuamonele ndaga yene.
33 Nzambi wamukanduishile gu koko dienji dia madia, wamuhanele nji nyuma yenji gifua luholo luamulayile muene. Gishina giene Yesu watumuangela nayo gifua luholo mudi mumona nu mudi muvua.
34 Davidi gakandugilego mu dilu, uvi wazuelele egi, ‘Yehowa wawambelele Fumu wami egi: “Khala gu koko diami dia madia
35 uu nu tangua mbanguhaga mbalagaji jiaye goshi’a ikanzo yaye.”’
36 Hene, athu agasue gu Isalele adi naye gujiya egi Yesu yowu muakhokhele ha mutshi, Nzambi wamubuishile diago Fumu nu Klisto.”
37 Havile ene ndaga eji, avile gikenene giavula mu mitshima. Awambelele Phetelo nu apostolo ako egi: “Mala, aphangi, itshi tudi naye gukalagala?”
38 Phetelo waawambelele egi: “Balumunenu mitshima, muthu wagasue mukatshi dienu abatijiwe mu jina dia Yesu Klisto hagula gubola guenu gutotesewe. Ngenyi mbamuheta nyuma ya Nzambi.*
39 Handaga Yehowa Nzambi wetu walayile ha gumihana nyuma yenji nu gudi an’enu nu gudi athu agasue adi gualeha, nu athu agasue anyi mbatamega muene.”
40 Walanduile guzuela nu gulongesa nu guabubila egi: “Dihuluisenu mu gindongo egi gia athu abola.”
41 Athu anyi atshiginyile mbimbi yenji nu gusuanguluga guagasue, abatijiwe. Mu lusugu luene athu* guvula 3 000 abuile alandudi.
42 Alanduile gudihana mu malongo a apostolo, nu gudibungisa hamoshi,* nu gudia nu gukombelela.
43 Athu agasue asendesele guvua woma. Apostolo asendesele gukalagala ndaga jiavula jia gushimana.
44 Athu agasue anyi abuile alandudi, adibungishile hamoshi; abungishile nji ima yawo yagasue hamoshi.
45 Akhalele musumbisa ima yawo nu mavu awo, akhalele muhana makuta gudi athu agasue gifua muakhalele nzala ya muthu nu muthu.
46 Lusugu nu lusugu, akhalele gudibungisa mu tempelo. Akhalele matangi amoshi, akhalele mudia mu jinzo jia gudisha, akhalele mukhapha ima yawo ya gudia nu gusuanguluga guagasue nu mutshima umoshi,
47 akhalele mutumbuisa Nzambi. Athu agasue akhalele guanemesa. Mu tangua diene, Yehowa wakhalele muhuluisa athu lusugu nu lusugu, akhalele mubua alandudi.
Mbimbi goshi'a diyiji
^ Nga “mu zuelelo dienji dia givadiwa.”
^ Yakotelesa egi, tangua dia thathu.
^ Nga “felela.”
^ Nga ndo yajiya gukhala egi, “wamujituluile mu ngonji jia gufua.”
^ Nga “gu phala yami.”
^ Mu Greke: “muila wami mbawulandula.”
^ Nga “Hadese,” yakotelesa egi fundo ana funda athu agasue. Tala Ukoteleshi wa Mbimbi.
^ Nga “gu phala yaye.”
^ Mu Greke: “muthu wazoga mu vumo dienji.”
^ Nga “Hadese,” yakotelesa egi fundo ana funda athu agasue. Tala Ukoteleshi wa Mbimbi.
^ Nga “mubola.”
^ Nga “guhana gua nyuma ya Nzambi.”
^ Nga “mionyo.”
^ Nga “gudihana ima.”
