Makalegelo a Apostolo 20:1-38
20 Tangua matululu ahuile, Phaula watamegele alandudi, waahanele gikhesa, wadilayele nawo, gungima wayile gu Maseduane.
2 Wabalegele mu membo a khanda jinyinyi, wakhalele muwambela aphangi mbimbi jiabonga ha guakolesa, gungima wahetele gu Grece.
3 Wasalele guene mbeji thathu. Uvi tangua diakhalele muene mutshigina gungina mu masuwa ha guya gu Siliya, enya Yuda amuyidile giphungi ha gumushiya. Hene wayidile mu njila ya gu Maseduane.
4 Wakhalele muwenda nu Sophatele mun’a Philuse wa gu Berea nu Aristarke nu Sekundo enya gu Tesalonike nu Gayuse wa gu Delebe nu Timote nu Tishike nu Telofime enya gu provense ya Azi.
5 Athu wawa adiangele guya, akhalele gutunenga gu Toloase.
6 Gungima dia Wano wa Mapha Ashigo nu Levire, tuanginyile mu masuwa gu Filiphi. Tuakalegele masugu thano mu njila, gungima tuaasangele gu Toloase. Tuatshitshile guene masugu sambadi.
7 Mu lusugu lua thomo lua phoso, tuadibungishile ha gudia. Phaula wawambelele aphangi egi mbawuya genji hamene. Hene, wakalegele diskur uu nu mukatshi dia phipha.
8 Mienda yavula yakhalele gu sugu ya gosa, fundo tuadibungishile.
9 Muvuala mumoshi wa yala jina dienji Etishe, wakhalele ha fenetre, wakhalele gu tulo tuakola tangua diakhalele mulongesa Phaula. Luholo Etishe wakhalele gu tulo, wakatugile gu etaje ya thathu, wabuile hashi, wafuile.
10 Uvi Phaula wabulumugile muphushi, wadimbile holu dienji, gungima wamuzudile ha mago. Wazuelele egi: “Bembenu gudila, yowu nu monyo.”
11 Phaula wavutugile gu etaje, wabatuile dipha, wasendesele gudia. Watele luko nawo maga matangua avula uu nu hatshiele gisugu. Gungima wayile genji.
12 Azudile mona wa yala muene, ayile n’enji. Akhalele nu gusuanguluga guavula handaga wakhalele nu monyo.
13 Tuayile fundo diakhalele masuwa, tuangiyine ha guya mu dimbo dia Asose, fundo tuakhalele naye guzula Phaula. Watuwambelele ha gutshita ngenyi handaga wayidile ha malu.
14 Tangua diahetele Phaula mu dimbo dia Asose, tuamuzanguile mu masuwa, tuayile gu Mitilene.
15 Mu lusugu lualanduile, tuakatugile guene tuahetele hehi nu hongo dia Shio. Hamene dienji tuayile gu Samose. Mu lusugu lualanduile, tuahetele gu Milete.
16 Phaula gatshiginyilego gungina mu dimbo dia Efeso hagula gabalegesago matangua avula mu provense ya Azi. Wabalegele muphushi handaga wakhalele mutshigina guheta gu Yelusalema mu lusugu lua Wano wa Pantekote.
17 Tangua diakhalele Phaula gu Milete, watumine athu ha gutamega akulu a mu hungu dia Efeso ha guza.
18 Tangua ahetele fundo diakhalele Phaula, waawambelele egi: “Enue mudi mujiya muabonga makalegelo ami sendese lusugu lua thomo ngahetele mu provense ya Azi.
19 Ngakalegele Fumu mudimo nu gudibulumuisa guagasue gifua muhiga. Ngamonele malamba avula, ngadidile nji handaga enya Yuda akhalele mukamba gungushiya.
20 Ngamilezele ndaga jiagasue jiajiya gumikuatesa.* Ngamisuegelego nga gima, ngamilongesele ha meso a athu agasue nu mu inzo nu inzo.
21 Uvi ngalongesele muavula enya Yuda nu enya Greke egi adi naye gubalumuna mitshima ha guvutuga gudi Nzambi nu gumonesa gutshigina gudi Fumi’etu Yesu.
22 Henyaha nyuma ya Nzambi idi gungutuma* ha guya gu Yelusalema, uvi ngushigo mujiya ndaga mbajingubuila guene.
23 Ngudi mujiya phamba egi mu membo agasue ngudi mubalega, nyuma ya Nzambi idi mulandula gunguwambela egi bologo nu malamba adi gungunenga.
24 Uvi nganago guzula monyo wami nu ndando yavula, hagula ngumanesele guzula phushi nu ngumanesele mudimo wanguhanele Fumu Yesu wa gulongesa muavula lukuma luabonga luatadila khenda jiavula jia Nzambi.
25 “Henyaha ngudi mujiya egi gushigo nga muthu mumoshi mukatshi dia athu ngalongesele Ufumu wa Nzambi mbawungumona luko.
26 Mangino ngamizula gifua matemue ami. Gula muthu mumoshi wafua, mahatshi enji ashigo ha muto wami,
27 handaga ngabembelego gumilongesa ndaga jiagasue jiatadila felela dia Nzambi.*
28 Dibambenu muabonga, bambenu nji imeme yagasue handaga nyuma ya Nzambi yamitombele ha gukhala atuameji, hagula mubambe muabonga hungu dia Nzambi diasumbile muene nu mahatshi a Mun’enji.
29 Ngudi mujiya egi gula ngaya gami, mbulu jiabala* mbajingina mukatshi dienu. Mbajishigo mukalegela imeme ndaga nu gisemo.
30 Athu ako mbazoga nji mukatshi dienu, mbalongesa ndaga jia mambo ha guhuiga alandudi hagula a alandule.
31 “Hene, kangulenu meso. Jiyenu nji egi ngakhalele mutemesa muthu wagasue mukatshi dienu nu masoji gu meso phipha nu muanya.
32 Henyaha ngamihana gudi Nzambi, ngamibembela nji mbimbi ya khenda jienji jiavula. Mbimbi yene yajiya gumikolesa nu gumikuatesa ha guheta ima yana hana Nzambi gudi athu atombele muene ha gubua athu a gijila.
33 Ngavilego nzala ya gima gia muthu, ikhale utadi wa siliva, wolo nga milele.
34 Mudi mujiya muabonga egi ngatshitshile mudimo nu mago ami ha guheta ima ngakhalele naye funu nu ya athu ngakhalele nawo.
35 Ngenyi ngamimonesele mu ndaga jiagasue egi mudi naye gutshita mudimo wakola ha gukuatesa athu aleba. Mudi naye nji guwunguluga* ndaga jiazuelele Fumu Yesu egi: ‘Muthu udi muhana wana khala nu gusuanguluga guavula gubalega muthu udi muzula.’”
36 Tangua diazuelele muene ndaga eji, afugamele mukut’awo agasue, akombelele.
37 Gungima mukut’awo agasue adidile mangololo. Akondegezele Phaula,* amuhanele beze nu gisemo giagasue.*
38 Avile gikenene giavula luholo Phaula waawambelele egi mbaashigo gumumona luko. Gungima ayile gumutuala uu nu ha fundo diakhalele masuwa.
Mbimbi goshi'a diyiji
^ Nga “mukunda nu gubonga guenu.”
^ Nga “idi gungushinjiga.”
^ Nga “malongo a Nzambi.”
^ Nga “jiadinga.”
^ Nga “guyabuluga.”
^ Mu Greke: “abuile ha phanga ya Phaula.”
^ Nga “nu guzumba guagasue.”
