Makalegelo a Apostolo 21:1-40
21 Tuadikhaphele nawo, tuanginyine mu masuwa, tuayile mbala imoshi gu Kose. Hamene dienji tuayile gu Lodese, gungima tuahetele gu Phatala.
2 Tuasangele masuwa akhalele muya gu Fenisia, tuanginyile mu masuwa ene, hene tuayile.
3 Tangua tuahetele hehi nu hongo dia Shiphele, tuabembele hongo diene gu koko gua mahidi,* tuayile gu khanda ya Siliya. Tuamaganele gu mbungu ya Tile handaga masuwa akhalele naye gubemba ima guene.
4 Tuakambele alandudi mu dimbo diene, tangua tuaamonele tuabalegesele masugu sambadi guene. Uvi mukunda nu ndaga yaawambelele nyuma ya Nzambi, atunyishile Phaula muavula egi gambigo kulu dienji gu Yelusalema.
5 Gungima dia masugu sambadi, tuakatugile tuasendesele guya. Uvi aphangi agasue nu akhetu nu ana ayile gututuala uu nu gonze ya dimbo. Tangua tuahetele gu mbungu, tuafugamele, tuakombelele.
6 Gungima tuadilayele nu aphangi, tuanginyine mu masuwa, uvi ene avutugile gumbo diawo.
7 Tuakatugile gu Tile, tuahetele gu Tolemayi. Tuamenegele aphangi guene, tuabalegesele nawo lusugu lumoshi.
8 Mu lusugu lualanduile, tuakatugile gu Tolemayi, tuahetele gu Sezalea. Tuayile mukhala gumbo dia Filipho. Filipho muene wakhalele mulongeshi, wakhalele nji mukatshi dia mala sambadi anyi apostolo atombele gu Yelusalema.
9 Filipho wakhalele nu ana a akhetu nguana akhalele khenji azudiwa galego mu ulo.* Akhalele muzuela ndaga jidi khenji jibua gale ndo.*
10 Tangua tuakalegele masugu avula guene, profete mumoshi jina dienji Agabo, wakatugile gu Yudea, wajile mubulumuga gudi esue.
11 Wajile fundo tuakhalele, wazudile mukaba wa Phaula, wadijitshigile gu mago nu gu malu. Wazuelele egi: “Nyuma ya Nzambi yazuela egi ‘Enya Yuda mbajitshiga fumi’a mukaba wuwu luholo lulu gu Yelusalema, gungima mbaamuhana ha mago a athu a ifutshi.’”
12 Tangua tuavile ndaga eji, esue nu athu ako akhalele hene tuasendesele gububila Phaula egi gayigo gu Yelusalema.
13 Uvi Phaula wazuelele egi: “Mukunda natshi mudi mudila? Mukunda natshi mudi mutshigina gungulebesa muila?* Jiyenu egi ngudi hehi ha gumona malamba nu ha gufua gu Yelusalema mukunda nu jina dia Fumu Yesu.”
14 Tuakhalelego luko nu luholo lua gumutunyisa,* hene tuabembele getu. Tuamuwambelele egi: “Gutshigina gua Yehowa gukalegewe.”
15 Gungima dia ndaga eji, tuadilondele, tuayile gu Yelusalema.
16 Alandudi ako a gu Sezalea ayile gututuala. Atubatele gumbo dia Menasona, muenya gu Shiphele, handaga guene tuakhalele naye gubanda. Menasona wakhalele mulandudi mumoshi wa mualeha.
17 Tangua tuahetele gu Yelusalema, aphangi atuyambele nu gusuanguluga guagasue.
18 Hamene dienji, tuayile nu Phaula gumbo dia Yakoba, akulu agasue akhalele guene.
19 Phaula waamenegele, wasendesele guawambela ndaga jiagasue jiamukuatesele Nzambi ha gutshita mu mudimo wenji gudi athu a ifutshi iko.
20 Tangua diavile ene ndaga eji, atumbuishile Nzambi, uvi amuwambelele egi: “Phangi, wamona nji egi gudi nji nu enya Yuda avula adi alandudi a Yesu. Mukut’awo agasue ana nemesa Mukhuala wa Moize.
21 Uvi avi gamba aye udi mulongesa enya Yuda agasue adi mukatshi dia athu a ifutshi iko egi atune mikhuala ya Moize, ambigo an’awo a mala gu mukanda nga gulandula shigu jinyi ana tumagela gale.
22 Henyaha tukalagala itshi? Handaga ene mbaajiya egi Phaula udi gale haha.
23 Tshita ndaga eyi tudi guguwambela: Tudi nu mala nguana adi mutshigina gutagenesa ndaga alayele* Nzambi.
24 Azangule uye udiphelegetese nawo gifua luholo mukhuala wa enya Yuda wana toga. Afutshile nji makuta hagula abunge sanga diawo. Ngenyi athu agasue mbajiya egi ndaga avuile mukunda nu aye jidi jia mambo, uvi aye udi nu makalegelo abonga, wana tumagela nji Mukhuala.
25 Uvi tuasonegele mukanda gudi athu a ifutshi iko anyi abuile alandudi a Yesu, ha guawambela desizio tuazudile egi adi naye gutuna ima yahanewe milambu gu isongo, nu mahatshi, nu shitu jiakamewe ha muminyo,* nu uthambi.”*
26 Mu lusugu lualanduile, Phaula wayile nu mala ene ha gudiphelegetesa nawo gifua luholo mukhuala wakhalele mutoga. Gungima, wanginyile mu tempelo ha guwambela athu tangua masugu a gudiphelegetesa mbaasuga, nu lusugu adi naye guhana milambu mukunda nu muthu wagasue mukatshi diawo.
27 Tangua masugu sambadi akhalele muheta gu gisugishilo, enya Yuda a gu Azi amonele Phaula mu tempelo. Atumile athu avula ha guzola matululu, gungima amukuatele.
28 Akhalele mukaluga egi: “Enya Isalele, izenu mutukuatese! Muthu yowu udi mulongesa athu a mu mafundo agasue ndaga jiabola mukunda nu akuaku’etu, nu mikhuala yetu, nu mukunda nu fundo edi dia gijila. Muene watshita diago gubola guakoma handaga udi munginyisa enya Greke mu tempelo, wasegulula diago fundo edi dia gijila.”
29 Azuelele ngenyi handaga adiangele gumona Phaula nu Telofime muenya gu Efeso muwenda mu dimbo. Hene atangijile egi Phaula wamunginyishile mu tempelo.
30 Dimbo diagasue diabuile nyiga-nyiga. Athu avula ajile muphushi, akuatele Phaula, ayile nu gumunana, amuzolele mu tempelo. Gungima akangele mifulo ya tempelo.
31 Tangua akhalele mukamba gushiya Phaula, athu ayile muwambela komanda wa masuta egi athu agasue gu Yelusalema abua tunga-tunga.
32 Mu tangua diene, komanda wazanguile masuta nu mafumu a masuta, abulumugile muphushi ha fundo diakhalele athu ene. Tangua athu amonele komanda nu masuta, abembele gubeta Phaula.
33 Komanda wasuenele hehi, wakuatele Phaula, wawambelele masuta ha gumujitshiga malenge mbadi. Gungima wahudile egi muthu owu udi nanyi? Wakalagala itshi?
34 Uvi athu akhalele mukaluguga, akhalele muzuela ima ya gudisha. Gudivua guakhalelego guene, hene komanda wa masuta gakoteleselego gishina akhalele mushila matululu. Wawambelele masuta ha guya nu Phaula gu inzo ya masuta.
35 Uvi tangua ahetele ha fundo athu akhalele mukanduga ha guya gu inzo ya masuta, masuta amubatele handaga athu akhalele mukamba gumutshita gubola.
36 Athu avula akhalele mulandula gungima, akhalele muzuela egi: “Mushiyenu.”
37 Tangua akhalele mutshigina gumunginyisa monzo ya masuta, Phaula wawambelele komanda egi: “Ngajiya guguwambela gima ba?” Muene wamuvutudile egi: “Aye wajiya zuelelo dia enya Greke ba?
38 Aye ushigo muenya gu Ejipitu watumile athu ha guzola nguma mu masugu abalega nu wakhalele mutuameza mbundudi 4 000 mu mavu a luselenga ba?”
39 Phaula wamuvutudile egi: “Ngudi muenya Yuda wa gu dimbo dia Talese gu khanda ya Silisia. Dimbo dietu diajiyiwa muabonga. Ngabuba nguhane njila ha guzuela nu athu awa.”
40 Fumu wa masuta wamuhuile njila ya guzuela, Phaula wamaganele ha fundo diakhalele mukanduga athu ha guya gu inzo ya masuta. Wathuphuile koko dienji ha guwambela athu ha guhena tedie. Tangua athu ahenele tedie, wawambelele mu zuelelo dia Hebelu egi:
Mbimbi goshi'a diyiji
^ Nga “mbungu ya ha sambua diko dia muta.”
^ Mu Greke: “khenji abungishile galego muila nu mala.”
^ Nga “profesi.”
^ Nga “mukunda natshi mudi mulebesa desizio diami?”
^ Mu Greke: “tuahenele tedie.”
^ Mu Greke: “adilogele gudi.”
^ Nga “shitu ya gudifuila; shitu yashiyiwe uvi mahatshi nu guzoga ndo; nga ndo shitu yashiyiwe uvi nu gubatuiwa ndo muminyo.”
^ Mu Greke: “Porneya.” Tala Ukoteleshi wa Mbimbi.
