Makalegelo a Apostolo 22:1-30
22 “Mala, aphangi nu atata, tegelelenu ndaga ngudi gumiwambela.”
2 Tangua avile egi Phaula wakhalele muzuela nawo mu zuelelo dia Hebelu, mukut’awo agasue ahenele tedie. Gungima Phaula wazuelele egi:
3 “Ngudi muenya Yuda, ngavalewe mu dimbo dia Talese mu mavu a Silisia, uvi Gamaliele wangulongesele mu dimbo edi. Angulongesele ha gunemesa muabonga diago ndaga jiagasue jia Mukhuala wa mambuta. Ngakhalele gudihana muavula mu mudimo wa Nzambi, gifua luholo mudi guyitshita mukut’enu agasue mangino.
4 Ngasagesele muavula athu akhalele mulandula Njila ya Fumu, ngakhalele guashiyisa. Ngajitshigile mala nu akhetu, ngaambile nji mu bologo.
5 Nganga-nzambi wakoma nu akulu agasue adi mujiya ndaga eyi muabonga. Anguhuile mikanda ha guya mukuata aphangi a gu Damase. Hene ngakhalele muya guene ha guakuata hagula nguze nawo a gujitshiga mu malenge gu Yelusalema hagula a ahane ndola.
6 “Uvi mu tangua dia midi ngahetele hehi nu dimbo dia Damase, sagumugu kiajiji giakoma giakatugile mu dilu, giajile ha fundo ngakhalele.
7 Ngabuile mu mavu, ngavile dijui gunguwambela egi: ‘Saula, Saula, mukunda natshi udi gungumonesa lamba?’
8 Ngazuelele egi: ‘Fumu, aye nanyi?’ Muene wanguwambelele egi: ‘Ame Yesu wa gu Nazaleta munu udi mumonesa lamba.’
9 Athu ngakhalele muya nawo amonele kiajiji, uvi avuilego dijui dia muthu ngakhalele muzuela n’enji.
10 Ngamuhudile egi: ‘Fumu, itshi ngudi naye gutshita?’ Fumu wanguwambelele egi: ‘Zuga, nda mu dimbo dia Damase, mbaaguwambela ndaga udi naye gukalagala.’
11 Uvi ngakhalelego mumona luko handaga kiajiji giakhalele giakola. Hene, athu ngakhalele muya nawo angukuatele gu koko, angutuamezele uu nu gu Damase.
12 “Guakhalele nu muthu mumoshi jina dienji Ananiase, wakhalele munemesa Mukhuala muabonga. Enya Yuda a mu dimbo diene akhalele muzuela ndaga jiabonga mukunda nu muene.
13 Wajile gungutala, wamaganele hehi nu ame, wanguwambelele egi: ‘Phangi Saula, meso aye akanguge!’ Mu tangua diene meso ami akangugile, ngamumonele.
14 Wanguwambelele egi: ‘Nzambi wa akhakh’etu wagutombi hagula ujiye gutshigina guenji, umone muthu watagana nu uvue dijui dienji,
15 handaga udi naye gulongesa athu agasue ndaga wamonele nu jinyi wavile.
16 Henyaha mukunda natshi udi mushipha? Zuga, nda ubatijiwe. Gula watamega jina dia Yesu, Nzambi mbawugutotesela gubola guaye.’
17 “Gungima ngavutugile gu Yelusalema. Tangua ngakhalele mukombelela mu tempelo, ngamonele vizio.
18 Ngamonele Fumu, wanguwambelele egi: ‘Zuga muphushi, katuga gatshididi gu Yelusalema, handaga ene mbaashigo mutshigina ndaga mbaawalongesa mukunda nu ame.’
19 Uvi ngamuwambelele egi: ‘Fumu, ene adi mujiya muabonga egi ngakhalele muya mu sinagoga ha gukuata athu ana gusha gutshigina gudi aye, ngakhalele guabeta nu guamba mu bologo.
20 Tangua akhalele mushiya muenya mudimo* waye Etiene, ngakhalele hene. Ngatshiginyile egi amushiye, ngabambele nji milele ya athu akhalele gumushiya.’
21 Uvi muene wanguwambelele egi: ‘Nda, handaga mbangugutuma gualeha gudi athu a ifutshi iko.’”
22 Hakhalele Phaula muzuela ndaga eji, athu akhalele gumutegelela. Gungima azuelele mu dijui diakola egi: “Muthu yowu atote ha mavu, gashigo naye gukhala nu monyo!”
23 Akhalele mukaluguga nu guhunga milele* yawo gosa. Akhalele nji mukuwa mavu gosa ha gutugumuna fuphi.
24 Komanda wawambelele masuta ha gunginyisa Phaula mu inzo ya masuta hagula amukhuphule fimbo. Ngenyi wajiya guzuela handaga wakhalele mutshigina gujiya diago gishina athu akhalele mushila matululu mukunda nu Phaula.
25 Uvi tangua amujitshigile hagula amubete, Phaula wahudile fumu wa masuta wakhalele wagumagana hene egi: “Mukhuala udi gumihana njila ya gubeta muenya Roma gula khenji mumusophesa* galego ba?”
26 Tangua diavile fumu wa masuta ngenyi, wayile muwambela komanda, wamuhudile egi: “Itshi udi mutshigina gutshita? Handaga muthu yowu udi muenya Roma.”
27 Komanda wayile mumona Phaula, wamuhudile egi: “Nguwambele, udi muenya Roma?” Muene wazuelele egi: “Ayi.”
28 Komanda wamuwambelele egi: “Ngafutshile mbongo jiavula ha gubua muenya Roma.” Uvi Phaula wamuwambelele gamba: “Ame ngudi muenya Roma wa givadiwa.”
29 Mu tangua diene, athu akhalele mutshigina gubeta Phaula akatugile muphushi ha fundo diakhalele muene. Komanda nji wavile woma tangua diajiyile muene egi Phaula wakhalele muenya Roma, handaga wamujitshigile malenge.
30 Mu lusugu lualanduile, komanda wakhalele mutshigina gujiya diago gishina enya Yuda akhalele mufundila Phaula. Hene, wamujituluile, wabungishile mafumu a nganga-nzambi nu enya Sanedrene agasue. Gungima wayile nu Phaula, wamumaganesele mukatshi diawo.
