Makalegelo a Apostolo 23:1-35
23 Phaula watalele enya Sanedrene nono, wazuelele egi: “Mala, aphangi, uu nu mangino mutshima wami udi waphelegeta gu meso a Nzambi.”
2 Mu tangua diene, nganga-nzambi wakoma Ananiase wawambelele athu akhalele hehi nu Phaula ha gumubeta gu kano.
3 Uvi Phaula wamuwambelele egi: “Muenya mambo,* Nzambi mbawugubeta. Aye wakhala haha ha gungusophesa gifua mudi muzuela Mukhuala. Uvi udi mushiya luko Mukhuala wene tangua udi mutuma athu ha gungubeta.”
4 Athu akhalele n’enji hehi azuelele egi: “Aye udi mushinga nganga-nzambi wakoma wa Nzambi?”
5 Phaula wazuelele egi: “Aphangi, ngajiyilego egi muene udi nganga-nzambi wakoma. Handaga mukanda wa Nzambi udi muzuela egi: ‘Ushigo naye guzuela ndaga jiabola mukunda nu fumu wa athu aye.’”
6 Phaula wakotelesele egi mukatshi dia enya Sanedrene guakhalele nu Asadoke nu Afalese. Hene, wazuelele mu dijui diakola egi: “Mala, aphangi, ngudi Mufalese, mun’a Mufalese. Adi gungusophesa handaga ngudi musha gutshigina egi athu a gufua mbaafuzumuga.”
7 Hazuelele muene ngenyi, giphapha giakola giazogele mukatshi dia Afalese nu Asadoke, adikhaphele.
8 Handaga Asadoke ana zuela egi gufuzumuga nu anjelo nu nyuma yakhalago guene. Uvi Afalese ana gutshigina* egi ima eyi yagasue yakhala guene.
9 Hene, mukut’awo agasue asendesele gusha matululu akola. Alongeshi ako a mikhuala anyi akhalele gu khanda ya Afalese azugile mu molu, asendesele gusha giphapha giakola. Azuelele egi: “Tushigo mumona nga gima gimoshi giabola giakalagala muthu yowu. Gubola gudi gui gula nyuma nga muanjelo wazuedi n’enji?”
10 Luholo akhalele mumana mangololo, komanda wavile woma egi ajiya gushiya Phaula. Hene, watumile masuta ha guya gumukatula mukatshi diawo ha guya n’enji gu inzo ya masuta.
11 Mu phipha ya lusugu lualanduile, Fumu wamaganele hehi nu Phaula, wamuwambelele egi: “Uvigo woma! Handaga luholo walongesa muavula ndaga jiami gu Yelusalema, udi naye nji gulongesa gu Roma.”
12 Mu gimenegena, enya Yuda ayile giphungi. Adilogele egi ajiyilego gudia nga gunua gula ashiyilego Phaula.
13 Athu ene adilogele akhalele gubalega 40.
14 Ayile mumona mafumu a nganga-nzambi nu akulu, a awambelele egi: “Mukut’etu agasue tuadilogi egi tuajiyilego gudia nga gima gula tuashiyilego Phaula.
15 Henyaha enue nu enya Sanedrene, wambelenu komanda ha guza n’enji gifua mudi mutshigina gutadila mulonga wenji muabonga. Uvi gutuama egi ahete fundo mudi, esue mbatumushiya.”
16 Uvi muehu wa Phaula wavile ndaga akhalele muzuela. Wayile gu inzo ya masuta ha guwambela Phaula ndaga yene.
17 Phaula watamegele fumu mumoshi wa masuta, wamuwambelele egi: “Nda nu muvuala yowu gudi komanda, handaga udi nu gima gia gumuleza.”
18 Fumu wa masuta wayile nu muvuala muene gudi komanda, wamuwambelele egi: “Phaula wangutamega, wanguwambela egi ngugubatele muvuala yowu, handaga udi nu gima gia guguleza.”
19 Komanda wamukuatele gu koko, wayile n’enji gu khanda, wamuhudile egi: “Itshi udi mutshigina gunguleza?”
20 Wamuwambelele egi: “Enya Yuda ayi giphungi ha gugutoga egi uye nu Phaula hamene gu Sanedrene, gifua adi mutshigina gutadila mulonga wenji muabonga.
21 Uvi utshiginago ndaga adi guguwambela handaga athu gubalega 40 adi gumubandemena mu njila. Adilogi egi ajiyilego gudia nga gunua gula amushiyilego. Adilondega gale, adi munengena phamba egi aye waahane njila.”
22 Komanda wamulezele egi: “Utelago nga muthu mumoshi lumene egi wanguwambela ndaga eyi.” Gungima, wamubembele ha guya.
23 Komanda watamegele mafumu a masuta mbadi, waawambelele egi: “Zangulenu masuta 200 nu awendeshi a tubalu 70 nu masuta 200 ana gulua nu milumbu, muye nawo gu Sezalea mu tangua dia 9 dia phipha.*
24 Londenu nji tubalu mukunda nu Phaula, hagula muye n’enji muabonga gudi guvelenele Felikse.”
25 Komanda wasonegele guvelenele Felikse mukanda egi:
26 “Ame Klode Lisiase, ngudi gugusonegela aye Fumu wakoma, guvelenele Felikse: Moyo waye!
27 Enya Yuda akuatele muthu yowu, akhalele mutshigina gumushiya. Uvi ngayile muphushi nu masuta ami ha gumuhuluisa, handaga ngavile egi udi muenya Roma.
28 Ngakhalele mutshigina gujiya gishina akhalele gumufundjila, hene ngayile n’enji gudi enya Sanedrene awo.
29 Ngakotelesele egi akhalele gumufunda mukunda nu Mikhuala yawo, uvi amoneselego nga ndaga imoshi yabola yatshitshile muene ajiya gumushiyila nga gumumba mu bologo.
30 Uvi anguwambela egi enya Yuda ayi giphungi ha gushiya muthu yowu, hene ngagutumila n’enji muphushi. Ngudi muwambela athu amufundji egi ene akhawo aguwambele gishina adi gumufundjila.”
31 Masuta azanguile Phaula gifua luholo luawambelele komanda, ayile n’enji mu phipha gudi Antiphase.
32 Hatshiele gisugu, masuta abembele awendeshi a tubalu ha guya n’enji, uvi ene avutugile gu inzo yawo.
33 Awendeshi a tubalu ahetele gu Sezalea, ahanele guvelenele mukanda, ahanele nji Phaula ha mago enji.
34 Guvelenele watangele mukanda wene, wahudile Phaula egi: Udi muenya gu provense itshi? Phaula wamuwambelele egi udi muenya gu Silisia.
35 Guvelenele wamuwambelele egi: “Mbangutadila mulonga waye muabonga gula athu agunfundjile aza.” Wawambelele masuta ha gubamba Phaula gu inzo ya Helode.
Mbimbi goshi'a diyiji
^ Nga “aye udi gifua gibayi gia mvindu giambiwa mukubu ulaphe.”
^ Nga “ana guzuela ha meso a athu agasue.”
^ Mu Greke: “mu tangua dia thathu.”
