Makalegelo a Apostolo 24:1-27
24 Gungima dia masugu atano, nganga-nzambi wakoma Ananiase wabulumugile nu akulu ako gu Sezalea nu muzueledi* mumoshi jina dienji Teletulu, ayile mufunda Phaula gudi guvelenele.
2 Tangua awambelele Teletulu ha guzuela, wasendesele gufunda Phaula egi:
“Guvelenele Felikse, aye wana gutukuatesa ha gukhala nu guhuima guavula. Gula ndaga jidi musombegesa mu gifutshi egi idi mukunda nu ndunge jiaye.
3 Mu mafundo agasue tuana guguhana mersi avula tangua diagasue mukunda nu ndaga eji.
4 Ngushi mutshigina ndo guguzula tangua diavula. Uvi mukunda nu mutshima waye wabonga, ngudi gugububila egi ututegelele hazonda.
5 Tudi mutshigina guguwambela egi yala yowu udi diago musageshi wakola, handaga udi muzola matululu mukatshi dia enya Yuda agasue ha mavu. Udi nji mutuameji wa gahunji ga enya Nazaleta.
6 Wakambi nji gusegulula tempelo hene tuamukuatshi.
7 ——
8 Gula wamusophesa, uza mumona hakhaye egi ndaga jiagasue tudi gumufundila jidi jia giamatshidia.”
9 Enya Yuda nji atshiginyile egi ndaga jiakhalele muzuela Teletulu jiakhalele jia giamatshidia.
10 Guvelenele wawambelele Phaula ha guzuela. Phaula wazuelele egi:
“Ngudi mujiya muabonga egi aye udi nzuji wa gifutshi egi sendese mualeha. Hene ngudi nu gusuanguluga ha guzuela.
11 Masugu 12 khenji abalega galego sendese ngayile gu Yelusalema ha gukombelela. Gula watshigina gujiya ndaga yene muabonga, hula athu aguwambele.
12 Angusangelego musha giphapha nu muthu mumoshi mu tempelo, nga gutuma athu avula ha guzola matululu mu sinagoga nga mu dimbo.
13 Aguwambele muthu wangumonyi mukalagala ndaga jidi ene mungufundila luenyelu.
14 Ndaga ngudi mujiya gutuama diaye yenyeyi: ngana gukalegela Nzambi wa akhakh’etu mudimo wa gijila mu gudivua nu ndaga adi mutamega ene egi gahungu gazonda. Ngana gusha nji gutshigina mu ndaga jiagasue jidi muzuela Mukhuala nu jinyi jiasonegele Baprofete.
15 Ngudi nu felela gudi Nzambi gifua mudi nadio athu awa egi athu abonga nu athu abola mbaafuzumuga.
16 Gishina giene, ngana gutshita ngolo tangua diagasue ha gukhala nu mutshima waphelegeta* gu meso a Nzambi nu gudi athu.
17 Ivo yavula yabalega gale sendese ngakatugile gu Yelusalema, hene ngavutuga ha guhana makuta hagula akuatese akuaku’ami nu ha guhana Nzambi milambu.
18 Tangua ngakhalele mutshita ndaga eji, angusangele gudiphelegetesa mu tempelo gifua muana zuela mukhuala. Uvi ngabungishilego athu avula nga guzola matululu. Enya Yuda ako a mu provense ya Azi akhalele nji guene.
19 Gula nga amonele ndaga yabola ngatshitshile, nga ajile gale gungufunda gudi aye.
20 Nga ndo, hula athu awa adi haha aguwambele, tangua enya Sanedrene angusophesele gubola gutshi angumonele nago.
21 Ene ajiya gungufunda phamba mukunda nu ndaga yiyi ngazuelele mu dijui diakola tangua ngakhalele gutuama dia enya Sanedrene egi: ‘Adi gungusophesa handaga ngudi musha gutshigina egi athu a gufua mbaafuzumuga!’”
22 Uvi Felikse wakhalele mujiya muabonga ndaga yatadila Njila ya Fumu, hene waawambelele egi: “Mbangutadila mulonga wenu muabonga gula komanda Lisiase waza.”
23 Gungima wawambelele fumu wa masuta egi Phaula asale mu bologo, uvi amuhane njila ha gutshita ndaga jiko nu atunyisago mafut’enji ha guza gumukuatesa nu ima adi nayo funu.
24 Gungima dia masugu azonda, Felikse wajile nu mukaji’enji Delusila. Mukhetu muene wakhalele muenya Yuda. Watumile athu ha gutamega Phaula, wamutegelele tangua diakhalele muene muzuelela ndaga jiatadila gusha gutshigina gudi Klisto Yesu.
25 Uvi hasendesele guzuelela Phaula luholo lua gutshita ndaga jiabonga nu lua gumonesa khadilo dia gudikanda nu usopheshi udi muza, Felikse wavile woma, wazuelele egi: “Henyaha wajiya guya gaye, mbangugutamega lusugu luko gula ngaheta tangua.”
26 Felikse wakhalele mutamega Phaula mbala jiavula ha guta n’enji maga handaga wakhalele mutangiza egi wajiya gumuhana mbongo.
27 Gungima dia ivo mbadi, Pholekiyo Fesituse wahinganele guvelenele Felikse. Uvi Felikse wabembele Phaula mu bologo handaga wakhalele mutshigina gusuanguluisa enya Yuda.
