Makalegelo a Apostolo 25:1-27
25 Fesituse wahetele mu provense ya Yudea, wasendesele guhinyina. Gungima dia masugu thathu, wakatugile gu Sezalea, wakandugile gu Yelusalema.
2 Mafumu a nganga-nzambi nu manene a enya Yuda ayile mufunda Phaula gudi Fesituse. Asendesele gumububila
3 ha gutuma Phaula gu Yelusalema. Uvi akhalele nu matangi a gumubandemena mu njila hagula amushiye.
4 Uvi Fesituse waavutudile egi Phaula udi naye gukhala mu bologo gu Sezalea, gualeha ndo ame nji ngudi muvutuga guene.
5 Wazuelele luko egi: “Gula muamonyi egi Phaula wakalagala mulonga wabola, mafumu enu aze tuye nawo gu Sezalea hagula amufunde.”
6 Fesituse wakalegele masugu 8 nga 10 gu Yelusalema. Gungima wabulumugile gu Sezalea; hamene dienji wakhalele ha fundo dia gusophesela milonga, watumile athu ha guza nu Phaula.
7 Tangua dianginyile Phaula, enya Yuda anyi akatugile gu Yelusalema amujietele. Amufundile mu ndaga jiavula jiakola, uvi akhalelego nu luholo lua gumonesa gula ndaga jiene jidi jia giamatshidia.
8 Phaula wazuelele egi: “Ngashiyilego Mukhuala wa enya Yuda, ngatshitshilego ndaga yabola mukunda nu tempelo nga mukunda nu Sezale.”
9 Fesituse wakhalele mutshigina gusuanguluisa enya Yuda, hene wahudile Phaula egi: “Watshigina gukanduga gu Yelusalema hagula agusophese gutuama diami mukunda nu ndaga eji adi gugufundila ba?”
10 Uvi Phaula wazuelele egi: “Ngudi gutuama dia tribinale ya Sezale, fundo ngudi naye gusophesewa. Aye hakhaye udi mujiya muabonga egi ngatshitshilego gami enya Yuda nga ndaga imoshi yabola.
11 Gula ngudi diago mutshitshi wa ndaga jiabola nu ngakalagala ndaga idi mutoga egi ngushiyiwe, ngushigo mulenga gufua. Uvi gula ndaga jidi gungufundila athu awa jishigo jia giamatshidia, gushigo nu muthu wajiya gunguhana ha mago awo ha guasuanguluisa. Ngudi mutoga egi mulonga wami uye gudi Sezale!”
12 Fesituse nu ngambi jienji ayile giphungi, gungima awambelele Phaula egi: “Aye watoga egi mulonga waye uye gudi Sezale; mbawuya gudi Sezale.”
13 Gungima dia masugu azonda, fumu Agripa nu Belenise ajile gu Sezalea ha gutala Fesituse.
14 Abalegesele masugu avula guene. Hene, Fesituse watele fumu lumene lua Phaula, wamuwambelele egi:
“Felikse wabembele muthu mumoshi mu bologo.
15 Tangua ngakhalele gu Yelusalema, mafumu a nganga-nzambi nu akulu a enya Yuda amufundile gudi ame. Akhalele gungutoga egi ngumufuise milonga.
16 Uvi ngaalezele egi enya Roma akhalago nu khadilo dia guhana muthu ha mago a athu amufundji hagula a asuanguluise. Uvi muthu muene udi naye thomo gudimona nu athu amufundji hagula asophe nawo.
17 Tangua diajile ene haha, ngashiphilego. Mu lusugu lualanduile, ngakhalele ha fundo dia gusophesela milonga, ngatumine athu ha guza nu yala muene.
18 Athu amufundjile ajile, uvi amoneselego nga ndaga imoshi yabola yatshitshile muthu muene gifua luholo ngakhalele mutangiza.
19 Akhalele musha n’enji giphapha mukunda nu ndaga jia gikombelelo giawo nu mukunda nu muthu mumoshi ngenyi jina dienji Yesu, wafile gale uvi Phaula udi muzuela egi udi nu monyo.
20 Ngakhalelego mumona luholo lua gubatula mulonga wene, hene ngamutogele gula watshigina egi aye gu Yelusalema hagula amusophese mukunda nu mulonga wene.
21 Uvi Phaula watogi egi asale mu bologo ha gunenga tangua Sezale* mbawukoka mulonga wenji. Hene ngawambela fumu wa masuta ha gumubamba mu bologo uu nu tangua mbangumutuma gudi Sezale.”
22 Fumu Agripa wawambelele Fesituse egi: “Ngudi mutshigina gutegelela nji muthu muene.” Fesituse wamuvutudile egi: “Mbawumutegelela hamene.”
23 Hamene dienji, Agripa nu Belenise ajile nu lulendo luagasue, anginyile mu tribinale nu bakomanda a masuta nu manene a dimbo. Gungima, Fesituse watumine athu ha guza nu Phaula.
24 Fesituse wazuelele egi: “Fumu Agripa nu athu agasue mudi haha, mudi mumona muthu yowu. Enya Yuda agasue a gu Yelusalema nu a mu dimbo edi angutogele mu dijui diakola egi udi naye gushiyiwa.
25 Uvi ngamonelego nga ndaga imoshi yabola yatshitshile muene idi mutoga egi ashiyiwe. Tangua muene hakhenji wangutogi egi mulonga wenji uye gudi Sezale, ngatshigina egi aye guene.
26 Uvi ngushigo mumona diago ndaga ngajiya gusonegela Fumu mukunda nu muthu yowu. Gishina giene ngamuzola gutuama dienu agasue nu gutuama diaye Fumu Agripa. Ngenyi gula muamusophesa, ngajiya guheta gima gia gusonegela Fumu.
27 Handaga ngudi mumona egi ishigo ndaga yabonga ha gutuma muenya bologo gu Roma, uvi gumonesa ndo ndaga adi gumufundjila.”
Mbimbi goshi'a diyiji
^ Jina dia Sezale didi titre akhalele muhana fumu wakoma wa enya Roma, dishigo jina dia muthu ndo.
