Makalegelo a Apostolo 26:1-32
26 Agripa wawambelele Phaula egi: “Nguleze, mukunda natshi adi gugufunda?” Gungima Phaula wasunuine koko, wazuelele egi:
2 “Fumu Agripa, mangino ngudi nu gusuanguluga ha guzuela gutuama diaye ndaga jiagasue jidi gungufundjila enya Yuda,
3 handaga aye wana jiya muabonga mishambo yagasue ya enya Yuda nu ndaga jiana zola giphapha mukatshi diawo, hene ngudi gugububila ha gungutegelela muabonga.
4 “Yadiago, athu a mu gifutshi giami nu enya Yuda agasue a gu Yelusalema angujiya muabonga sendese ulenge wami.
5 Gula atshigina, ajiya guguwambela egi ngakhalele Mufalese. Afalese ana khala nu mikhuala yakola gubalega ya enya Yuda ako mu ndaga yatadila gukombelela.
6 Uvi mangino adi gungusophesa handaga ngana gudifelela mu ndaga Nzambi walayele akhakh’etu.
7 Iphuta yetu 12 yana kalegela Nzambi mudimo wa gijila phipha nu muanya, handaga ene nji ana gudifelela ha gumona tangua ndaga jiene mbajitagenesewa. Fumu Agripa, enya Yuda adi gungufunda mukunda nu felela edi.
8 “Mukunda natshi mudi mutuna egi Nzambi wana gufuzumuna athu a gufua?
9 Thomo ngakhalele mutangiza egi ngudi naye gutshita yagasue ha guluisa jina dia Yesu wa gu Nazaleta.
10 Ngatshitshile ngenyi gu Yelusalema. Mafumu a nganga-nzambi anguhuile njila ha gukuata athu avula a gijila nu ha guamba mu bologo. Tangua akhalele mukamba guashiya, ngakhalele nji mutshigina.
11 Ngakhalele muya mu sinagoga jiagasue ha guahana ndola. Ngakhalele guatunyisa gu ngolo egi ashigo gutshigina gudi Klisto. Ngakhalele nji guavila khabu jiakola, hene ngakhalele muya uu nu mu membo ako ha guasagesa.
12 “Lusugu lumoshi ngakhalele muya gu Damase handaga mafumu a nganga-nzambi anguhanele njila ha guya mukuata alandudi guene.
13 Fumu, tangua ngakhalele muya mu njila, mu tangua dia midi ngamonele kiajiji mukatuga mu dilu, giakhalele muhenya gifua tangua. Giajile ha fundo ngakhalele nu athu tuakhalele muya nawo.
14 Mukut’etu agasue tuabuile hashi. Ngavuile dijui munguwambela mu zuelelo dia Hebelu egi: ‘Saula, Saula, mukunda natshi udi gungumonesa lamba? Aye hakhaye udi gudihana lamba luholo udi gudikuma tangua diagasue gu mutshi wa sungu-sungu.’*
15 Uvi ngamuhudile egi: ‘Fumu, aye nanyi?’ Muene wazuelele egi: ‘Ame Yesu munu aye udi mumonesa lamba.
16 Henyaha zuga, magana mu molu. Ngamonega gudi aye ha gugutomba hagula ukhale muenya mudimo wami nu uwambele athu ndaga eji wamona nu jinyi mbanguguwambela.
17 Mbanguguhuluisa ha mago a athu awa nu mu ifutshi ngudi gugutuma ha guya.
18 Ngudi gugutuma ha guya guakangula meso hagula akatuge mu phipha aze mu muanya. Akatuge mu uhinyinyi wa Satana, aze gudi Nzambi. Ngenyi gula asha gutshigina gudi ame, Nzambi mbawatotesela gubola guawo, mbawakuatesa nu mbawabuisa athu a gijila gifua luholo luana tshita muene mukunda nu akombeledi enji ako agujinginyina.’
19 “Fumu Agripa, ngatunyilego gutumagela vizio inyi yakatugile mu dilu,
20 uvi ngayile thomo mulongesa enya gu Damase, gungima ngayile gu Yelusalema. Ngayile nji mu membo agasue a gu Yudea nu gudi athu a ifutshi iko. Ngakhalele gualongesa egi abalumune mitshima yawo, avutuge gudi Nzambi, atshite nji ndaga jidi mumonesa egi abalumuna mitshima.
21 Gishina giene enya Yuda angukuatele mu tempelo, akambele gungushiya.
22 Uvi Nzambi wangukuatesele ha gulandula gulongesa lukuma luabonga uu nu mangino gudi athu a lutumbu nu athu a githuhu. Ngana longesa phamba egi ndaga jiasonegele Baprofete nu Moize jiakhalele naye gutagenesewa. Ndaga jiene jidi muzuela egi
23 Klisto mbawumona malamba nu mbawukhala muthu wa thomo ha gufuzumuga mu gufua. Ngenyi, muene mbawulongesa enya Yuda nu athu a ifutshi nu mbawahana muanya.”
24 Hakhalele Phaula muzuela ndaga eji, Fesituse wazuelele mu dijui diakola egi: “Phaula, aye na wasaluga! Gujiya ndaga jiavula guagubuisa gifua muenya malui!”
25 Uvi Phaula wamuwambelele egi: “Fumu Fesituse, ngushigo muenya malui. Ndaga ngudi muzuela jidi jia giamatshidia, ngudi nji mutangiza muabonga.
26 Ndaga ya giamatshidia idi egi fumu ngudi mutela lumene elu udi mujiya ndaga eji muabonga, hene ngudi muzuela woma ndo. Ngudi mujiya luko egi gushigo nga ndaga imoshi idi ya gisuegi gu meso a fumu, handaga muene udi gujijiya muabonga.
27 Fumu Agripa, wana gusha gutshigina mu ndaga jiazuelele Baprofete ba? Ngudi mujiya egi wana gusha gutshigina.”
28 Agripa wawambelele Phaula egi: “Gualeha ndo udi gungutshiginyisa ha gubua Muklisto.”
29 Phaula wamuwambelele egi: “Ngudi mutoga Nzambi egi gungima dia matangua azonda nga dia matangua avula, aye nu athu agasue mudi gungutegelela mangino, mubue Aklisto gifua ame. Uvi ngushi mutshigina ndo egi mumbiwe malenge gifua ame.”
30 Gungima fumu Agripa nu guvelenele nu Belenise nu athu agasue akhalele nawo azugile.
31 Tangua akhalele muya, asendesele guzuela egi: “Muthu yowu gatshitshilego nga ndaga imoshi yabola idi mutoga egi ashiyiwe nga ambiwe mu bologo.”
32 Agripa wawambelele Fesituse egi: “Gula nga muthu yowu gatogelego egi aye gudi Sezale, nga tuamubembi.”
Mbimbi goshi'a diyiji
^ Mu tangua dikulu, akhalele mukalegela mutshi wa sungu-sungu ha gutuameza shitu.
