Makalegelo a Apostolo 27:1-44
27 Tangua azuelele egi tudi naye guya gu Italiya mu masuwa, ahanele Phaula nu enya bologo ako ha mago a fumu mumoshi wa masuta, jina dienji Yuliuse. Yuliuse wakhalele mumoshi mukatshi dia masuta a Ogiste.
2 Tuanginyile mu masuwa akatugile gu Adalamite. Masuwa ene akhalele naye gubalegela gu mbungu jiavula jia gu khanda ya provense ya Azi. Tuayile nu Aristarke, muenya gu Maseduane wa mu dimbo dia Tesalonike.
3 Mu lusugu lualanduile tuahetele gu Sidona. Yuliuse wavidile Phaula khenda* hene wamuhanele njila ha guya gudi mafuta enji hagula amukuatese.
4 Tuakatugile gu Sidona, tuabalegele hehi nu hongo dia Shiphele, handaga funji yakhalele muza gutuama dietu.
5 Tuabalegele ha katshi na katshi dia kianga hehi nu Silisia nu Phamfilia. Gungima tuahetele gu bungu dia Mila ya gu Lisia.
6 Fumu wa masuta wamonele masuwa akatugile gu Alekisandeliya akhalele muya gu Italiya, watunginyishile mu masuwa ene.
7 Gungima dia masugu avula, tuahetele gu Kinide mu lamba handaga tuakhalele muya mage-mage. Funji yakhalele muza gutuama dietu yakhalele gutukanga njila ha guwenda muabonga. Hene tuabalegele gu Salamone hehi nu Krete hagula tudibambe.
8 Tuamonele lamba ha gubalegela mu khulo ya kianga, uvi gungima tuahetele ha fundo dimoshi diana tamegewa egi Mbungu Jiabonga, didi hehi nu dimbo dia Lase.
9 Tuashiphile ha fundo diene, yakhalele nji lamba ha guwenda mu muta handaga funji yakhalele yakola. Lusugu lua Gutotesela Gubola lunu athu akhalele mutuna gudia ha gukombelela luakhalele nji luabalega gale. Hene Phaula wahanele matangi,
10 wazuelele egi : “Mala, ngudi mumona egi njila eyi tudi muya mbayitubatela malamba avula, mbatutotesa ima yavula nu masuwa nu mionyo yetu.”
11 Uvi fumu wa masuta wavile mbimbi yazuelele kapitene ga masuwa nu fumi’a masuwa. Watunyile genji ndaga yazuelele Phaula.
12 Mbungu yene yakhalelego yabonga ha gubalegesa sungi ya guhuma. Hene athu avula azuelele egi akatuge ha fundo diene hagula ajiya guheta gu mbungu ya Fenisia ha gubalegesa sungi ya guhuma guene. Mbungu ya Fenisia idi mbungu ya enya Krete yana tala gu khanda ya thunda nu gu khanda ya mbongo.
13 Tangua muhehe wa gu khanda ya thunda wasendesele gubunda mage-mege, atangijile egi mbaheta muabonga ha fundo akhalele muya. Hene, athuphuile longo, asendesele guya hehi nu gonze ya Krete.
14 Nu dishimbu ndo, funji yakola* yakatugile gu khanda ya thunda yasendesele gubunda ha hongo dia Krete.
15 Luholo funji yakola yakhalele mubunda masuwa, tuakhalelego nu luholo lua guya gutuama. Hene tuabembele egi ituhungumune.
16 Tuayile ha gahongo gamoshi gazonda gana tamegewa egi Kauda hagula tudibambe. Tuamonele lamba ha gujitulula gawato gazonda* gakhalele gagujitshiga gungima dia masuwa.
17 Tangua anginyishile gawato gene mu masuwa, azanguile jingonji, ajitshigile masuwa. Luholo akhalele muvua woma egi masuwa ajiya gukuatagana mu gishegele ha Siletise,* abulumuine ima yana wendesa masuwa, abembele egi funji yaahungumune.
18 Mu lusugu lualanduile, asendesele gubishila ima mu muta ha gukatula ginemo mu masuwa handaga funji yakhalele guanyigisa mangololo.
19 Mu lusugu lua thathu, abishidile ima iko ya guwendesela masuwa.
20 Masugu avula abalegele, tuakhalelego mumona tangua nga themua. Funji yakola yakhalele nji gutunyigisa, hene tuakhalelego luko gudifelela egi tuajiya guhuluga.
21 Mukut’awo agasue akalegele masugu avula anago gudia nga gima. Phaula wazugile mu molu, wazuelele egi: “Aphangi, nga muavuile ndaga ngamiwambelele egi tunginyigo mu masuwa ha gukatuga gu Krete, nga muamonelego malamba awa agasue nu gutotesa ima.
22 Henyaha ngudi gumiwambela egi khalenu nu gikhesa handaga gushigo nga muthu mumoshi mukatshi dienu mbawufua, uvi phamba masuwa mbaatota.
23 Mu phipha ya mangino, muanjelo wa Nzambi ngana gukombelela nu ngana kalegela mudimo wa gijila wamagana hehi nu ame.
24 Wanguwambela egi: ‘Phaula, uvigo woma. Udi naye gumagana gutuama dia Sezale! Nzambi mbawuguhuluisa nu athu agasue mudi nawo mu masuwa.’
25 Mala, muvigo woma handaga ngudi musha gutshigina gudi Nzambi egi mbawukalagala ndaga gifua luholo muanjelo wanguwambela.
26 Uvi, mbatumukuatagana gu hongo dimoshi ngenyi.”
27 Funji yatuhungumuine mu kianga gia Adeliya masugu 14 nu phipha 14. Mukatshi dia phipha, ba matelo asendesele gumona egi tudi gale musuena hehi nu mavu.
28 Azanguile gima gianema, agijitshigile shinga, agimbile mu kianga. Amonele egi hama hene hakhalele guleha 36 metre. Asuenele ndambo gutuama, ambile luko gima giene mu meya, amonele egi hama hene hakhalele 27 metre.
29 Akhalele muvua woma egi wato wajiya gudikuma mu maseso, hene azolele malongo 4, a ambile mu meya gungima dia masuwa. Akhalele mutshigina egi guma gutshie gatshididi.
30 Bamatelo atuluile gawato gazonda mu meya, akhalele mutshigina gulenga, uvi ambile mambo egi tudi mumba malongo gu muto wa masuwa.
31 Phaula wawambelele fumu wa masuta nu masuta egi: “Gula athu awa azoga mu masuwa, enue mbamushigo muhuluga.”
32 Hene, masuta abatuile shinga jia gawato gene, agabembele ha gubulumuga mu meya.
33 Gutuama egi guma gutshie, Phaula waabubidile mukut’awo agasue egi: “Zangulenu ima mudie, handaga masugu 14 abalega gale, muana gunengena nu gikenene giagasue nu muanago gudia nga gima.
34 Ngudi gumibubila ha gudia, idi mukunda nu gubonga guenu. Handaga gushigo nga muthu mumoshi mukatshi dienu mbawutotesa nga sanga dimoshi dia muto wenji.”
35 Hazuelele muene ngenyi, wazanguile dipha, wahanele Nzambi mersi gutuama dia athu agasue, gungima wabatuile dipha diene, wasendesele gudia.
36 Hene mukut’awo agasue ahetele ngolo, asendesele nji gudia.
37 Tuakhalele athu 276 mu masuwa.
38 Adile nu akutshile. Gungima abishidile ble mu meya ha gukatula ginemo mu masuwa.
39 Hatshiele gisugu, bamatelo amonele mavu, uvi ajiyilego egi akhalele mavu. Amonele nji gishegele giakhalele gu khulo ya muta. Azuelele egi gula luholo ludi guene, amaganese masuwa hene.
40 Abatuile ngonji jiakhalele mukuata malongo, a abembele ha guya mu meya. Gungima ajituluile shinga jiakhalele mukuata khayi. Akangudile nji milele ya masuwa hagula muhehe waatuameze. Asendesele guya gonze.
41 Ahetele ha fundo dimoshi diakhalele nu gishegele* giavula moshi’a meya, akumile masuwa gu gishegele giene. Muto wa masuwa wakuategene mangololo mu gishegele, wadinyigishilego. Uvi mbunda ya masuwa yabogogele itshinyi-itshinyi mu matshipha-tshipha.
42 Masuta atshiginyile gushiya enya bologo hagula nga mumoshi gayigo nu guzua ha gulenga.
43 Uvi fumu wa masuta wakhalele mutshigina guhuluisa Phaula, hene watunyishile masuta ha gushiya enya bologo. Wawambelele athu akhalele mujiya guzua egi abue mu muta aye nu guzua azoge athu a thomo gonze.
44 Uvi athu ako aye holu dia mabaya nga dia itshinyi ya masuwa. Gishina giene mukut’awo agasue azogele nu monyo gonze.
Mbimbi goshi'a diyiji
^ Nga “wamumonesele gisemo.”
^ Funji yene yana tamegewa egi Elokilone.
^ Gawato gazonda ana kalegela ha guhuluisa athu gula masuwa abunduga.
^ Tala Ukoteleshi wa Mbimbi.
^ Nga “lusenga.”
