Makalegelo a Apostolo 28:1-31
28 Tangua tuazogele gonze, atuwambelele egi hongo diene diana tamegewa egi Malete.
2 Athu a gu hongo diene* atuvidile khenda jiavula diago. Atuyambele muabonga, ahagele tshuya handaga mvula yakhalele munoga, guma guakhalele nji guahuma.
3 Uvi Phaula watshiayele gitungu gia khunyi, wagimbile ha tshuya. Vambu diazogele mukunda nu muzuza wa tshuya, diamujinginyine gu koko.
4 Tangua athu a gu hongo diene amonele nyoga yabala muzenzelela gu koko dia Phaula, asendesele gudiwambela egi: “Yadiago yala yowu udi mushiyi wa athu, wahulugile mu muta, uvi Muthu Wana Guvutula Gubola mu Gubola* gashigo gumuhana njila ha gukhala nu monyo.”
5 Uvi Phaula wanyigishile koko, vambu diene diabuile ha tshuya. Gavuilego nga gubala.
6 Akhalele munengena egi koko dienji dijimbe nga ndo abue mbala imoshi afue. Uvi anengenele matangua avula, amonelego nga gima gimoshi giabola giamubuidile. Hene asombegesele matangi awo, asendesele guzuela egi muthu yowu udi nzambi.
7 Fundo diene diakhalele hehi nu mahia a fumi’a hongo, jina dienji Phibeliuse. Watuyambele muabonga gumbo dienji, tuabandele guene masugu thathu.
8 Sh’a Phibeliuse wakhalele wagubanda ha gitanda handaga wakhalele nu fievre nu wakhalele mukata ginyete. Phaula wayile gumutala, wakombelele, wamuhagele mago nu wamusagele.
9 Gungima dia ndaga eyi, athu ako a hongo diene anyi akhalele nu misongo asendesele guza gudi Phaula, wakhalele guasaga.
10 Atunemesele, atuhuile ima yavula ya khenda. Tangua tuanginyine mu masuwa ha guya, atuhuile ima yagasue tuakhalele nayo funu.
11 Tuakalegele mbeji thathu ha hongo diene. Gungima tuanginyile mu masuwa amoshi akatugile gu Alekisandeliya, akhalele nu gisongo gutuama. Gisongo giene giakhalele giagusonega egi “Ana a Zeuse.” Masuwa ene amaganele ha hongo ha gubalegesa sungi ya guhuma.
12 Tuamaganele ha mbungu ya Silakuse, tuatshitshile masugu thathu hene.
13 Tuakatugile ha mbungu ya Silakuse, tuakondomogele tuahetele gu Legio. Hamene dienji funji yakola yakatugile gu khanda ya sud, yatubundjile. Mu lusugu lua mbadi tuahetele gu Phuzole.
14 Tuasangele aphangi guene, atububidile egi tukhale nawo masugu sambadi. Gungima tuanginyine mu masuwa, tuayile gu Roma.
15 Tangua aphangi a gu Roma avile egi tuakhalele muza, ajile uu nu ha zando* dia Aphiwuse ha fundo diana tamegewa egi Jinzo Thathu* ha gututagana. Tangua diaamonele Phaula, wahanele Nzambi mersi nu wahetele ngolo.
16 Gungima, tuahetele gu Roma. Ahanele Phaula njila ha gukhala mu inzo yenji hakhenji, amuhuile nji suta mumoshi ha gumubamba.
17 Gungima dia masugu thathu, Phaula watamegele manene a enya Yuda. Tangua adibungishile, waawambelele egi: “Mala, aphangi, ngakalegelego athu nga ndaga imoshi yabola. Ngashiyilego nji mikhuala ya akhakh’etu. Uvi angumbile mu bologo gu Yelusalema, anguhanele nji ha mago a enya Roma.
18 Tangua angusophesele, atshiginyile gungubemba, handaga amonelego nga ndaga imoshi yabola yakhalele mutoga egi ngushiyiwe.
19 Uvi luholo enya Yuda akhalele mutuna, ngatogele egi mulonga wami uye gudi Sezale. Uvi ngatogelego ha guza gudi Sezale ha gufunda enya gifutshi giami.
20 Gishina giene ngamitamega ha gumimona nu ha guta n’enu maga, handaga angujitshiga malenge awa mukunda nu felela dia enya Isalele.”
21 Ene amuwambelele egi: “Aphangi a gu Yudea atusonegelego mikanda mukunda nu aye. Gushigo nga nu phangi mumoshi wakatugile guene ha guza gututela lumene luaye nga guzuela ndaga yabola mukunda nu aye.
22 Uvi tuatshigina egi aye hakhaye utuwambele ndaga udi mutangiza, handaga tudi mujiya egi mu mafundo agasue athu adi muzuela ndaga jiabola mukunda nu gahunji gaga.”
23 Adivile lusugu mbaadimona luko. Mu lusugu luene, ajile luko avula gumbo dia Phaula. Phaula wakhalele guakotelesela nu gualongesa muabonga ndaga yatadila Ufumu wa Nzambi sendese mu gimenegena uu nu mu ngueze. Waalongesele nji ndaga jiazuelele Mukhuala wa Moize nu jiasonegele Baprofete ha guakuatesa hagula ashe gutshigina gudi Yesu.
24 Athu ako atshiginyile ndaga jiazuelele muene, uvi ako atunyile gawo.
25 Luholo akhalelego gudivua, asendesele guya gawo. Phaula wazuelele egi:
“Gishina giene nyuma ya Nzambi yawambelele akhakh’enu mu njila ya profete Yeshaya
26 egi: ‘Nda uwambele athu wawa egi: “Mbamutegelela, uvi mbamushigo mukotelesa nga gima. Mbamutala, uvi mbamushigo mumona nga gima.
27 Handaga mitshima ya athu awa yakolele gale, ene ashitshile gale matshui awo nu abategele* gale meso awo hagula amonyigo nga hazonda nu meso awo, avigo nga hazonda nu matshui awo, akotelesago nga hazonda nu mitshima yawo nu hagula avutugago gudi ame hagula nguasage.”’
28 Jiyenu egi lukuma elu ludi muhuluisa luakatuga gudi Nzambi mbalulongesewa gudi athu a ifutshi iko; ene mbaalutshigina diago.”
29 ——
30 Phaula wasalele guene ivo mbadi mu inzo yakhalele muene mufutshila. Wakhalele muyamba muabonga athu agasue akhalele muza gumutala.
31 Wakhalele gualongesa Ufumu wa Nzambi nu ndaga jiatadila Fumu Yesu Klisto. Wakhalele mulongesa nu gikhesa giagasue* nu guakhalelego nga muthu mumoshi wakhalele gumukanga njila.
Mbimbi goshi'a diyiji
^ Nga “athu a zuelelo diko.”
^ Nga ‘Nduedi.’ Mu Greke: Dike, yajiya gukhala egi nzambi wakhalele muhana athu ndola gula akalagala gubola, nga ndo, yajiya gukhala egi nduedi.
^ Nga “kisalo.”
^ Nga “fundo athu akhalele musumba ima ha gudia nu ha guhuluguga.”
^ Nga “akangele.”
^ Nga “wakhalele mulongesa woma ndo.”
