Makalegelo a Apostolo 3:1-26
3 Lusugu lumoshi, Phetelo nu Yone akhalele muya gu tempelo mu tangua dia gukombelela. Yakhalele mu tangua dia thathu gungima dia midi.*
2 Lusugu nu lusugu athu akhalele muya nu yala mumoshi wavalewe gikata,* akhalele gumuhaga hehi nu mufulo wa tempelo wakhalele mutamegewa egi Wabonga, hagula atoge makuta gudi athu akhalele mungina mu tempelo.
3 Tangua muthu muene wamonele Phetelo nu Yone mutshigina gungina mu tempelo, wasendesele guatoga makuta.
4 Uvi Phetelo nu Yone amutalele nono, Phetelo wamuwambelele egi: “Tutale gugu.”
5 Muthu muene waatalele, wakhalele gudifelela egi adi gumuhana gima gimoshi.
6 Uvi Phetelo wazuelele egi: “Ngushigo nu utadi wa siliva nga wolo wa guguhana, uvi ngudi guguhana eyi ngudi nayo. Mu jina dia Yesu Klisto wa gu Nazaleta, wenda!”
7 Wamukuatele gu koko dia madia, wamuzugishile. Mu tangua diene malu enji akolele;
8 wazugile, wasendesele guwenda, wanginyine nawo mu tempelo. Wakhalele muwenda nu guthenyiga* nu gutumbuisa Nzambi.
9 Athu agasue amumonele muwenda nu wakhalele mutumbuisa Nzambi.
10 Amujiyile hene azuelele egi, muthu yowu muene wakhalele mukhala ha mufulo wa tempelo wana tamegewa egi Mufulo Wabonga, ha gutoga athu makuta. Akhalele mushimana muavula nu gudihula luholo muthu muene wasagewe.
11 Hakhalele muthu muene mujinginyina Phetelo nu Yone, athu avula adibungishile nawo ha fundo diakhalele mutamegewa egi Mbalanda ya Solomo, akhalele gudihula muavula.
12 Hamonele Phetelo ndaga yene, wawambelele athu egi: “Enue enya gu Isalele, itshi mudi gudihudila mukunda nu ndaga eyi? Mukunda natshi mudi gututala nono gifua tuakuatesa muthu ha guwenda mu ngolo jietu, nga mukunda nu gudihana guetu gudi Nzambi?
13 Nzambi wa Abalahama nu Isaka nu Yakoba, Nzambi wa akhakh’etu, watumbuishile muenya mudimo wenji Yesu, yonu muatunyile nu muahanele ha mago a Philato, ikhale Philato wakambele ha gumubemba.
14 Enue muatunyine muthu wa gijila, muthu wabonga, muatogele egi amizolele muthu wana shiya athu,
15 muashiyile Muthu watombewe ha guhana athu monyo.* Uvi Nzambi wamufuzumuine mu gufua; esue tudi mathemua a ndaga eyi.
16 Muthu yowu mudi mumona nu mudi mujiya, wasagewa mu jina dia Yesu nu mu gutshigina guetu tudi nago mu jina dienji. Gutshigina tudi nago gudi Yesu, guene guasagi muthu yowu mudi mumona wagumagana gutuama dienu agasue.
17 Aphangi, ngudi mujiya egi muakhalelego mujiya ndaga muakhalele mukalagala; mafumu enu nji akhalelego mujiya.
18 Uvi Nzambi wabembele egi ndaga eji jikalegewe ha gutagenesa ndaga jiadiangele guzuela muene mu njila ya baprofete agasue egi, Klisto udi naye gumona lamba.
19 “Balumunenu mitshima yenu, sombegesenu makalegelo enu* hagula gubola guenu gutotesewe. Ngenyi Yehowa hakhenji* mbawumihana sungi jia guhuima,
20 hagula atume Klisto watombewe mukunda nu enue, yakotelesa egi Yesu.
21 Dilu didi naye gubamba Yesu uu nu tangua dia guvutula luko ndaga jiagasue luholo jiakhalele thomo, gifua muazuelele Nzambi mu njila ya baprofete enji a gijila a mu tangua dikulu.
22 Moize wazuelele egi: ‘Yehowa Nzambi wenu mbawumizolela profete mumoshi gifua ame mukatshi dia aphangi’enu. Mudi naye gutegelela yagasue mbayimiwambela muene.’
23 Muthu* wagasue mbawutuna gutegelela Profete muene, mbawushiyiwa, mbawutota mukatshi dia athu.
24 Baprofete agasue, sendese gudi Samuele uu nu anyi agasue ajile gungima dienji, anyi azuelele, amonesele nji haphelo ndaga jiatadila masugu awa.
25 Enue mudi ana a baprofete nu a gikotelo giakotele Nzambi nu akhakh’enu, hawambelele muene Abalahama egi: ‘Iphuta yagasue ya ha mavu mbayisuanguluishiwa mu njila ya ajigulu* aye.’
26 Nzambi wazolele Muenya Mudimo wenji, wamutumine thomo gudi enue ha gumishimbiga, luholo akatudile muthu wagasue mukatshi dienu mu makalegelo enji abola.”
Mbimbi goshi'a diyiji
^ Yakotelesa egi mu kumbi dia 9.
^ Nga “kikalaba.”
^ Nga “nu kutshiphuka.”
^ Nga “muashiyile Mutuameji wa Monyo.”
^ Mu Greke: “balumugenu.”
^ Mu Greke: “gu phala ya Yehowa.”
^ Nga “monyo.”
^ Mu Greke: “vungu.”
