Makalegelo a Apostolo 4:1-37
4 Tangua diakhalele ene muyadi muzuela nu athu, nganga-nzambi nu mubambi wa tempelo nu Asadoke ajile gudi ene.
2 Akhalele nu khabu handaga apostolo akhalele mulongesa athu nu akhalele guawambela haphelo egi Yesu wafuzumugile mu gufua.*
3 Hene a akuatele, a ambile mu bologo uu nu mu lusugu lualanduile handaga ngueze yakhalele yabui gale.
4 Uvi athu avula ategelele diskur diene, ashile gutshigina, athu adivudishile, abuile 5 000.
5 Mu lusugu lualanduile, mafumu nu malemba nu alongeshi a mikhuala adibungishile gu Yelusalema,
6 hamoshi nu nganga-nzambi Ana nu Kayifa nu Yone nu Alekisandele nu athu agasue a giphuta gia nganga-nzambi.
7 Ahagele Phetelo nu Yone mukatshi diawo, a ahudile egi: “Mu ngolo jia nanyi, nga ndo mu jina dia nanyi muakalagala ndaga eyi?”
8 Phetelo wakhalele waguzala nu nyuma ya Nzambi, waawambelele egi:
“Mafumu a athu nu malemba,
9 gula mangino atusophesa mukunda nu ndaga yabonga tuakalagala gudi muthu wakhalele gikata,* gula enue nji mudi mutshigina gujiya nanyi wamusagi,
10 mukut’enu agasue nu athu agasue a gu Isalele, jiyenu egi muthu yowu wamagana gu tuama dienu nu ngolo, wasagewa mu jina dia Yesu Klisto wa gu Nazaleta munu muakhokhele ha mutshi uvi Nzambi wamufuzumuine mu gufua.
11 Yesu muene udi ‘seso enue atungi muamonele gifua dishigo nu ndando uvi diabuile seso dia thomo dia ha khomo.’
12 Gushigo nji nu muthu muko wajiya gutuhuluisa, handaga gushigo nu jina diko ha mavu diahanele Nzambi mukatshi dia athu ha gutuhuluisa.”
13 Tangua amonele luholo Phetelo nu Yone akhalele muzuela woma ndo,* nu tangua ajiyile egi anginyilego khalasa* nu akhalele athu a githuhu, adihudile muavula; akotelesele egi athu ene muyadi akhalele mukhala nu Yesu.
14 Uvi luholo amonele yala wasagewe mumagana nawo, akhalelego nga nu gima gimoshi gia guzuela.
15 A awambelele ha guzoga mu inzo ya enya Sanedrene, gungima asalele ha guya giphungi.
16 Azuelele egi: “Itshi tudi naye gukalagala athu awa? Handaga akalagala ndaga ya gushimana, ndaga yene yajiyiwa gudi athu agasue a gu Yelusalema, tushigo nu luholo lua guyituna.
17 Hagula ndaga eyi ijiyiwago gudi athu agasue, tuavuisenu woma, tuatunyisenu egi awambelago nga muthu mumoshi ndaga mu jina edi.”
18 A atamegele, a awambelele egi ashigo naye guzuela nga ndaga imoshi nga gulongesa mu jina dia Yesu.
19 Uvi Phetelo nu Yone a awambelele egi: “Gula idi ndaga yabonga gu meso a Nzambi ha gumitegelela enue hafundo dia gutegelela Nzambi, enue hakhenu batulenu milonga.
20 Uvi esue tuajiyilego gubemba guzuela ndaga tuamonele nu jinyi tuavile.”
21 A avishile woma, gungima a abembele handaga amonelego nga ndaga imoshi yabola ya guahanela ndola. Akhalele nji muvua woma wa athu handaga athu agasue akhalele mutumbuisa Nzambi mukunda nu ndaga yakalegele ene.
22 Muthu wasagewe mu luholo lua gushimana, wakhalele nu ivo gubalega 40.
23 Tangua a abembele, Phetelo nu Yone ayile musanga alandudi ako, a alezele ndaga jiagasue jiaawambelele mafumu a nganga-nzambi nu akulu.
24 Havile ene ndaga eji, mukut’awo agasue akombelele Nzambi mu dizui diakola egi:
“Fumu Wabalega Gukoma, aye wafugile dilu nu mavu nu kianga nu ima yagasue idi muene,
25 mu njila ya nyuma yaye, wawambelele khakh’etu Davidi, muenya mudimo waye egi: ‘Mukunda natshi ifutshi yabua tunga-tunga? Mukunda natshi athu adi mutangiza ndaga jia gituhu?
26 Mafumu a ha mavu amagana, ahinyinyi adibungisa hamoshi ha guluisa Yehowa nu ha guluisa muthu wambile muene maji mu nyuma.’*
27 Handaga Helode nu Ponse Philato nu athu a ifutshi iko nu enya Isalele adibungisa hamoshi mu dimbo edi ha guluisa Yesu, muenya mudimo waye wa gijila wambile maji mu nyuma.
28 Adibungisa ha gutshita ndaga wadiangele guzuela mu ngolo nu mu gutshigina guaye.
29 Henyaha Yehowa, tala muabonga luholo ene adi gutusagesa. Kuatesa ahiga aye hagula alandule gulongesa mbimbi yaye woma ndo,
30 hawudi musununa koko diaye ha gusaga nu ha gukalagala ndaga jia gushimana mu jina dia Yesu, muenya mudimo waye wa gijila.”
31 Hamanesele ene gukombelela,* fundo adibungishile diadinyigishile mangololo, mukut’awo agasue azalele nu nyuma ya Nzambi, nu asendesele gulongesa mbimbi ya Nzambi woma ndo.
32 Alandudi agasue avula akhalele mutshima umoshi, matangi amoshi.* Gushigo nga mumoshi mukatshi diawo wakhalele muzuela egi ima ngudi nayo idi yami hakhami. Uvi akhalele guyibungisa fundo dimoshi.
33 Apostolo alanduile gulongesa nu ngolo jiavula ndaga yatadila gufuzumuga gua Fumu Yesu. Nzambi wakhalele guakuatesa muavula diago.
34 Gushigo nga muthu mumoshi mukatshi diawo wakhalele nu lamba dia ima handaga athu agasue anyi akhalele nu mahia nu jinzo akhalele gujisumbisa, akhalele muza nu mbongo jia ima asumbishile,
35 akhalele gujihaga mu malu a apostolo, akhalele gujikhapha. Muthu wagasue wakhalele muzula gifua muakhalele nzala yenji.
36 Yozefe munu apostolo akhalele mutamega egi Barnabase (yakotelesa egi “Muthu Wana Hana Athu ako Ngolo”), muenya giphuta gia Levi, wa gu dimbo dia Shiphele,
37 wakhalele nu gitshinyi gia mavu, wagisumbishile, wajile nu mbongo wajihagele mu malu a apostolo.
Mbimbi goshi'a diyiji
^ Nga “akhalele mulongesa gufuzumuga gua Yesu.”
^ Nga “kikalaba.”
^ Nga “nu gikhesa.”
^ Nga “alongugilego muavula.” Yakotelesa egi alongugilego makhalasa a ba Rabi. Uvi ishigo mukotelesa egi akhalelego mujiya gutanga nga gusonega.
^ Nga “ha guluisa Klisto wenji.”
^ Nga “gukombelela muavula.”
^ Mu Greke: “monyo umoshi.” Tala Ukoteleshi wa Mbimbi.
