Makalegelo a Apostolo 5:1-42
5 Uvi guakhalele nu yala mumoshi jina dienji Ananiase, nu mukaji’enji Safila. Asumbishile gitshinyi giawo gia mavu.
2 Ananiase wakatudile ndambo ya makuta mu gisuegi, mukaji’enji wakhalele nji mujiya. Wayile nu ndambo iko, wayihagele mu malu a apostolo.
3 Uvi Phetelo wamuwambelele egi: “Ananiase, mukunda natshi wabemba egi Satana agutume ha gudimba nyuma ya Nzambi, nu ha gusuega ndambo iko ya makuta wasumbisa mavu aye?
4 Gutuama egi usumbise mavu ene, akhalelego aye ba? Gungima dia guasumbisa, wakhalelego naye gukalegela makuta aye luholo watshigina ba? Mukunda natshi watangiza ndaga ya luholo elu mu mutshima waye? Wadimbilego athu uvi wadimbi Nzambi.”
5 Tangua diavile Ananiase mbimbi eji, wabuile hashi, wafile. Athu agasue avile ndaga eyi, avile woma wavula.
6 Gungima mavuala a mala azugile, amulangele milele, ayile gumufunda.
7 Matangua thathu gungima, mukaji’enji wajile; uvi gakhalelego mujiya ndaga yabuile.
8 Phetelo wamuhudile egi: “Nguwambele, makuta agasue muasumbisa mavu enyawa ba?” Muene wamuvutudile egi: “Ayi enyawa.”
9 Phetelo wamuwambelele egi: “Mukunda natshi muadivi ha guhuiga nyuma ya Yehowa? Tala, athu ayi mufunda mulumi’aye adi gale ha mufulo, adi muya gugubata nji nu aye.”
10 Mu tangua diene, wabuile mu malu a Phetelo, wafile. Tangua mavuala a mala anginyile, amusangele wa gufua. Ayile n’enji, amufundile hehi nu mulumi’enji.
11 Hungu diagasue nu athu agasue avile ndaga eyi, avile woma wavula.
12 Apostolo alanduile gukalagala ndaga jiavula jia gushimana mukatshi dia athu. Mukut’awo agasue akhalele gudibungisa mu Mbalanda ya Solomo.
13 Yadiago, gushigo nga muthu mumoshi wakhalele nu ngolo jia gudibungisa nawo. Uvi athu agasue akhalele muzuela ndaga jiabonga mukunda nu ene.
14 Athu akhalele musha gutshigina gudi Fumu akhalele gudivudisa, akhalele avula mala nu akhetu.
15 Akhalele muzola enya misongo mu njila jiakoma jia dimbo, akhalele guabandesa ha itanda yazonda, hagula gula Phetelo wabalega, givule-vule gienji gikuate athu ako mukatshi diawo.
16 Athu avula akhalele nji mukatuga mu membo akhalele hehi nu Yelusalema, akhalele muza nu enya misongo nu athu akhalele musagesewa gudi nyuma jiabola, mukut’awo agasue asagewe.
17 Uvi nganga-nzambi wakoma nu athu agasue anyi akhalele n’enji, enya gahunji ga Asadoke, azugile mu molu, avile giphi giakola.
18 Akuatele apostolo, a ambile mu bologo dia mu dimbo.
19 Uvi mu phipha muanjelo wa Yehowa wakangudile mifulo ya bologo, waazolele hanze, waawambelele egi:
20 “Ndenu mu tempelo, landulenu guwambela athu ndaga jiagasue jiatadila monyo wuwu.”
21 Havile ene ndaga eyi, anginyine mu tempelo mu gimenegena gia mutshiatshia, asendesele gulongesa.
Uvi tangua diajile nganga-nzambi wakoma nu athu ako akhalele n’enji, atamegene enya Sanedrene nu manene agasue a enya Isalele. Atumine maphulushi ha guya muzola apostolo mu bologo ha guza nawo gutuama diawo.
22 Uvi tangua diahetele maphulushi guene, asangelego apostolo mu bologo. Avutugile ha guwambela athu a atumine
23 egi: “Tuasanga bologo diagukanga muabonga diago, abambi nji akhala agumagana ha mifulo, uvi tangua tuakangula, tuasangelego nga muthu mukatshi.”
24 Tangua gaphita ga abambi a tempelo, nu mafumu a nganga-nzambi avile ndaga eji, abuile tunga-tunga; adihudile gula ndaga itshi mbayibua.
25 Uvi muthu mumoshi wajile guawambela egi: “Athu anyi muambile mu bologo, adi mu tempelo, adi mulongesa athu.”
26 Hene gaphita gayile nu maphulushi enji, akuatele apostolo ajile nawo. Uvi a asageselego handaga akhalele muvua woma egi athu ajiya guasonona maseso.
27 Ajile nawo gutuama dia enya Sanedrene. Nganga-nzambi wakoma waahudile
28 egi: “Tuamitunyishile mangololo egi mulongesago luko mu jina didi, uvi enue muazalesa Yelusalema nu malongo enu; mudi mukamba nji gutuhagela mahatshi a muthu yowu ha mito yetu.”
29 Uvi Phetelo nu apostolo ako azuelele egi: “Tudi naye gutumagela Nzambi* uvi athu ndo.
30 Nzambi wa akhakh’etu wafuzumuine Yesu, yago muashiyile tangua muamukhokhele ha mutshi.
31 Nzambi wamukanduishile gu koko dienji dia madia gifua Mutuameji nu Muhuluishi, ha gukuatesa enya gu Isalele ha gubalumuna mitshima nu hagula gubola guawo gutotesewe.
32 Tuamonele ndaga eji; nyuma ya Nzambi yana hana muene gudi athu ana gumutumagela, yatukuatesele ha guzuelela ndaga eji.”
33 Havile ene ndaga eji, avile khabu jiakola, atshiginyile guashiya.
34 Uvi Mufalese mumoshi, jina dienji Gamaliele wazugile mu molu mu Sanedrene; wakhalele mulongeshi wa Mikhuala; athu agasue akhalele gumunemesa muavula; waawambelele ha guleza athu egi azoge gale ndambo hanze.
35 Gungima, waawambelele gamba: “Enue enya Isalele, temenu gu ndaga mudi mutshigina gukalagala athu awa.
36 Ha gufezegesa, mu masugu abalega, Teudasa wakhalele muzuela egi udi muthu wa ndando. Athu 400 adibungishile gu khanda yenji, uvi gungima washiyiwe. Athu agasue akhalele gumulandula alengele nu atotele.
37 Gungima dienji, mu sungi ya gusonegesa majina, Yudasa wa gu Galilea nji wazogele. Watumine athu avula ha gumulandula; uvi muene nji washiyiwe, athu agasue akhalele gumulandula amuanganele.
38 Uvi mukunda nu ndaga eyi, ngudi gumiwambela egi mudinginyisago mu ndaga jia athu awa, abembenu. Handaga gula ndaga eji nga midimo adi mukalagala idi ya athu, mbayidi mubola.
39 Uvi gula idi ya Nzambi, mbamushigo guabuisa. Gula ndo mbamumonega gifua mudi muluisa Nzambi.”
40 Atshiginyine mbimbi yenji, hene atamegele apostolo, a abetele, a atunyishile ha guzuela luko mu jina dia Yesu, gungima a abembele ha guya.
41 Azogele gutuama dia Sanedrene nu gusuanguluga guagasue, handaga Nzambi waamonele egi akhalele athu atagana luholo a aseguluile mukunda nu jina dia Yesu.
42 Lusugu nu lusugu, alanduile gulongesa nu gumuanga lukuma luabonga luatadila Klisto Yesu mu tempelo nu mu inzo nu inzo.
Mbimbi goshi'a diyiji
^ Mu Greke: “gutumagela Nzambi gifua fumu.”
