Makalegelo a Apostolo 6:1-15
6 Mu masugu ene, alandudi akhalele gudivudisa. Enya Yuda anyi akhalele muzuela Greke akhalele munyemena* enya Yuda anyi akhalele muzuela Hebelu, handaga tangua akhalele mukhapha ima lusugu nu lusugu, akhalelego muhana akhetu awo a gafunda ima akhalele naye guheta.
2 Hene apostolo 12 abungishile alandudi avula, a awambelele egi: ”Ishigo yatagana egi* tubembe mbimbi ya Nzambi ha guya mukhaphela athu ima ya gudia.
3 Aphangi, tombenu mala sambadi* mukatshi dienu, anyi adi nu makalegelo abonga, adi aguzala nu nyuma nu ndunge hagula tuahane ginemo egi gia ndando.
4 Uvi esue mbatudihana ha gukombelela Nzambi nu ha gulongesa mbimbi yenji.”
5 Alandudi agasue asuangulugile mukunda nu ndaga yene. Hene atombele Etiene, yonu wakhalele nu gutshigina guakola nu waguzala nu nyuma ya Nzambi. Atombele nji Filipho nu Pholokole, nu Nikanola nu Timone, nu Phalemena nu Nikola wa gu Antiokia, yonu watshiginyile malongo a enya Yuda.
6 Ayile nawo gudi apostolo, apostolo alombele Nzambi mukunda nu ene, gungima a ahagele mago.
7 Hene, mbimbi ya Nzambi yalandudile gulongesewa muagasue, athu avula a gu Yelusalema akhalele mubua alandudi; nganga-nzambi jiavula jiakhalele mutshigina lukuma luabonga.
8 Nzambi wakhalele mutshigina Etiene muavula. Wamuhuile nji ngolo jia gukalagala ndaga jia gushimana nu ijiyishilo yakoma mukatshi dia athu.
9 Uvi enya Sinagoga ana tamegewa egi Athu Akudiwe mu Uhiga nu enya Silene nu enya Alekisandeliya nu enya Silisia nu enya gu Azi, ajile ha gusha giphapha* nu Etiene.
10 Uvi amubingilego mukunda nu ndunge jienji nu nyuma yakhalele gumukuatesa tangua diakhalele muene muzuela.
11 Awambelele athu mu gisuegi ha guzuela egi: “Tuamuvi mushingana Moize nu Nzambi.”
12 Ashinjigile athu nu malemba nu alongeshi a mikhuala. Ajile mu gisagumuisa, amukuatele gu ngolo, ayile n’enji gudi enya Sanedrene.
13 Atamegele mathemua a mambo, azuelele egi: “Yala yowu udi mulandula guzuela ndaga jiabola mukunda nu fundo edi dia gijila nu mukunda nu Mukhuala.
14 Tuamuvi muzuela egi Yesu yowu ya gu Nazaleta mbawumuanga fundo edi dia gijila, mbawusombegesa nji mikhuala yatuhanele Moize.”
15 Athu agasue akhalele mu Sanedrene akhalele mutala Etiene nono, amonele egi phala yenji yakhalele gifua ya muanjelo.
Mbimbi goshi'a diyiji
^ Nga “akhalele mubogutshila.”
^ Mu Greke: “Ishigo gutusuanguluisa egi.”
^ Nga “mala sambadi anyi adi nu lukuma luabonga.”
^ Nga “kumba maya.”
