Makalegelo a Apostolo 7:1-60
7 Uvi nganga-nzambi wakoma wamuhudile egi: “Ndaga jidi ngenyi ba?”
2 Etiene wavutudile egi: “Mala, aphangi nu atata, ngutegelelenu: Nzambi wa lutumbu wamonegele gudi khakh’etu Abalahama tangua diakhalele muene gu Mezopotamiya, gutuama egi aye mukhala mu dimbo dia Halana.
3 Wamuwambelele egi: ‘Katuga mu gifutshi giaye, bemba enya fami yaye, nda mu gifutshi ginyi mbangugudijiga.’
4 Abalahama wakatugile mu gifutshi gia enya Kaldea, wayile mukhala mu dimbo dia Halana. Hafile sh’enji, Nzambi wamuwambelele ha guza mukhala mu mavu awa mudi enue mangino.
5 Uvi mu tangua diene, Nzambi gamuhanelego nga gima gimoshi mu gifutshi egi, gamuhuilego nga ga gitshinyi gazonda ga mavu ga gudiata; wamulayele egi mbawumuhana gifutshi egi. Mu tangua diene gakhalelego nu mona, uvi wamulayele egi mbawuhana nji gifutshi giene gudi ajigulu* enji.
6 Nzambi wamuwambelele luko egi ajigulu* enji mbaabua ngenji mu gifutshi giangane. Enya gifutshi giene mbaabuisa ahiga nu mbaamonesa lamba* ivo 400.
7 Nzambi wazuelele egi: ‘Mbangusophesa gifutshi ginyi mbagiabuisa ahiga, gungima mbaazoga, mbaangukalegela mudimo wa gijila ha fundo edi.’
8 “Wakotele n’enji luko gikotelo gia gumba ana a mala gu mukanda, gungima Abalahama wavualele Isaka. Hataganesele muene masugu nage, wamumbile gu mukanda. Isaka wavualele* Yakoba, Yakoba wavualele mafumu a iphuta* 12.
9 Mafumu a iphuta avidile Yozefe giphi, hene amusumbishile gu Ejipitu. Uvi Nzambi wakhalele nu Yozefe,
10 wamuhuluishile mu malamba enji agasue. Wamuhuile ndunge nu wamukuatesele hagula Farao fumu wa gu Ejipitu amutshigine. Farao wamutombele ha gutuameza gifutshi gia Ejipitu nu inzo yenji yagasue.
11 Uvi nzala yanginyine mu gifutshi giagasue gia Ejipitu nu gu Kanana. Yakhalele lamba diakola diago, handaga akhakh’etu akhalelego nga nu gima gia gudia.
12 Uvi havile Yakoba egi gudi nu ima ya gudia* gu Ejipitu, watumine akhakh’etu mbala ya thomo.
13 Mbala ya mbadi, Yozefe wadijiyishile gudi aphangi’enji a mala, gungima Farao wavile lumene lua enya fami ya Yozefe.
14 Yozefe watumine mbimbi ha gutamega sh’enji Yakoba nu enya fami yenji agasue. Mukut’awo agasue* akhalele 75.
15 Yakoba wabulumugile gu Ejipitu, guene afidile. Akhakh’etu nji afuidile guene.
16 Ayile nu ifuwa yawo gu dimbo dia Shekeme, ayihagele mu malumba asumbile Abalahama nu makuta enji gudi ana a Hamole gu dimbo dia Shekeme.
17 “Hakhalele musuena sungi yakhalele naye gutagenesewa ndaga jialayele Nzambi gudi Abalahama, enya Isalele abuile avula gu Ejipitu.
18 Gungima, fumu muko wasendesele guhinyina gifutshi gia Ejipitu, gakhalelego mujiya Yozefe.
19 Fumu yowu wakadigidile enya giphuta gietu ndaga nu ndunge jiabola, watumile akhakh’etu gu ngolo ha gubemba an’awo a gitebe hagula afue.
20 Moize wavalewe mu tangua diene, wakhalele wabonga gu meso a Nzambi. Wasasewe mbeji thathu mu inzo ya sh’enji.
21 Uvi tangua amubembele, mun’a Farao wa mukhetu wamuzanguile, wamusasele gifua mun’enji.
22 Anginyishile Moize makhalasa abonga a enya Ejipitu. Moize wakhalele muenya ngolo mu mbimbi jienji nu mu makalegelo enji.
23 “Hatagenesele muene ivo 40, wavuile uhote* wa guya mutala aphangi’enji, enya Isalele.
24 Wamonele muenya Ejipitu mumoshi musagesa phangi’enji wa muenya Isalele, wanginyile ha guluila phangi’enji, washiyile muenya Ejipitu.
25 Moize watangijile egi aphangi’enji mbaakotelesa egi Nzambi wamutumile ha guahuluisa, uvi ene akoteleselego.
26 Mu lusugu lualanduile, wamonele aphangi’enji muyadi a enya Isalele mudiluisa, waakuatesele ha gudivua nu ha gukamba guhuima mukatshi diawo. Waawambelele egi: ‘Mala, mudi aphangi. Mukunda natshi mudi gudiluisa giwa?’
27 Uvi muenya Isalele munu wakhalele muluisa muko walutuile Moize, wamuwambelele egi: ‘Nanyi waguhagi fumu nga nzuji mukatshi dietu?
28 Udi mutshigina gungushiya gifua luholo washiyi muenya Ejipitu hamene ba?’
29 Havuile Moize ngenyi, walengele, wayile gu Madiana, wabuile ngenji guene, wavalele ana a mala mbadi guene.
30 “Ivo 40 gungima, muanjelo wa Nzambi wamonegele gudi muene mu mavu a luselenga, gu mulundu wa Sinayi, mu dimi dia tshuya dia gamutshi gakhalele mulema.
31 Tangua diamonele Moize ndaga yene, wadihudile. Wasuenele hehi ha gutala muabonga, uvi mu tangua diene wavile dijui dia Yehowa muzuela egi:
32 ‘Ngudi Nzambi wa akhakh’enu, Nzambi wa Abalahama, wa Isaka nu wa Yakoba.’ Moize wasendesele gudigita, gakambelego luko gutala ndaga yene muabonga.
33 Yehowa wamuwambelele egi: ‘Katula jisaphata jiaye gu malu, handaga fundo udi mumagana didi mavu a gijila.
34 Ngamona diago lamba dia athu ami adi gu Ejipitu, ngavua gudila guawo hene ngabulumuga hagula nguaahuluise. Henyaha tala, ngudi gugutuma gu Ejipitu.’
35 Moize yowu muene enya Isalele atunyile egi: ‘Nanyi waguhagi fumu nga nzuji mukatshi dietu?’ Uvi Nzambi wamutumine ha gubua fumu nu muhuluishi wawo mu njila ya muanjelo wamonegele gudi muene mu gamutshi gakhalele mulema tshuya.
36 Muene waazolele gu Ejipitu, wakalegele ndaga jia gushimana guene nu gu Kianga Giabenga nu mu mavu a luselenga ivo 40.
37 “Moize yowu muene wawambelele enya Isalele egi: ‘Nzambi mbawumizolela profete mumoshi gifua ame mukatshi dia aphangi’enu.’
38 Muene wakhalele mukatshi dia enya Isalele mu mavu a luselenga, wakhalele muta maga nu muanjelo gu mulundu wa Sinayi, muene nji wakhalele nu akhakh’etu. Wahetele mbimbi jia monyo gudi Nzambi ha gutuwambela najio.
39 Akhakh’etu atunyile gumutumagela, amutunyile nji. Mu mitshima yawo, avutugile gu Ejipitu.
40 Awambelele Alona egi: ‘Tulondele jinzambi mbajitutuameza, handaga tushigo mujiya ndaga yabuila Moize yowu watuzolele gu Ejipitu.’
41 Hene mu masugu ene, alondele gisongo gia mun’a ngombe, agihanele milambu. Akalegele nji wano mukunda nu gisongo gialondele ene nu mago awo.
42 Nzambi waawasele dikunda, waabembele ha gukombelela themua jia mu dilu gifua luholo yasonegewe mu mukanda wa Baprofete egi: ‘Enue enya Isalele, tangua muakhalele mu mavu a luselenga ivo 40, muanguhuilego milambu nu shitu jia gushiyiwa.
43 Enue muazudile inzo ya tenta ya Moloke nu themua ya nzambi Lefana, yene ifuanesa mualondele ha gukombelela. Gishina giene mbangumituma mu uhiga gualeha nu Babilona.’
44 “Akhakh’etu akhalele nu inzo ya tenta* mu mavu a luselenga. Nzambi wawambelele Moize ha gulonda inzo yene, hene wayilondele gifua luholo luamumonesele nayo Nzambi.
45 Akhakh’etu nu Yoshua azanguile inzo ya tenta yene, anginyile nayo mu mavu a ifutshi inyi yakayele Nzambi gutuama diawo. Inzo ya tenta yasalele guene uu nu mu masugu a Davidi.
46 Davidi watshiginyiwe gudi Nzambi nu watogele ha guheta luendu lua gutungila Nzambi wa Yakoba inzo.
47 Uvi Solomo watungidile Nzambi inzo yene.
48 Uvi Nzambi wa Gudinyinyiga gana khalago mu jinzo jiatungiwe nu mago, gifua muazuelele profete mumoshi egi:
49 ‘Yehowa udi muzuela egi dilu didi nguasa yami ya ufumu, mavu adi gihagelo giami gia malu. Inzo ya luholo lutshi enue mbamungutungila? Fundo diami dia guhulugugila didi gui?
50 Ishigo koko diami diafugile ima eyi yagasue ba?’
51 “Enya mito yakola nu mitshima yakola nu matshui a gufua,* mudi muluisa nyuma ya Nzambi tangua diagasue. Ndaga jiakalegele akhakh’enu, jiene mudi mutshita nji.
52 Gudi nu profete nga mumoshi akhakh’enu amoneselego lamba ba? Ashiyile athu adiangele guzuelela guza gua muthu wabonga. Mangino enue muabalumugila muthu muene, muamushiya.
53 Nzambi watumine anjelo ha guhana Mukhuala, uvi enue muawutumagelego.”
54 Havuile ene ndaga eji, avuile khabu jiakola, asendesele gudia mazo.
55 Uvi Etiene wakhalele waguzala pha nu nyuma ya Nzambi, watalele mu dilu, wamonele lutumbu lua Nzambi nu Yesu Klisto wa gumagana gu koko dia madia dia Nzambi.
56 Wazuelele egi: “Ngudi mumona dilu dia gukanguga, Mun’a muthu wa gumagana gu koko dia madia dia Nzambi.”
57 Havuile ene ngenyi, akalugile, ashitshile matshui awo, ayile muphushi, amubuidile mukut’awo agasue.
58 Amuzolele hanze ya dimbo, asendesele gumusonona maseso. Athu anyi azuelele ndaga jia mambo mukunda nu muene ahagele milele yawo ya holu gu malu a muvuala mumoshi wa yala, jina dienji Saula.
59 Hakhalele ene gumusonona maseso, Etiene wakombelele egi: “Fumu Yesu, zangula nyuma yami.”
60 Gungima, wafugamele, wazuelele mu dijui diakola egi: “Yehowa, utadigo gubola gugu adi mukalagala.” Hazuelele muene ngenyi, wafile.
Mbimbi goshi'a diyiji
^ Mu Greke: “vungu.”
^ Mu Greke: “vungu.”
^ Nga “mbaasagesa.”
^ Nga ndo, yajiya gukhala egi: “watshitshile nji luholo lumoshi nu.”
^ Nga “akhakha.”
^ Nga “guakhalele nu mbuto.”
^ Nga “mionyo.”
^ Nga “wazudile desizio.”
^ Nga “inzo ya tenta yakhalele mumonesa egi Nzambi wakhalele n’awo.”
^ Mu Greke: “mitshima nu matshui enu ambiwego gu mukanda.”
