Makalegelo a Apostolo 8:1-40
8 Saula watshiginyile egi Etiene ashiyiwe.
Mu lusugu luene, hungu dia gu Yelusalema diataganele nu usageshi wakola. Alandudi agasue amuanganele, alengele ayile gu Yudea nu gu Samaliya, phamba apostolo asalele.
2 Uvi athu anyi akhalele agujinginyina gudi Nzambi azanguile kimbi gia Etiene, ayile gugifunda, amudidile mangololo.
3 Uvi Saula wasendesele guluisa hungu muavula diago. Wakhalele mungina inzo nu inzo, wakhalele muzola mala nu akhetu, nu wakhalele guamba mu bologo.
4 Uvi athu anyi amuanganele, akhalele muya nu gulongesa lukuma luabonga lua mbimbi ya Nzambi fundo diagasue akhalele muya.
5 Filipho wabulumugile gu dimbo dia Samaliya, wasendesele gualongesa ndaga jiatadila Klisto.
6 Athu avula akhalele mutegelela muabonga ndaga jiakhalele muzuela Filipho, akhalele nji mutala ndaga jia gushimana jiakhalele muene mukalagala.
7 Athu avula akhalele nu nyuma jiabola, nyuma jiene jiakhalele muzoga, jiakhalele mukaluga mu dijui diakola. Enya khonzo avula nu ikata* akhalele nji musagewa.
8 Hene athu a mu dimbo diene akhalele nu gusuanguluga guavula.
9 Mu dimbo diene muakhalele nu yala mumoshi jina dienji Simona, wakhalele muenya wanga. Athu agasue a mu gifutshi gia Samaliya akhalele gudihula muavula mukunda nu midimo yenji ya wanga. Muene wakhalele gudisunzula egi udi muthu wa ndando.
10 Athu agasue, sendese gudi athu a githuhu uu nu gudi enya lukuma, akhalele gumutegelela muabonga. Akhalele muzuela egi: “Muthu yowu udi nu Ngolo Jiavula jia Nzambi.”
11 Akhalele gumutegelela muabonga, handaga akhalele gudihula sendese mualeha mukunda nu ilumbe-lumbe yenji.
12 Uvi mala nu akhetu a mu dimbo diene atshiginyile lukuma luabonga luatadila Ufumu wa Nzambi nu jina dia Yesu Klisto luakhalele mulongesa Filipho, hene abatijiwe.
13 Simona nji wabuile mulandudi wa Yesu. Gungima dia gubatijiwa guenji, gabembelego Filipho; wakhalele gudihula ha gumona ndaga jia gushimana nu midimo yakoma yakhalele mukalegewa.
14 Havile apostolo gu Yelusalema egi enya Samaliya atshigina mbimbi ya Nzambi, atumine Phetelo nu Yone guene.
15 Tangua ahetele gu Samaliya, akombelele hagula alandudi ahe-ahe ahete nyuma ya Nzambi.
16 Handaga nga mumoshi mukatshi diawo wakhalele khenji gahetago nyuma ya Nzambi, uvi abatijiwe phamba mu jina dia Fumu Yesu.
17 A ahagele mago, hene ahetele nyuma ya Nzambi.
18 Hamonele Simona egi athu akhalele muheta nyuma tangua apostolo akhalele guahaga mago, wahanele apostolo makuta.
19 Waawambelele egi: “Nguhanenu nu ame ngolo eji hagula muthu wagasue nguhaga mago ahete nji nyuma ya Nzambi.”
20 Uvi Phetelo wamuwambelele egi: “Nu aye nu makut’aye, fuenu. Udi mutangiza egi wajiya gusumba ima yana gutuhana Nzambi mu khenda jienji nu makuta ba?
21 Aye ushigo nga nu khapho dimoshi gu ndaga eyi, handaga mutshima waye ushigo watagana gu meso a Nzambi.
22 Balumuna mutshima gu khadilo diaye diabola, bubila Yehowa gula luholo ludi guene, agutotesele mukunda nu matangi’aye abola.
23 Handaga ngudi mumona egi aye udi puazo yalula, udi muhiga wa ndaga jiabola.”
24 Simona waavutudile egi: “Bubilenu Yehowa mukunda nu ame hagula nga ndaga imoshi muazuedi mukatshi dia ndaga eji ingubuilago.”
25 Hamanesele ene gulongesa muavula nu guwambela athu mbimbi ya Yehowa, avutugile gu Yelusalema. Akhalele muya nu gulongesa lukuma luabonga njila-njila mu membo avula a enya Samaliya.
26 Uvi muanjelo wa Yehowa wawambelele Filipho egi: “Zuga, nda gu khanda ya sud mu njila idi mukatuga gu Yelusalema mubulumuga gu Gaza.” (Njila eyi idi mu mavu a luselenga.)
27 Filipho wazugile wayile, wamonele muthu* mumoshi wa gu Etiopi, muthu muene wakhalele mukalagala mudimo gumbo dia Kandake, fumu-mukhetu wa gu Etiopi. Wakhalele nji mutala umonyi wagasue wa fumu muene. Wayile gu Yelusalema ha gukombelela.
28 Hakhalele muene muvutuga gumbo dienji, wakhalele yagukhala hashi mu phusu-phusu yenji. Wakhalele mutanga mukanda wa profete Yeshaya mu dijui diakola.
29 Nyuma yawambelele Filipho egi: “Nda, suena hehi nu phusu-phusu inyi.”
30 Filipho wayile phushi hehi nu phusu-phusu yene, wamuvile mutanga mukanda wa profete Yeshaya mu dijui diakola, wamuhudile egi: “Udi mukotelesa diago* ndaga udi mutanga ba?”
31 Muthu muene wamuvutudile egi: “Luholo lutshi ngajiya gukotelesa gula muthu gangukuateselego?” Wawambelele Filipho ha gungina mu phusu-phusu yenji. Filipho wanginyile, wakhalele n’enji.
32 Gitshinyi gia Mukanda wa Nzambi giakhalele mutanga muene, giakhalele muzuela egi: “Amubatele gifua gimeme adi muya nagio ha gugishiya. Gakangundilego kano dienji, wahenele tedie gifua muana hena mun’a gimeme gutuama dia fumu wenji udi gugibatula uvuji.
33 Abatuilego milonga yenji mu luholo luatagana tangua akhalele gumuhana sonyi. Nanyi mbawuta lumene lua ndaga jiatadila giphuta gienji? Handaga monyo wenji wakatudiwa ha mavu.”
34 Muthu* muene wahudile Filipho egi: “Ngabuba nguwambele, nanyi profete adi muzuelela haha? Udi muzuela mukunda nu muene hakhenji nga mukunda nu muthu muko?”
35 Filipho wasendesele guzuela, wasendesele nu gitshinyi gia mukanda giakhalele mutanga muene, wamulongesele lukuma luabonga luatadila Yesu.
36 Hakhalele ene muya mu njila, ahetele ha fundo dimoshi diakhalele nu meya. Muthu* muene wawambelele Filipho egi: “Tala! Meya enyawa; itshi idi gungukanga njila ha gubatijiwa?”
37 ——
38 Muthu* muene wawambelele athu ha gumagenesa phusu-phusu. Muene nu Filipho anginyile mu meya, Filipho wamubatijile.
39 Hazogele ene mu meya, nyuma ya Yehowa yakatudile Filipho ha fundo diene muphushi. Muthu* muene gamonelego luko Filipho, uvi wayile mu njila yenji nu gusuanguluga.
40 Filipho wayile mumonegela gu Azota, wayile nu gulongesa lukuma luabonga mu membo agasue uu nu hahetele muene gu Sezalea.
Mbimbi goshi'a diyiji
^ Nga “ikalaba.”
^ Mu Greke: “muthu gajiyilego guwata.” Tala Ukoteleshi wa Mbimbi.
^ Nga “udi mujiya.”
^ “Tala mbimbi goshi’a diyiji jidi mu Makal 8:27.”
^ “Tala mbimbi goshi’a diyiji jidi mu Makal 8:27.”
^ “Tala mbimbi goshi’a diyiji jidi mu Makal 8:27.”
^ “Tala mbimbi goshi’a diyiji jidi mu Makal 8:27.”
