Makalegelo a Apostolo 9:1-43
9 Uvi Saula gabembelego gusagesa alandudi a Fumu, wakhalele guakanena ha guashiya. Hene wayile mumona nganga-nzambi wakoma.
2 Watogele nganga-nzambi wakoma ha gusonega mikanda mukunda nu sinagoga jia gu Damase, hagula gula wasanga muthu wagasue udi mulandula Njila ya Fumu, ikhale yala nga mukhetu, amukuate aze n’enji ya gujitshiga gu Yelusalema.
3 Tangua diakhalele muene muya, wahetele hehi nu dimbo dia Damase. Sagumugu kiajiji giakatugile mu dilu nu guhenya, giabulumugile ha fundo diakhalele muene.
4 Wabuile mu mavu, wavuile dijui gumuwambela egi: “Saula, Saula, mukunda natshi udi gungumonesa lamba?”
5 Wamuhudile egi: “Fumu, aye nanyi?” Muene wazuelele egi: “Ame Yesu udi mumonesa lamba.
6 Zuga, nda mu dimbo, mbaaguwambela ndaga udi naye gukalagala.”
7 Uvi athu akhalele muya n’enji amaganele hundundu, handaga akhalele muvua dijui dia muthu, uvi akhalelego mumona nga muthu mumoshi.
8 Saula wazugile mu molu, wakangudile meso, uvi gakhalelego mumona nga gima. Hene amukuatele gu koko, ayile n’enji uu nu gu Damase.
9 Watshitshile masugu thathu, gakhalelego mumona nga gima, gadilego nu ganuilego.
10 Gu Damase guakhalele nu mulandudi mumoshi, jina dienji Ananiase. Fumu wamuwambelele mu vizio egi: “Ananiase!” Muene watayele egi: “Ami’owu Fumu.”
11 Fumu wamuwambelele egi: “Zuga, nda mu bala-bala dia Magana, gumbo dia Yudasa, ukambe muthu mumoshi, jina dienji Saula, muenya gu Talese handaga udi mukombelela.
12 Wamonyi muthu mumoshi mu vizio, jina dienji Ananiase, wangina ha gumuhaga mago hagula meso enji amone.”
13 Uvi Ananiase wamuvutudile egi: “Fumu, ngavi lumene lua yala yowu gudi athu avula, nu ndaga jiagasue jiabola jiatshitshile muene gudi athu aye a gijila gu Yelusalema.
14 Mafumu a nganga-nzambi amuhanyi njila ha gukuata* athu agasue adi mutamega jina diaye.”
15 Uvi Fumu wamuwambelele egi: “Nda! handaga muthu yowu udi bungu ngatombi ha gulongesa jina diami gudi athu a ifutshi iko nu gudi mafumu nu gudi enya Isalele.
16 Handaga mbangumuwambela haphelo malamba agasue adi naye gumubuila mukunda nu jina diami.”
17 Ananiase wayile, wanginyile mu inzo, wamuhagele mago. Wamuwambelele egi: “Phangi Saula, Fumu Yesu yonu wamonegele gudi aye mu njila tangua wakhalele muza, wangutuma hagula umone nu uzale nu nyuma ya Nzambi.”
18 Mu tangua diene, ima yazogele mu meso enji gifua mahala, yabuile hashi, wasendesele gumona luko, wazugile wabatijiwe,
19 gungima wadile, wavile ngolo.
Wasalele masugu azonda nu alandudi akhalele gu Damase.
20 Mu tangua diene, wasendesele gulongesa ndaga jiatadila Yesu mu sinagoga. Wakhalele muzuela egi Yesu udi Mun’a Nzambi.
21 Athu agasue akhalele gumutegelela akhalele muzuela egi: “Muthu owu muene wakhalele musagesa athu agasue akhalele mutamega jina edi gu Yelusalema. Wajile nu matangi a guakuata ha guya nawo* gudi mafumu a nganga-nzambi.”
22 Uvi Saula walanduile guheta ngolo jiavula. Enya Yuda anyi akhalele gu Damase akhalelego mumona ndaga ya guzuela, handaga muene wakhalele mumonesa haphelo egi Yesu udi Klisto.
23 Gungima dia masugu avula, enya Yuda ayile giphungi ha gumushiya.
24 Uvi Saula wavile lumene lua giphungi giawo. Enya Yuda akhalele mubandemena gu mifulo ya dimbo phipha nu muanya ha gumushiya.
25 Hene alandudi enji amuzanguile mu phipha, amumbile mu musanda, amubulumuine ha fenetre ya gibayi* gia dimbo.
26 Hahetele muene gu Yelusalema wakambele gudibungisa nu alandudi, uvi mukut’awo agasue akhalele gumuvuila woma, handaga akhalelego mutshigina egi muene wakhalele mulandudi.
27 Hene Barnabase wajile gumukuatesa, wamuzanguile, wayile n’enji gudi apostolo, waatele lumene lua ndaga jiagasue. Waawambelele luholo Saula wamonele Fumu mu njila nu luholo atele n’enji maga nu luholo alongesele muene jina dia Yesu nu gikhesa giagasue gu Damase.
28 Saula wasalele nawo, wakhalele muya nawo fundo diagasue diakhalele ene muya mu Yelusalema. Wakhalele mulongesa jina dia Fumu nu ngolo jiagasue.
29 Wakhalele muta maga nu gusha iphapha nu enya Yuda anyi akhalele muzuela Greke, uvi ene akhalele mukamba gumushiya.
30 Tangua aphangi ajiyile ndaga yene, abulumugile n’enji gu Sezalea, amutumine ha guya gu Talese.
31 Mu sungi yene, alandudi a gu Yudea yagasue nu gu Galilea nu gu Samaliya akhalele mu guhuima, akhalele nji gudikolesa. Luholo akhalele muvila Yehowa woma nu akhalele muheta ukuateshi wa nyuma yenji, athu ako avula akhalele nji mubua alandudi.
32 Hakhalele muwenda Phetelo mu membo agasue a gukhanda inyi, wabulumugile nji gudi athu a gijila akhalele gu Lida.
33 Wasangele yala mumoshi guene, jina dienji Enea. Yala muene wakhalele wa gubanda ha gitanda ivo 8 yabalega gale, handaga wakhalele muenya khonzo.
34 Phetelo wamuwambelele egi: “Enea, Yesu Klisto agusage. Zuga, londa gitanda giaye.” Enea wazugile mu tangua diene.
35 Tangua athu agasue a gu Lida nu enya Salona agasue amonele ndaga jiabuidile Enea, abuile alandudi a Fumu.
36 Guakhalele nu mulandudi mumoshi mu dimbo dia Yopha, jina dienji Tabita, yakotelesa egi “Dorkas.”* Wakhalele mutshita ndaga jiavula jiabonga nu wakhalele mukhaphela phutu ima.*
37 Mu masugu ene, wakatele, gungima wafile. Amuzuishile meya, amuhagele gu sugu imoshi ya gosa.
38 Luholo dimbo dia Lida diakhalele hehi nu dimbo dia Yopha, alandudi avile egi Phetelo wakhalele mu dimbo diene. Hene atumine athu muyadi ha gumuwambela egi: “Tuabuba, iza muphushi.”
39 Phetelo wayile nawo. Tangua ahetele, ayile n’enji gu sugu ya gosa. Akhetu agasue a gafunda ajile gudi muene, akhalele mudila nu gumuleza milele yavula nu malopho* a atungidile Dorkas tangua diakhalele muene nu monyo.
40 Phetelo wawambelele athu agasue ha guzoga hanze, gungima wafugamene, wakombelele. Wabalumugile gu khanda yakhalele mvumbi, wazuelele egi: “Tabita, zuga!” Tabita wakangudile meso, hamonele muene Phetelo, wazugile.
41 Phetelo wamukuatele gu koko, wamuzugishile. Gungima, watamegele athu a gijila nu akhetu a gafunda, waahanele n’enji wa monyo.
42 Athu agasue a mu dimbo dia Yopha avile ndaga eyi. Avula mukatshi diawo ashile gutshigina gudi Fumu.
43 Phetelo wasalele mu dimbo dia Yopha masugu avula, wakhalele gumbo dia Simona, mukuludi wa ilema ya shitu.
Mbimbi goshi'a diyiji
^ Mu Greke: “gujitshiga.”
^ Mu Greke: “ha guya nawo agujitshiga.”
^ Nga “kibindji.”
^ Mu Greke Dorkas, mu araméen Tabita. Majina awa mbadi adi mukotelesa egi “Mbambi.”
^ Nga “milambu ya khenda.”
^ Nga “milele ya holu.”
