Mukanda wa Mako 6:1-56
6 Yesu wakatugile ha fundo dinyi, wayile gu dimbo diawo, alandudi enji amulanduile.
2 Tangua diataganele Lusugu lua Guhuluguga, Yesu wasendesele gulongesa mu sinagoga. Athu avula akhalele gumutegelela akhalele gudihula mangololo egi: “Gui guahetshi muthu owu ndaga eji? Mukunda natshi amuhanele ndunge eji? Mukunda natshi nji phamba muene wahanewe ngolo jia gutshita ndaga eji jia gushimana?
3 Muene gashigo muenya mabaya, mun’a Madiya, phangi’a Yakoba nu Yozefe nu Yudasa nu Simona ba? Aphangi’enji a akhetu ashigo haha nu esue ba?” Hene amutunyine gawo.
4 Uvi Yesu waawambelele egi: “Profete wana nemesewa mafundo agasue, uvi athu a mu dimbo diawo nu akuaku’enji nu enya inzo yawo anago gumunemesa.”
5 Gishina giene gakalagelego ndaga jiavula jia gushimana guene. Wahagele phamba mago holu dia akhashi azonda akhalele mukata ha guasaga.
6 Yesu wadihudile muavula luholo athu ene akhalelego nu gutshigina. Hene wayile mu membo a hehi ha gulongesa guene.
7 Watamegele apostolo enji 12, waatumine muyadi-muyadi, waahanele ngolo jia gukaya nyuma jiabola.
8 Waawambelele luko egi azudigo nga gima gimoshi ha guya nagio mu njila, phamba muhango; ashigo naye gubata mapha, nga kuba dia gubatela ima ya gudia, nga falanga* mu mikaba yawo.
9 Waawambelele luko ha gusudiga jisaphata uvi ayigo nu milele mbadi.*
10 Waalezele luko gamba: “Gula muthu wamiyamba gumbo dienji, khalenu guene uu nu tangua mbamukatuga fundo dinyi.
11 Fundo diagasue mbaatuna gumiyamba nu gumitegelela, zogenu. Uvi tangua mudi mukatuga, bundenu malu enu ha gukatula fuphi gifua gijiyishilo mukunda nu athu ene.”
12 Alandudi ayile, akhalele mulongesa athu ha gubalumuna mitshima yawo,
13 azolele athu bademo avula, akungile akhashi avula maji ha guasaga.
14 Fumu Helode wavuile ndaga yene, handaga Yesu wakhalele mujiyiwa muabonga gudi athu. Athu ako akhalele muzuela egi: “Yone Mubatiji wafuzumuga gu gufua, gishina giene muene udi nu ngolo jia gukalagala ndaga eji jia gushimana.”
15 Ako akhalele muzuela egi: “Muene udi Eliya.” Uvi ako egi: “Muene udi profete gifua baprofete a mu tangua dikulu.”
16 Uvi havuile Helode ndaga yene, wazuelele egi: “Yone ngabatuile muto muene wafuzumuga gu gufua.”
17 Helode wadizudile mu ulo nu Helodia, mukaji’a phangi’enji Filipho. Watshiginyile gusuanguluisa mukaji’enji Helodia, hene watumine athu ha gukuata Yone. Amujitshigile malenge, amumbile mu bologo.
18 Handaga Yone wakhalele muwambela Helode egi: “Mukhuala ushigo guguhana njila ya guzula mukaji’a phangi’aye mu ulo.”
19 Gishina giene Helodia gakhalelego mutshigina Yone. Wakhalele mukamba gumushiya, uvi gakhalelego nu luholo lua gumushiya.
20 Helode wakhalele muvuila Yone woma, handaga wakhalele mujiya egi muene udi muthu wabonga nu wa gijila, hene akhalele gumubamba. Tangua diagasue diakhalele muene gumutegelela, gakhalelego mumona ndaga ya gumukalagala. Gishina giene walanduile gumutegelela nu gusuanguluga guagasue.
21 Uvi Helodia wahetele luendu tangua dialondele Helode wano wa guvalewa guenji. Mu lusugu luene, Helode wahanele ima ya gudia gudi mafumu enji akoma, gudi mafumu a masuta nu gudi athu a lukuma a gu Galilea.
22 Mun’a Helodia wa mukhetu wanginyine, wakinyine. Ndaga yene yasuanguluishile Helode nu athu akhalele n’enji gu mesa.* Fumu wawambelele mona mukhetu muene egi: “Ngutoge gima giagasue watshigina, ame mbanguguhua nagio.”
23 Wadilogele egi: “Gima giagasue wangutoga, mbanguguhua nagio, uu nu gitshinyi gia ufumu wami.”
24 Mona mukhetu muene wayile gudi gin’enji, wamuhudile egi: “Itshi ngajiya gutoga?” Gin’enji wamuwambelele egi: “Toga muto wa Yone Mubatiji.”
25 Wavutugile mu phushi gudi fumu, wamuwambelele egi: “Ngudi mutshigina egi unguhane muto wa Yone Mubatiji ha longa luenyelu.”
26 Ndaga yene yahanele fumu gikenene giavula, uvi gamonelego luholo lua gutuna handaga wakhalele wadilogi gale gu meso a athu atamegele muene gu wano.*
27 Nu dishimbu ndo, fumu watumile suta dimoshi mukatshi dia masuta akhalele gumubamba, ha gumubatela muto wa Yone. Suta muene wayile, wabatuile Yone muto mu bologo.
28 Wajile nu muto wa Yone ha longa, wawuhanele mon’a mukhetu, gungima mon’a mukhetu wawuhanele gudi gin’enji.
29 Tangua alandudi a Yone avuile ndaga yene, ajile, azanguile kimbi gienji, ayile gugifunda.
30 Apostolo avutugile gudi Yesu, amuwambelele ndaga jiagasue akalegele nu jinyi alongesele.
31 Gungima Yesu waawambelele egi: “Izenu tuyenu ha fundo dietu hakhetu hagula muhuluguge hazonda.” Handaga athu avula akhalele muza, ako akhalele muya. Yesu nu alandudi enji akhalelego nga nu kumbi dia gudia.
32 Hene anginyine mu wato, ayile ha fundo dimoshi ha gukhala khuta ene hakhawo.
33 Uvi athu ako a amonele tangua diakhalele ene muya, athu avula nji ajiyile ndaga yene. Athu a mu membo agasue ayile muphushi ha malu uu nu fundo diakhalele ene muya, adiangele guheta gutuama diawo.
34 Hazogele Yesu mu wato, wamonele athu avula, waavidile khenda handaga akhalele gifua imeme ishigo nu mubambi. Hene, wasendesele gualongesa ndaga jiavula.
35 Tangua ahetele mu ngueze, alandudi enji ayile gudi muene, amuwambelele egi: “Fundo tudi didi gualeha nu dimbo, tangua nji diayi gale.
36 Wambela athu aye gu ferme nu mu membo a hehi hagula adisumbile ima ya gudia.”
37 Muene waavutudile egi: “Enue hakhenu ahanenu ima ya gudia.” Uvi ene amuwambelele egi: “Watshigina egi tuye nu denye 200 ha gusumba mapha tuhane athu adie ba?”
38 Muene waavutudile egi: “Ndenu mutale gula mapha guvula gutshi mudi nawo.” Ayile mutala, amuwambelele egi: “Tudi nu mapha thano nu jishui mbadi.”
39 Wawambelele athu agasue ha gukhala hashi mu muangu mu mahunji.
40 Akhalele hashi mu mahunji, ako 100, ako 50.
41 Yesu wazanguile mapha thano nu jishui mbadi, watalele mu dilu, wahanele Nzambi mersi. Gungima waabatuile, waahanele gudi alandudi hagula ene a ahane gudi athu. Wabatuile nji jishui mbadi, wajikhaphele athu agasue.
42 Mukut’awo agasue adile, akutshile.
43 Gungima anonele itshinyi ya mapha yasalele inda 12 ya guzala, atangelego itshinyi ya jishui.
44 Athu anyi adile mapha akhalele mala guvula 5 000.
45 Gungima, nu dishimbu ndo, Yesu wawambelele alandudi enji ha gungina mu wato ha guya gu Betesayida ha sambua diko dia muta. Hakhalele ene muya, muene wawambelele athu ha guvutuga gumbo diawo.
46 Gungima, wakandugile gu mulundu ha gukombelela.
47 Mu kumbi dia ngueze, wato wakhalele ha katshi dia kianga, uvi muene wakhalele hakhenji gonze.
48 Yesu wamonele luholo alandudi enji akhalele mulua nu matshipha-tshipha, handaga funji yakola yakhalele guavutula gungima. Hehi nu gimenegena mu makolombolo,* wajile gudi ene nu guwenda holu dia meya. Uvi watshitshile gifua* udi guabalega.
49 Tangua alandudi amumonele muwenda holu dia meya, atangijile egi, “Idi gimona-mona!” Asendesele gukaluga.
50 Handaga amumonele mukut’awo agasue, akhalele nji muvua woma. Uvi mu tangua diene, muene waawambelele egi: “Khalenu nu gikhesa! Muvuigo woma; yowu ame.”
51 Gungima wanginyile nawo mu wato, funji yakola yahuile. Alandudi adihudile mangololo,
52 handaga ene akoteleselego ndaga ya gushimana yakalegele muene nu mapha. Mitshima yawo yakhalelego mukotelesa.
53 Tangua azawugile kianga, ahetele gu Genesaleta, ajitshigile wato hehi nu fundo diene.
54 Uvi tangua diazogele ene mu wato, athu ajiyile Yesu.
55 Ayile mu phushi ha guwambela athu a gu khanda yinyi yagasue. Fundo diagasue diakhalele ene muvua egi Yesu udi hene, akhalele gumubatela athu akhalele mukata holu dia gitanda.
56 Fundo diagasue diakhalele muene muya, mu membo akoma nga mu membo azonda nga gu ferme, akhalele muhaga enya misongo ha mafundo a zando. Akhalele mububila Yesu egi enya misongo akuate phamba songi ya mulele wenji. Athu agasue akhalele mukuata songi ya mulele wenji, akhalele muvua muabonga.
Mbimbi goshi'a diyiji
^ Mu Greke: “kuivre.”
^ Nga “mulele uko.”
^ Nga “gudia gu mesa.”
^ Nga “athu akhalele mudia gu mesa.”
^ Mu Greke: “Mu tangua dia nguana diana guzuga athu ha gukengelela mu phipha.” Yakotelesa egi hehi nu tangua dia 3 uu nu mu tangua dia 6 hazoga kumbi.
^ Nga “watshiginyile.”
