Manzuji 1:1-36
1 Gungima dia gufua gua Yoshua, enya Isalele* ahudile Yehowa egi: “Nanyi mukatshi dietu mbawudiangela guya muluisa enya gu Kanana?”
2 Yehowa wazuelele egi: “Giphuta gia Yuda mbagidiangela guya. Tala! Ngumuhana gifutshi ha mago awo.”
3 Gungima enya giphuta gia Yuda awambelele enya giphuta gia Simeone egi: “Tuyenu mututuale ha guluisa enya Kanana mu mavu atuhanewe. Ngenyi esue nji mbatuya gumituala mu mavu amihanewe.” Enya giphuta gia Simeone ayile nawo.
4 Enya giphuta gia Yuda ayile, Yehowa waakuatesele ha gubinga enya Kanana nu enya Phelese; abingile athu 10 000 gu dimbo dia Bezeke.
5 Asangele Adoni-Bezeke gu Bezeke, amuluishile, abingile enya Kanana nu enya Phelese.
6 Uvi Adoni-Bezeke walengele. Amuhatele, amukuatele, amubatuile mino ya shina ya gu mago nu ya gu malu.
7 Adoni-Bezeke wazuelele egi: “Gudi nu mafumu 70 abatuiwe mino ya shina ya gu mago nu ya gu malu, ana nona ima ya gudia yana bua goshi’a mesa ami. Nzambi wangukalagala gifua luholo ngaatshitshile.” Gungima ayile n’enji gu Yelusalema, wafuidile guene.
8 Mala a mu giphuta gia Yuda ayile nji muluisa Yelusalema. Atambudile dimbo, ashiyile nji athu gu phogo. Akondele dimbo diene tshuya.
9 Gungima mala ene abulumugile ha guluisa enya Kanana akhalele mukhala gu milundu nu gu Negebe nu gu Shefela.
10 Enya Yuda ayile ha guluisa enya Kanana anyi akhalele gu Hebrone, ashiyile Sheshayi nu Ahimana nu Talamayi. (Dimbo dia Hebrone diakhalele thomo mutamegewa egi Kiriyate-Arba.)
11 Tangua akatugile guene, ayile muluisa enya gu dimbo dia Debile. (Dimbo dia Debile diakhalele thomo mutamegewa egi Kiriyate-Sefele.)
12 Gungima Kalebe wazuelele egi: “Mbanguhana mun’ami wa mukhetu Akesa mu ulo gudi muthu mbawuluisa dimbo dia Kiriyate-Sefele nu mbawudibinga.”
13 Otenyele mun’a Kenaze galenge ga Kalebe watambuile dimbo diene. Kalebe wamuhanele mun’enji wa mukhetu Akesa mu ulo.
14 Hakhalele Akesa muya gudi mulumi’enji Otenyele, wawambelele Otenyele ha gulomba sh’enji dihia. Gungima Akesa watulugile ha phunda yenji.* Kalebe wamuhudile egi: “Itshi udi mutshigina.”
15 Muene wamuvutudile egi: “Ngabuba nguhane gima gimoshi giajiya gungusuanguluisa, wanguhanyi gitshinyi gia mavu gia gu sud,* uvi nguhane nji Gulote-Mayime.* Kalebe wamuhanele Gulote ya gu thunda nu Gulote ya gu mbongo.
16 Ajigulu a muenya Kena, giwaji gia Moize, akatugile nu enya Yuda gu dimbo dia samba,* ayile gu mavu a luselenga a enya Yuda gu sud ya Alada. Ayile mukhala mukatshi dia athu a mu dimbo diene.
17 Uvi enya Yuda ayile nu aphangi’awo enya giphuta gia Simeone ha guluisa enya Kanana akhalele mu dimbo dia Sefata, ashiyile dimbo diene diagasue. Ahanele dimbo diene jina egi Holema.*
18 Gungima enya Yuda atambudile Gaza nu membo enji agasue a hehi, nu Asekelone nu membo enji agasue a hehi, nu Ekrone nu membo enji agasue a hehi.
19 Yehowa wakhalele nu enya Yuda. Atambuile membo akhalele mu milundu, uvi abingilego ha gukaya athu akhalele mu baba handaga akhalele nu phusu-phusu jia ita jiakhalele nu phogo jia utadi.*
20 Ahanele Kalebe dimbo dia Hebrone gifua muazuelele Moize. Gungima muene wakayele ana a mala thathu a Anaka akhalele guene.
21 Uvi enya giphuta gia Benjame akayelego enya Yebuse anyi akhalele gu Yelusalema, hene enya Yebuse ana khala nu enya Benjame gu Yelusalema uu nu mangino.
22 Mu tangua diene, ajigulu a Yozefe ayile muluisa dimbo dia Betele, Yehowa waakuatesele.
23 Ajigulu a Yozefe ayile mutala dimbo dia Betele mu gisuegi (dimbo diene diakhalele thomo mutamegewa egi Luze).
24 Athu anyi ayile mutala dimbo diene mu gisuegi, amonele muthu mumoshi muzoga mu dimbo. Amuwambelele egi: “Tuabuba, tudijige njila ya gunginyila mu dimbo, ngenyi mbatuguvila khenda.”
25 Muthu muene waadijigile njila ya gunginyila mu dimbo, ashiyile athu a mu dimbo diene nu phogo, uvi abembele muthu muene nu fami yenji yagasue ha guya gawo.
26 Yala muene wayile gu mavu a enya Hete, watungile dimbo, wadihanele jina egi Luze. Dimbo diene diana tamegewa ngenyi uu nu mangino.
27 Enya giphuta gia Manase atambudilego dimbo dia Bete-Shana nu membo enji a hehi, nu dimbo dia Tanaka nu membo enji a hehi, nu enya gu Dole nu membo enji a hehi, nu enya gu Ibeleame nu membo enji a hehi, nu enya gu Megido nu membo enji a hehi. Enya Kanana akatugilego mu mavu wawa.
28 Tangua enya Isalele abuile nu ngolo jiavula, atshitshishile enya Kanana midimo gu ngolo uvi a akayelego agasue.
29 Enya giphuta gia Efrayime nji akayele ndo enya Kanana anyi akhalele gu dimbo dia Gezele. Hene enya Kanana alanduile gukhala mukatshi diawo gu Gezele.
30 Enya giphuta gia Zabulona akayelego enya gu Kitelone nu enya gu Nahaleole. Alanduile gukhala nu enya Kanana ene fundo dimoshi, uvi akhalele guatshitshisa midimo gu ngolo.
31 Enya giphuta gia Asele akayelego enya mu dimbo dia Ako, nu enya gu Sidona, nu enya gu Ahalaba, nu enya gu Akeziba, nu enya gu Heleba, nu enya gu Afika nu enya gu Lehoba.
32 Enya giphuta gia Asele akayelego athu ene agasue, uvi alanduile gukhala nawo.
33 Enya giphuta gia Nefetali akayelego enya gu Bete-Shemeshe nu enya gu Bete-Anate, alanduile* gukhala hamoshi nu enya Kanana ene. Enya giphuta gia Nefetali akhalele mutshitshisa enya Bete-Shemeshe nu enya Bete-Anate midimo gu ngolo.
34 Enya Amole ahanelego enya giphuta gia Dane njila ha gutunga mu baba, hene enya giphuta gia Dane asalele gu milundu.
35 Enya Amole alanduile gukhala holu dia Mulundu wa Helese nu wa Ayalona nu wa Shalebima. Uvi tangua ajigulu a Yozefe abuile nu ngolo jiavula, asendesele gutshitshisa enya Amole midimo gu ngolo.
36 Mudidilo wa enya Amole wakhalele musendesa gu khanda ya gamulundu ga Akelabime, sendese gu Sela uu nu gu khanda ya milundu.
Mbimbi goshi'a diyiji
^ Mu Hebelu: “ana a Isalele.”
^ Nga ndo, yajiya gukhala egi, “wabundile mago hakhalele muene holu dia phunda.”
^ Nga “Negebe.”
^ Yakotelesa egi, “malonga a meya.”
^ Nga “Yeliko.”
^ Yakotelesa egi, “athu adi naye gushiyiwa.”
^ Mu Hebelu: “phusu-phusu jia utadi.”
^ Nga “alundugile.”
