Manzuji 11:1-40
11 Yefeta muenya gu Gileade wakhalele suta dia ngolo; gin’enji wakhalele mukhetu wa thambi, jina dia sh’enji diakhalele Gileade.
2 Uvi mukaji’a Gileade nji wavualele ana a mala. Tangua ana ene akudile, akayele Yefeta, amuwambelele egi: “Mbawushigo muheta khapho hamoshi nu esue monzo ya tata, handaga udi mun’a mukhetu muko.”
3 Yefeta walengele aphangi’enji, wayile mukhala gu gifutshi gia Toba. Athu anyi akhalelego nu midimo ayile musanga Yefeta, akhalele gumulandula ha guya muluisa mbalagaji jiawo.
4 Matangua azonda gungima, enya Amona aluishile enya Isalele.
5 Tangua enya Amona ajile muluisa enya Isalele, akulu a gu Gileade ayile mbala imoshi gu gifutshi gia Toba ha gutamega Yefeta.
6 Awambelele Yefeta egi: “Iza ubue komanda wetu, hagula tuluise enya Amona.”
7 Uvi Yefeta wawambelele akulu a gu Gileade egi: “Enue muangutunyile, muangukayele monzo ya tata. Henyaha muamona egi mudi mu lamba, na muaza gungukamba?”
8 Uvi akulu a gu Gileade awambelele Yefeta egi: “Gishina giene tuaza ha gugukamba. Gula tuaya naye muluisa enya Amona, mbawubua fumu ya athu agasue a gu Gileade.”
9 Yefeta wawambelele Akulu a gu Gileade egi: “Gula muanguvutula ha guya muluisa enya Amona, gula Yehowa wangukuatesa nji ha guabinga, mbangudi mubua fumu wenu!”
10 Akulu a gu Gileade awambelele Yefeta egi: “Ayi tuatshigina, mbatutshita ndaga wazuela, Yehowa udi temue* wetu.”
11 Yefeta wayile nu akulu a gu Gileade. Athu amubuishile fumu nu komanda wa masuta. Tangua ahetele gu Mispa, Yefeta wazuelele gutuama dia Yehowa ndaga adivuile nu akulu.
12 Yefeta watumine athu ha guwambela fumu wa enya Amona egi: “Ndaga itshi yabola ngagutshitshi* ha guza muluisa gifutshi giami?”
13 Fumu wa enya Amona wawambelele athu atumine Yefeta egi: “Tangua enya Isalele akatugile gu Ejipitu, azanguile mavu ami sendese gu Alenona uu nu gu Yaboke uu nu Yordane. Henyaha nguvutudile mavu ene mu guhuima.”
14 Uvi Yefeta watumine athu ha guwambela fumu wa enya Amona
15 egi:
“Yefeta wazuela egi: ‘Enya Isalele atambudilego mavu a enya Moaba nu mavu a enya Amona,
16 handaga tangua azogele gu Ejipitu, abalegele mu mavu a luselenga uu nu gu Kianga Giabenga, gungima ahetele gu Kadeshe.
17 Enya Isalele atumine athu ha guwambela fumu wa gu Edome egi: “Tuabuba, tumutshigina gubalega mu mavu aye,” uvi fumu wa gu Edome watunyile. Atumine nji mbimbi gudi fumu wa gu Moaba, uvi watunyile. Hene enya Isalele alanduile gukhala gu Kadeshe.
18 Ayidile mu mavu a luselenga, akondomogele gifutshi gia Edome nu gia Moaba. Abalegele gu khanda ya mazogelo a kumbi a gifutshi gia Moaba, ahagele phundo yawo gu muta wa Alenona; uvi anginyilego mu mavu a Moaba handaga mudidilo wa Moaba wakhalele muta wa Alenona.
19 “‘Gungima enya Isalele atumine athu ha guwambela Sihona fumu wa enya Amole wakhalele muhinyina gu Heshebona egi: “Tuabuba, tumutshigina gubalega mu gifutshi giaye ha guya mu mavu etu.”
20 Uvi Sihona gatshiginyilego ndaga jiakhalele muzuela enya Isalele, waatunyishile ha gubalegela mu mavu enji. Wabungishile masuta enji, ahagele phundo yawo gu dimbo dia Yahase, waluishile enya Isalele.
21 Yehowa Nzambi wa Isalele wahanele Sihona nu masuta enji agasue ha mago a enya Isalele. Enya Isalele a abingile, atambudile membo agasue a enya Amole akhalele gu khanda yene.
22 Enya Isalele atambuile mavu agasue a enya Amole sendese gu muta wa Alenona uu nu gu muta wa Yaboke; sendese mu mavu a luselenga uu nu gu muta wa Yordane.
23 “‘Yehowa Nzambi wa Isalele wakayele enya Amole gutuama dia enya Isalele, henyaha aye udi mutshigina gukaya enya Isalele?
24 Aye wana zulago mavu agasue ana guguhana nzambi waye Kemoshe ba? Esue nji mbatuzula mavu agasue atuhanele Yehowa Nzambi wetu.
25 Aye wabalega Balaka mun’a Siphola fumu wa gu Moaba ba? Muene gakambelego nguma nu enya Isalele, gaaluishile ndo.
26 Henyaha ivo 300 yabalega gale sendese enya Isalele ana khala gu Heshebona nu mu membo enji a hehi, nu gu Aloele nu mu membo enji a hehi, nu mu membo agasue adi mu khulo ya muta wa Alenona; na mukunda natshi watunyile guatambula sendese mualeha?
27 Ngagukalegelego ndaga yabola, uvi aye watshita gubola luholo waza gunguluisa. Mangino Yehowa akhale nzuji mukatshi dietu ha gubatula milonga mukatshi dia enya Isalele nu enya Amona.’”
28 Uvi fumu wa enya Amona watunyile gutegelela mbimbi jiamutumine Yefeta.
29 Nyuma ya Yehowa yajile gudi Yefeta, wabalegele gu Gileade nu gu Manase ha guya gu Mispa ya gu Gileade, wakatugile gu Mispa ya gu Gileade walanduile guya uu nu gudi enya Amona.
30 Yefeta wadilogele gutuama dia Yehowa egi: “Gula wangukuatesa ha gubinga enya Amona,
31 tangua mbangukatuga gudi enya Amona ha guvutuga gu inzo yami mu guhuima, muthu wagasue mbawuzoga ha mufulo wa inzo yami ha guza gungutagana, mbawubua muthu waye Yehowa, mbangumuhana gifua mulambu wa guwotshia.”
32 Yefeta wayile muluisa enya Amona, Yehowa wamukuatesele ha guabinga.
33 Washiyile athu avula sendese gu Aloele uu nu gu Minite nu gu Abele-Kelamina. Watambuile membo 20. Ngenyi enya Isalele abingile enya Amona.
34 Tangua Yefeta wahetele gumbo dienji gu Mispa, mun’enji wa mukhetu wazogele ha guza gumutagana, wakhalele mushiga gangoma nu gukina! Mona muene wakhalele mun’enji mumoshi ha mumoshi, Yefeta gakhalelego nu mona muko wa yala nga wa mukhetu.
35 Tangua Yefeta wamumonele, watawile* milele yenji, wazuelele egi: “Aa mun’ami! Wangubogola muila, aye wabua muthu ngudi naye gukaya. Ngadilogi gale gudi Yehowa, ngajiyilego gusombegesa ndaga ngazuelele.”
36 Uvi muene wamuwambelele egi: “Tata, gula wadilogi gudi Yehowa, ngutshite ndaga wamulayi; handaga Yehowa wagukuatesa ha gubinga mbalagaji jiaye enya Amona.”
37 Wawambelele sh’enji egi: “Ngudi gugutoga ndaga imoshi, ngubembe nguye ngudikhalele hakhami mbeji mbadi gu milundu, ngudile hamoshi nu mafut’ami a akhetu handaga mbangushigo muzudiwa mu ulo.”*
38 Yefeta wamuwambelele egi: “Nda!” Wamubembele ha guya mutshita guene mbeji mbadi. Wayile gu milundu nu mafut’enji, wadidile handaga gakhalelego naye guzudiwa mu ulo.
39 Gu gisugishilo gia mbeji mbadi, wavutugile gumbo dia sh’enji; sh’enji wataganesele ndaga yalayele muene Nzambi mukunda nu mun’enji wa mukhetu. Mona muene gabungishilego muila nga nu yala mumoshi. Ndaga eyi yabuile khadilo gu Isalele:
40 Givo nu givo, mavuala a akhetu a gu Isalele akhalele muya masugu nguana ha guhana gikhesa* gudi mun’a Yefeta muenya gu Gileade.
Mbimbi goshi'a diyiji
^ Mu Hebelu: “muthu udi mutegelela.”
^ Mu Hebelu: “ame nu aye ndaga itshi?”
^ Nga “watshiamunyile.”
^ Mu Hebelu: “mbangushigo mubungisa muila nu yala.”
^ Nga “gushimana.”
