Manzuji 12:1-15
12 Gungima, mala a gu Efrayime adibungishile, azawugile muta ha guya gu Safone,* awambelele Yefeta egi: “Mukunda natshi watunyile gututamega tangua wazawugile ha guya muluisa enya Amona? Tudi muza mumba inzo yaye tshuya, tugukonde nu aye mukatshi.”
2 Uvi Yefeta waawambelele egi: “Ame nu athu ami tuakhala nu umbalagaji wakola nu enya Amona. Ngamitogele ukuateshi, uvi muajilego ha gunguhuluisa ha mago awo.
3 Tangua ngamonele egi mbamushigo gungukuatesa, ngahagele monyo wami mu gingonza,* ngayile muluisa enya Amona, Yehowa wangukuatesele ha guabinga. Na henyaha mukunda natshi mudi muza gunguluisa?”
4 Yefeta wabungishile athu agasue a gu Gileade, aluishile enya Efrayime; abingile enya Efrayime akhalele muzuela egi: “Enue enya Gileade mudi mu mavu a Efrayime nu a enya Manase. Thomo muakhalele enya Efrayime, uvi mualengele.”
5 Enya Gileade adiangele gubulumuga gu muta wa Yordane, akangele mafundo agasue athu ajiya guzawuga ha malu; gula muenya Efrayime watshigina gulenga, wakhalele muzuela egi: “Ngubembenu nguzawuge”; uvi enya Gileade akhalele gumuhula egi: “Udi muenya Efrayime ba?” Gula wazuela egi, “ndo!”
6 akhalele gumuwambela egi: “Zuela egi Shibolete.” Uvi muene wakhalele muzuela egi “Sibolete,” handaga akhalelego mujiya gutamega jina diene muabonga. Akhalele gumukuata, amushiyi mu muta wa Yordane hehi nu fundo athu ana zawugila ha malu. Ashiyile enya Efrayime 42 000.
7 Yefeta watuamezele enya Isalele ivo samano, gungima wafuile, amufundjile gu dimbo dienji gu Gileade.
8 Gungima dienji, Ibesana muenya gu Beteleheme wabuile nzuji gu Isalele.
9 Wakhalele nu ana a mala 30 nu ana a akhetu 30. Wahanele an’enji a akhetu mu ulo gudi ana a mala a mu fami jiko, wazudile nji ana a akhetu 30 a mu fami jiko hagula an’enji a mala a azule mu ulo. Ibesana watuamezele enya Isalele ivo sambadi.
10 Gungima Ibesana wafuile, amufundjile gu Beteleheme.
11 Gungima dienji, Elona muenya giphuta gia Zabulona wabuile nzuji gu Isalele; watuamezele enya Isalele ivo kumi.
12 Gungima Elona muenya gu Zabulona wafuile, amufundjile gu Ayalona mu mavu a enya Zabulona.
13 Gungima dienji, Abedona mun’a Hilele muenya gu Philatona wabuile nzuji gu Isalele.
14 Wakhalele nu ana 40 nu ajigulu 30. Muthu wagasue mukatshi diawo wakhalele muwendesa phunda imoshi. Abedona watuamezele enya Isalele ivo nage.
15 Gungima Abedona mun’a Hilele muenya gu Philatona wafuile, amufundjile gu Philatona mu mavu a enya Efrayime gu mulundu wa enya Amaleke.
Mbimbi goshi'a diyiji
^ Nga ndo, yajiya gukhala egi, “azawugile gu khanda ya nord.”
^ Nga “ngahagele monyo wami ha mago ami.”
