Manzuji 14:1-20
14 Gungima Samsona wabulumugile gu dimbo dia Timena, wamonele mon’a mukhetu wa gu Filistiya guene.
2 Wayile muwambela sh’enji nu gin’enji egi: “Ngamonyi mon’a mukhetu mumoshi wa gu Filistiya gu Timena, wangusuanguluisa, ngudi mutshigina egi munguzudile n’enji mu ulo.”
3 Uvi sh’enji nu gin’enji amuwambelele egi: “Wajiyilego guzula mukhetu mukatshi dia enya fami yetu nga mukatshi dia enya Isalele ba? Mukunda natshi udi mutshigina guzula mukhetu mukatshi dia enya Filistiya ambiwego gu mukanda?” Uvi Samsona wawambelele sh’enji egi: “Ndenu munguzudile n’enji, muene udi watagana mukunda nu ame.”*
4 Sh’enji nu gin’enji ajiyilego egi yakhalele matangi a Yehowa, handaga Nzambi wakhalele mukamba luholo lua guluisa enya Filistiya. Mu sungi yene, enya Filistiya akhalele muhinyina enya Isalele.
5 Samsona wabulumugile gu Timena nu sh’enji nu gin’enji. Hahetele muene mu mahia a vinyo a gu Timena, khoshi* yazogele, yasendesele gumubalela.*
6 Nyuma ya Yehowa yahanele Samsona ngolo, wakaluile khoshi yene mu itshinyi mbadi nu mago enji gifua luholo ana kalula mutumba wa khombo mu itshinyi mbadi. Uvi gawambelelego sh’enji nu gin’enji ndaga yakalegele muene.
7 Wabulumugile gu dimbo dia Timena, watele maga nu mon’a mukhetu muene. Samsona wakhalele musha mutshima egi mon’a mukhetu muene wakhalele diago watagana mukunda nu muene.
8 Gungima tangua diakhalele muene muvutuga gu Timena ha guzangula mukhetu muene aye n’enji gumbo dienji, wayile ha fundo diashiyile muene khoshi ha guyitala, wamonele nyigi jiavula nu wigi mukatshi dia khoshi yene.
9 Wazudile wigi nu mago enji, wayile nu gudia njila-njila. Hahetele muene gudi sh’enji nu gin’enji, waahanele ndambu ya wigi ha gudia. Uvi gaawambelelego egi wazudi wigi wene mu muila wa khoshi ya gufua.
10 Sh’enji wabulumugile gudi mukhetu muene, Samsona watshitshile wano handaga mavuala akhalele nu khadilo dia gutshita ngenyi.
11 Tangua amumonele, amuhanele mavuala a mala 30 ha guya n’enji.
12 Gungima Samsona waawambelele egi: “Ngudi gumitela gishima gimoshi. Gula muagikotelesa, muanguhana mvutu mu masugu sambadi a wano owu, ngudi gumihana milele 30 ya linene nu milele iko 30 yabonga.
13 Uvi gula muanguhanelego mvutu, mudi naye gunguhana milele 30 ya linene nu milele iko 30 yabonga.” Ene amuvutudile egi: “Tutele gishima giene tugivue.”
14 Samsona waawambelele egi:
“Gima gia gudia giazogele gudi gima giana dia,Gima giafula giazogele gudi gima gia ngolo.”
Masugu thathu abalegele, akhalelego mujiya gumukotelesela gishima giene.
15 Mu lusugu lua nguana, an’a mala ene awambelele mukaji’a Samsona egi: “Lepha mulumi’aye hagula atukotelesele gishima. Gula ndo, mbatugukonda tshuya nu enya inzo ya sh’aye. Muatutamega haha ha gututambula ima yetu ba?”
16 Mukaji’a Samsona wasendesele gumudidila egi: “Wana gunguzumba ndo nga hazonda. Watele enya gifutshi gietu gishima, uvi nu gungukotelesela ndo nagio.” Uvi Samsona wamuwambelele egi: “Khenji ngugikotelesela ndo nga tata nga mama! Na mukunda natshi ngugukotelesela nagio?”
17 Uvi mukhetu muene walanduile gumudidila masugu agasue sambadi a wano wene. Mu lusugu lua sambadi, Samsona wamukotelesele gishima giene, handaga mukhetu muene wakhalele gumusagesa. Gungima mukhetu muene wayile mukotelesela ana a mala gishima giene.
18 Mu lusugu lua sambadi gutuama egi tangua dishiwuge,* an’a mala a mu dimbo ajile muwambela Samsona egi:
“Itshi idi yafula gubalega wigi?
Itshi idi nu ngolo jiavula gubalega khoshi?”
Muene waawambelele egi:
“Nga muadiminego nu mutumba wami wa ngombe ya mukaji,Nga muajiyilego mvutu ya gishima gigi.”
19 Gungima nyuma ya Yehowa yamuhanele ngolo jiavula, wabulumugile gu Asekelone, washiyile athu 30, wazanguile milele yawo. Wahanele milele yabonga gudi athu amukotelesele gishima giene. Wavuile khabu jiavula, wavutugile gumbo dia sh’enji.
20 Ahanele mukaji’a Samsona gudi mon’a yala mumoshi mukatshi dia ana a mala akhalele gumutuala.
Mbimbi goshi'a diyiji
^ Mu Hebelu: “udi watagana gu meso ami.”
^ Nga “mutumba wa khoshi udi nu uvuji wavula mu shingo.”
^ Nga “gumudingila.”
^ Nga ndo, yajiya gukhala egi, “gutuama egi angine gu sugu ya mukatshi.”
