Manzuji 15:1-20
-
Samsona wavutudila enya Filistiya gubola amukalegele (1-20)
15 Gungima dia masugu, mu sungi ana katula ble, Samsona wayile mutala mukaji’enji, wamubatele mutumba wa khombo. Wazuelele egi: “Ngudi mutshigina gungina gu sugu* ya mukaji’ami.” Uvi giwaji gienji wamutunyishile ha gungina.
2 Wamuwambelele egi: “Ngamonele gifua wamutunyi gaye diago. Hene ngamuhanele gudi mon’a yala mumoshi mukatshi dia an’a mala akhalele gugutuala. Galenge genji wa mukhetu udi wabonga gumubalega, ngabuba muzule ha fundo dienji.”
3 Uvi Samsona wazuelele egi: “Henyaha enya Filistiya ajiyilego luko gungubela gula ngaakalagala gubola.”
4 Samsona wayile, wakuatele mikenge 300. Wayijitshigile gu mikila iyadi-iyadi; wazudile tumitshi, watukungile maji; gungima wajitshigile tumitshi tuene gamoshi-gamoshi gu mikila ya mikenge mbadi.
5 Gungima dienji, wahagele tshuya gu tumitshi tuene. Wambile mikenge yene mu mahia a enya Filistiya akhalele nu mbuto. Wakondele ima yagasue yakhalele mu mahia nu itungu ya mbuto jia ble, nu mitshi ya vinyo nu mitshi ya olive.
6 Enya Filistiya ahudile egi: “Nanyi watshita ndaga eyi?” A awambelele egi: “Samsona wayitshitshi, handaga giwaji gienji gia yala gia gu dimbo dia Timena wazangula mukaji’enji wamuhana gudi muvuala wa yala wayile gumutuala gu ulo.” Enya Filistiya ayile, akondele mukaji’a Samsona nu sh’enji.
7 Samsona waawambelele egi: “Luholo muatshita ngegi, ame nji ngushigo muvutuga ndo uu nu tangua ngumivutuila gubola.”
8 Wasendesele guashiya mumoshi-mumoshi, afile diago avula, gungima wayile mukhala mu seso diakoma dia gu Etame.
9 Gungima enya Filistiya ahagele phundo yawo mu mavu a enya giphuta gia Yuda, akhalele muya nu guwenda gu Lehi.
10 Enya Yuda a ahudile egi: “Mukunda natshi muaza gutuluisa?” Ene a avutudile egi: “Tuaza mukuata* Samsona ha gumukalagala gifua luholo luatukalagala muene.”
11 Mala a enya giphuta gia Yuda 3 000 abulumugile gu seso diakoma dia gu Etame, awambelele Samsona egi: “Aye ushigo mujiya egi enya Filistiya ana gutuhinyina ba? Mukunda natshi watukalagala ndaga eyi?” Muene waavutudile egi: “Ngaakalagala gifua luholo ene angukalegele.”
12 Uvi ene amuwambelele egi: “Tuaji ha gugukuata* ha guguhana gudi enya Filistiya.” Samsona waawambelele egi: “Dilogenu egi mushigo gungukalagala nga ndaga imoshi yabola.”
13 Ene amuwambelele egi: “Ndo, tudi phamba gugujitshiga tuguhane gudi ene, uvi tushigo gugushiya.”
Amujitshigile nu ngonji mbadi jihe-jihe, amuzolele moshi’a seso.
14 Tangua diahetele muene gu Lehi, enya Filistiya ambile milolo ya gusuanguluga tangua amumonele. Mu tangua diene, nyuma ya Yehowa yahanele Samsona ngolo, ngonji amujitshigile gu mago jiabuile gifua shinga ya linene yahia tshuya, malenge amujitshigiwe akatugile ha mago abua.
15 Wamonele lumbanga lua phunda ya mulume lua gibisu; waluzanguile, washiyile athu 1 000 nu lumbanga luene.
16 Samsona wazuelele egi:
Nu lumbanga lumoshi lua phunda, ngashiya mbalagaji jiami, ngaalumbiga thundu-thundu!
Nu lumbanga lumoshi lua phunda, ngashiya athu 1 000.”
17 Hamanesele muene guzuela, wabishidile lumbanga luene gualeha, watamegele fundo diene egi Lamate-Lehi.*
18 Wavuile luhungu luabala, watogele ukuateshi gudi Yehowa egi: “Aye wanguhuluisa ha mago a mbalagaji jiami. Uvi henyaha udi mutshigina gungubemba ngufue nu luhungu, ngubue ha mago a athu ambiwego gu mukanda ba?”
19 Nzambi wakanguile wina dimoshi gu Lehi, meya azogele. Tangua Samsona wanuile, wahetele ngolo nu gikhesa. Watamegele gito giene egi Ene-Hakole,* gito giene giana khala gu Lehi uu nu mangino.
20 Samsona watuamezele enya Isalele ivo 20 hakhalele enya Filistiya muhinyina Isalele.
Mbimbi goshi'a diyiji
^ Nga “sugu ya mukatshi.”
^ Nga “mujitshiga.”
^ Nga “gugujitshiga.”
^ Yakotelesa egi, “mulundu wa lumbanga.”
^ Yakotelesa egi, “gito gia muthu udi mutamega.”
