Manzuji 16:1-31
16 Lusugu lumoshi, Samsona wayile gu Gaza, wamonele mukhetu mumoshi wa thambi, wanginyile gumbo dienji.
2 Awambelele enya gu Gaza egi: “Samsona udi haha.” Enya gu Gaza ajietele inzo nu amubandemene phipha yagasue ha mufulo wa dimbo. Ahenele tedie phipha yagasue, azuelele egi: “Gula guma guatshia, tudi muza gumushiya.”
3 Uvi Samsona wabandele uu nu mukatshi dia phipha. Wazugile mukatshi dia phipha, wakuatele gijidigo gia dimbo nu makunji enji mbadi nu gima akhalele mukangela mufulo. Wagivumbudile, wagihagele ha phanga, wayile nagio uu nu holu dia mulundu udi ha sambua dia Hebrone.
4 Gungima Samsona wazumbile mukhetu mumoshi wakhalele mu baba dia Soleke, jina dienji Dalila.
5 Mafumu a enya Filistiya ayile muwambela Dalila egi: “Lepha Samsona ha gujiya fundo diana katuga ngolo jienji, luholo lutshi tuajiya gumulebesa, nu gumujitshiga ha gumubinga. Gula watshita ngenyi, muthu wagasue mukatshi dietu mbawuguhana makuta a utadi wa siliva 1 100.”
6 Dalila wahudile Samsona egi: “Ngabuba, nguwambele fundo ngolo jiaye jiana katuga, ajiya gugujitshiga nu itshi ha gugulebesa?”
7 Samsona wamuwambelele egi: “Gula angujitshiga nu ngonji sambadi jihe-jihe jia uta wa manana jidi khenji akalegelago, mbangumuleba muila, mbangumubua gifua athu agasue.”
8 Mafumu a enya Filistiya ahanele Dalila ngonji sambadi jihe-jihe jia uta wa manana jiakhalele khenji ajikalegelago, Dalila wamujitshigile najio.
9 Athu akhalele agudisuega gu sugu ya mukatshi, Dalila wakalugile egi: “Samsona, enya Filistiya wawa muza ha gugukuata!” Samsona wabatuile ngonji jiene gifua shinga ya linene yakuata tshuya. Gushigo nga muthu wajiyile fundo diakhalele mukatuga ngolo jienji.
10 Gungima Dalila wawambelele Samsona egi: “Wanguhuiga, nu gunguwambela ndo giamatshidia. Henyaha ngabuba, nguwambele ajiya gugujitshiga nu itshi?”
11 Samsona wamuwambelele egi: “Gula angujitshiga nu ngonji jihe-jihe jinyi khenji akalegelego mudimo, mbangumuleba muila, mbangumubua gifua athu agasue.”
12 Dalila wazudile ngonji jihe-jihe wamujitshigile najio, gungima wakalugile egi: “Samsona, enya Filistiya wawa muza ha gugukuata!” (Mu tangua diene, athu akhalele agudisuega gu sugu ya mukatshi.) Uvi Samsona wabatuile ngonji amujitshigile gu mago gifua muthu wabatula wanda.
13 Gungima Dalila wawambelele Samsona egi: “Uu nu luenyelu udi gunguhuiga, ushigo gunguwambela giamatshidia. Nguwambele ajiya gugujitshiga nu itshi?” Samsona wamuwambelele egi: “Adi naye gujitshiga mikotshi sambadi ya gu muto wami nu wanda wakola ana tungila milele.”
14 Dalila wajitshigile mikotshi yene gu mutshi ana jigila tenta,* gungima wakalugile egi: “Samsona, enya Filistiya wawa muza ha gugukuata!” Samsona wazugile gu tulo, wavuzumuine mutshi wene, nu wanda wakola ana tungila milele.
15 Dalila wamuwambelele egi: “Luholo lutshi wajiya guzuela egi wana gunguzumba uvi aye mutshima gungukangudila ndo? Wanguhuiga gale iphungu thathu, ushigo gunguwambela fundo ngolo jiaye jiavula jiana katuga.”
16 Luholo Dalila wakhalele mulandula gumusagesa lusugu nu lusugu nu gumushinjiga, gisuga monyo giamukuatele.
17 Gu gisugishilo, Samsona wamuwambelele ndaga jiagasue, wamuwambelele egi: “Luzualu khenji luanginyile galego mu muto wami handaga ngudi Nazileya wa Nzambi sendese lusugu ngavualewe.* Gula angukulula sanga, ngolo jiami jimuhua, ngumuleba, ngumubua gifua athu agasue.”
18 Tangua Dalila wamonele egi Samsona wamuwambela giamatshidia, watumine mbimbi gudi mafumu a enya Filistiya mbala imoshi. Waawambelele egi: “Henyaha muajiya guza, handaga wanguwambela giamatshidia.” Mafumu a enya Filistiya ajile, amubatele makuta.
19 Dalila wabandesele Samsona ha mabongo enji, watamegele yala mumoshi, yala muene wakokele Samsona mikotshi sambadi ya sanga dienji. Gungima Dalila wasendesele gumutshita ndaga yagasue yatshigina muene handaga ngolo jia Samsona jiamuhuile.
20 Dalila wakalugile egi: “Samsona, enya Filistiya wawa muza ha gugukuata!” Samsona wazugile gu tulo, wazuelele egi: “Ngumuzuga ngulenge gifua luholo ngana tshita gale.” Uvi gakhalelego mujiya egi Yehowa gashigo luko n’enji.
21 Enya Filistiya amukuatele, amubudile meso. Abulumugile n’enji gu Gaza, amujitshigile malenge mbadi a kuivre; amumbile mu bologo, amuhanele mudimo wa gutua mbuto.
22 Amukokele sanga, uvi gungima sanga diene diasendesele guzoga luko.
23 Enya Filistiya adibungishile ha guhana mulambu wakoma gudi nzambi wawo Dagona nu ha gukalagala wano. Akhalele muzuela egi, “nzambi wetu watukuatesa ha gubinga mbalagaji wetu Samsona!”
24 Tangua amumonele, atumbuishile nzambi wawo egi, “nzambi wetu watukuatesa ha gubinga mbalagaji wetu wabolesele gifutshi gietu, nu washiyile athu avula mukatshi dietu.”
25 Enya Filistiya akhalele nu gusuanguluga guavula, hene azuelele egi: “Tamegenu Samsona aze atulelese.” Azolele Samsona mu bologo ha gualelesa; amuhagele hakatshi na katshi dia makunji.
26 Samsona wawambelele mona wa yala wakhalele gumukuata gu koko egi: “Ngukuatese ha gukuata makunji adi mukuata tempelo hagula nguzegemene guene.”
27 (Tempelo yakhalele ya guzala pha nu mala nu akhetu. Mafumu agasue a enya Filistiya akhalele guene, akhetu nu mala 3 000 akhalele holu dia yangi mutala luholo Samsona wakhalele gualelesa.)
28 Samsona wabubidile Yehowa egi: “Yehowa Fumu Wabalega Gukoma, ngabuba ngutangize, nguhane ngolo, Nzambi ngabuba nguhane ngolo phamba mbala eyi, ngukuatese ha guvutula gubola gudi enya Filistiya mukunda nu diso diami dimoshi.”
29 Samsona wazegemene gu makunji mbadi akhalele mukuata tempelo, wakuatele kunji dimoshi nu koko dienji dia madia, uvi diko nu koko dienji dia mahidi.
30 Wakalugile egi: “Ngudi mufua hamoshi nu enya Filistiya!” Gungima walutuile makunji nu ngolo jienji jiagasue, tempelo yabuidile mafumu nu athu agasue akhalele mukatshi. Samsona washiyile athu avula mu lusugu lua gufua guenji gubalega hakhalele muene nu monyo.
31 Gungima aphangi’enji nu athu agasue a mu fami ya sh’enji abulumugile ha guzula kimbi gienji. Akandugile nagio, ayile gumufunda mu malumba a sh’enji Manowa hakatshi dia dimbo dia Sola nu Eshetaole. Samsona watuamezele enya Isalele ivo 20.
Mbimbi goshi'a diyiji
^ Nga “mutshi akhalele mukalegela ha gutunga milele.”
^ Mu Hebelu: “sendese mu vumo dia mama.”
