Manzuji 17:1-13
-
Isongo ya Mika nu nganga-nzambi wenji (1-13)
17 Guakhalele nu yala mumoshi gu khanda ya milundu ya Efrayime jina dienji Mika.
2 Wawambelele gin’enji egi: “Ngaguvuile muta mukumbu mukunda nu makuta 1 100 a utadi wa siliva agutotele. Makuta ene enyawa, ame ngaazanguile. Gungima gin’enji wazuelele egi: “Yehowa akuatese mun’ami.”
3 Mika wavutuile makuta 1 100 a utadi wa siliva gudi gin’enji, uvi gin’enji wazuelele egi: “Ngudi muhana makuta awa gudi Yehowa, ngudi mutshigina egi waakalegele ha gulonda gifuanesa nu gisongo gia utadi. Ngudi guguvutudila nawo.”
4 Havutudile muene makuta gudi gin’enji, gin’enji wazudile makuta 200 a utadi wa siliva waahanele gudi mbembo. Mbembo walondele gifuanesa nu gisongo gia utadi; ayihagele monzo ya Mika.
5 Mika wakhalele nu inzo imoshi yakhalele nu nzambi jia isongo muene, walondele efode nu gisongo gia telafime,* wabuishile mun’enji mumoshi nganga-nzambi wenji.
6 Mu masugu ene, gu Isalele guakhalelego nu fumu. Muthu nu muthu wakhalele mutshita ndaga yakhalele gumusuanguluisa.*
7 Guakhalele nu muvuala wa yala mumoshi gu Beteleheme mu mavu a enya Yuda, wakhalele mu fami ya enya Yuda.* Muvuala muene wakhalele muenya Levi, wakhalele guene mukunda nu tangua diazonda.
8 Muthu muene wakatugile gu Beteleheme mu mavu a enya Yuda ha guya mukamba fundo dia gukhala. Hakhalele muene muya, wahetele gu khanda ya milundu ya Efrayime gumbo dia Mika.
9 Mika wamuhudile egi: “Wakatuga gui?” Muene wamuvutudile egi: “Ngudi muenya Levi, ngakatuga gu Beteleheme mu mavu a enya Yuda, ngumuya nu gukamba fundo dia gukhala.”
10 Mika wamuwambelele egi: “Khala nu ame haha, ubue nganga-nzambi wami nu muhanyi wami wa malongo.* Givo nu givo mbangukhala guguhana makuta kumi a utadi wa siliva nu milele yabonga nu ima ya gudia.” Muenya Levi muene wanginyile monzo yenji.
11 Muenya Levi muene watshiginyile gukhala gumbo dia Mika, wabuile gifua mun’enji.
12 Mika wamubuishile nganga-nzambi wenji, hene muvuala wa yala muene wasalele monzo yenji.
13 Mika wazuelele egi: “Henyaha ngudi mujiya egi Yehowa mbawungukalegela ndaga mu luholo luabonga handaga muenya Levi wabua nganga-nzambi yami.”
Mbimbi goshi'a diyiji
^ Nga “nzambi jia mu fami; isongo.”
^ Nga “ndaga idi yabonga gu meso enji.”
^ Yajiya gukhala egi: “wakhalele mu mavu a enya Yuda.”
^ Nga “tata.”
