Manzuji 18:1-31
18 Mu masugu ene, guakhalelego nu fumu gu Isalele. Mu masugu ene enya giphuta gia Dane akhalele muya nu gukamba fundo dia gukhala handaga akhalele khenji aheta galego khapho dia mavu mukatshi dia iphuta ya enya Isalele.
2 Enya giphuta gia Dane atumine mala mutano a ngolo nu atema ha guya mutala gifutshi; mala ene akhalele enya giphuta giawo, akatugile mu dimbo dia Sola nu dia Eshetaole. A awambelele egi: “Ndenu mutale gifutshi.” Tangua ahetele gu khanda ya milundu ya Efrayime, ayile gumbo dia Mika, abandele guene.
3 Tangua ahetele hehi nu inzo ya Mika, avile dijui dia muvuala wa muenya Levi, ayile hehi n’enji amuhudile egi: “Nanyi wagubatele haha? Itshi wana tshita haha? Mukunda natshi wana khala haha?”
4 Waakotelesele ndaga jiagasue jiamukalegele Mika, waawambelele egi: “Mika wanguzudi ha gubua nganga-nzambi wenji.”
5 Athu ene amuwambelele egi: “Tuabuba, tuhudile Nzambi ha gujiya gula mu njila tudi muya ndaga mbajibalega muabonga.”
6 Nganga-nzambi waawambelele egi: “Ndenu mu guhuima, Yehowa udi nu enue.”
7 Mala ene mutano ayile, ahetele gu dimbo dia Layisha. Tangua ahetele guene, asangele athu mujinga mu ubambi gifua enya gu Sidona. Akhalelego nu funu nga ya ukuateshi wa muthu mumoshi, athu a mu dimbo diene akhalele mu guhuima, guakhalelego nu muthu wajiya guahana woma, guakhalelego nji nga nu mbundudi mumoshi wajiya guasagesa mu gifutshi giawo. Akhalele gualeha nu enya Sidona, akhalelego nji nu ufuta nu enya mu membo a hehi.
8 Tangua mala ene avutugile gudi aphangi’awo gu dimbo dia Sola nu dia Eshetaole, a ahudile egi: “Ndaga jiabalega gikuatshi?”
9 Ene a avutudile egi: “Mavu tuayi mutala adi abonga diago, tuyenu tualuise. Mukunda natshi mudi muvua woma? Tuyenu muphushi tutambule mavu ene.
10 Gula muaheta guene, mbamumona egi athu ene ashigo nu muthu wajiya guahana woma, mavu awo nji adi akoma. Nzambi wamihanyi nawo, adi nu ima yagasue.
11 Mala 600 a mu giphuta gia Dane akhalele nu iluilo ya ita akatugile gu dimbo dia Sola nu dia Eshetaole.
12 Ayile mutunga phundo yawo gu Kiriyate-Yalima mu mavu a enya Yuda. Gishina giene ana tamega fundo diene egi Mahane-Dane* uu nu mangino. Fundo diene diana khala gu khanda ya mayilo a kumbi a Kiriyate-Yalima.
13 Tangua akatugile fundo diene, ayile gu khanda ya milundu ya Efrayime, ahetele gumbo dia Mika.
14 Mala mutano anyi ayile mutala dimbo dia Layisha, awambelele aphangi’awo egi: “Mudi mujiya egi mu jinzo eji mudi nu efode nu isongo ya telafime* nu gifuanesa nu gisongo gia utadi ba? Tangizenu ndaga mudi naye gutshita.”
15 Amaganele ha fundo diene, ayile gudi muvuala wa muenya Levi wakhalele gumbo dia Mika, amuhudile gula udi gikuatshi.
16 Mu tangua diene, mala agasue 600 a mu giphuta gia Dane akhalele nu iluilo, amaganele ha mufulo.
17 Mala anyi mutano ayile mutala dimbo anginyile monzo, azanguile gifuanesa nu efode nu isongo ya telafime* nu gisongo gia utadi. (Nganga-nzambi wakhalele wa gumagana ha mufulo nu athu 600 anyi akhalele nu iluilo ya ita.)
18 Anginyile monzo ya Mika azudile gifuanesa nu efode nu isongo ya telafime* nu gisongo gia utadi. Nganga-nzambi waahudile egi: “Itshi mudi mutshita?”
19 Uvi amuwambelele egi: “Hena tedie, uzuedigo nga gima. Iza tuye ubue nganga-nzambi wetu nu muhanyi wetu wa malongo.* Watshigina gukhala nganga-nzambi mukunda nu inzo ya muthu mumoshi, nga watshigina gubua nganga-nzambi mukunda nu giphuta nu fami jiavula jia gu Isalele?”
20 Nganga-nzambi wasuangulugile nu ndaga yene, wazudile efode nu isongo ya telafime* nu gifuanesa, wayile nu athu ene.
21 Alanduile guya, ahagele an’awo nu shitu jiawo nu ima yawo ya ndando gutuama diawo.
22 Tangua ahetele ndambo gualeha nu inzo ya Mika, athu anyi akhalele nu jinzo hehi nu inzo ya Mika adibungishile, ahatele enya giphuta gia Dane a akuatele.
23 Atamegele enya giphuta gia Dane mu dijui diakola, enya giphuta gia Dane abalumugile, ahudile Mika egi: “Mulonga utshi? Mukunda natshi muaza nu athu avula ngenyi?”
24 Muene waavutudile egi: “Muazangula nzambi jiami ngalondele, muazangula nji nu nganga-nzambi. Ame itshi ngasala nayo? Henyaha mudi gunguhula egi, ‘Mulonga utshi?’”
25 Enya giphuta gia Dane amuwambelele egi: “Utubalelago; gula ndo athu awa adi nu khabu aza guguluisa, wajiya gudikambela gufua nu aye nu athu a monzo yaye.”
26 Gungima enya giphuta gia Dane ayile gawo; Mika wakotelesele egi akhalele nu ngolo jiavula gumubalega, hene wavutugile gumbo dienji.
27 Hazudile ene ima ya Mika nu nganga-nzambi wenji, ayile gu Layisha. Enya gu Layisha akhalele mu guhuima, guakhalelego nu muthu wajiya guahana woma. A ashiyile nu phogo, ambile dimbo diawo tshuya.
28 Guakhalelego nga nu muthu mumoshi ha guhuluisa dimbo diene handaga diakhalele gualeha nu Sidona, akhalelego nji nu ufuta nga nu dimbo dimoshi, dimbo diawo diakhalele mu baba dia Bete-Lehoba. Enya giphuta gia Dane atungile luko dimbo diene, akhalele guene.
29 Ahanele dimbo diene jina egi Dane; Dane wakhalele sh’awo, mun’a Isalele. Uvi dimbo diene diakhalele thomo mutamegewa egi Layisha.
30 Gungima, enya giphuta gia Dane azudile gifuanesa atambudile gudi Mika, agihagele mu dimbo diene. Abuishile nji Yonatana nu an’enji a mala nganga-nzambi mu giphuta gia Dane uu nu lusugu athu ayile mu uhiga. Yonatana wakhalele mun’a Geleshoma, Geleshoma wakhalele mun’a Moize.
31 Ahagele gifuanesa gialondele Mika guene, giakhalele guene masugu agasue akhalele inzo* ya Nzambi wa giamatshidia gu Shilo.
Mbimbi goshi'a diyiji
^ Yakotelesa egi: “phundo ya Dane.”
^ Nga “nzambi jia mu fami; isongo.”
^ Nga “nzambi jia mu fami; isongo.”
^ Nga “nzambi jia mu fami; isongo.”
^ Nga “tata.”
^ Nga “nzambi jia mu fami; isongo.”
^ Nga “inzo ya tenta.”
