Manzuji 19:1-30
-
Enya giphuta gia Benjame azangela mukhetu mumoshi gu Gibea (1-30)
19 Mu masugu ene, tangua enya Isalele akhalelego nu fumu, muenya Levi mumoshi wakhalele mukhala gualeha gu khanda ya milundu ya Efrayime, wazudile mukhetu wa gu Beteleheme mu mavu a enya Yuda ha gubua mukaji’enji.
2 Uvi mukhetu muene wasendesele gukalagala uthambi nu mala ako, wabembele mulumi’enji, wavutugile gumbo dia sh’enji gu Beteleheme mu mavu a enya Yuda. Wakalegele guene mbeji nguana.
3 Gungima mulumi’enji wamulanduile ha guya gumububila hagula avutuge gumbo dienji; wayile nu muenya mudimo wenji nu phunda mbadi. Mukhetu muene wamunginyishile monzo ya sh’enji. Tangua sh’enji wamonele yala muene, wasuangulugile muavula.
4 Giwaji gia yala muene wamububidile ha gukhala nawo masugu thathu; gungima adile, anuile, yala muene wabandele guene.
5 Mu lusugu lua nguana mu gimenegena, azugile ha guya; giwaji gienji wamuwambelele egi: “Iza udie hagula uhete ngolo gungima muajiya guya genu.”
6 Akhalele hashi, gungima ene agasue muyadi adile nu anuile; giwaji gienji wamuwambelele egi: “Ngabuba, tubande luko mangino hagula tubalegese tangua diabonga.”
7 Hazugile muenya Levi muene ha guya, giwaji gienji wasendesele gumububila, muenya Levi muene wabandele luko ha fundo diene.
8 Mu lusugu lua thano yala muene wazugile nu gimenegena giagasue ha guya, uvi giwaji gienji wamuwambelele egi: “Ngabuba, iza udie hagula uhete ngolo.” Hene akhalele, adia, abalegesa tangua uu nu mu ngueze.
9 Tangua yala muene nu mukaji’enji nu muenya mudimo wenji azugile ha guya, giwaji gienji wamuwambelele egi: “Tala! Ngueze idi mutshigina gubua, ngabuba bandenu. Guma gumutshigina gubuita. Bandenu luko mangino hagula mubalegese tangua diabonga. Hamene muajiya guzuga nu gimenegena giagasue hagula uvutuge gumbo diaye.”*
10 Uvi yala muene gatshiginyilego luko gubanda ha fundo diene, wazugile, wayile uu nu gu Yebuse, yakotelesa egi Yelusalema. Wakhalele nu mukaji’enji nu muenya mudimo wenji nu phunda mbadi jiakhalele mubata inemo.
11 Tangua ahetele hehi nu Yebuse, guma guasendesele gubuita. Muenya mudimo wawambelele fumi’enji egi: “Tuajiya gubanda mu dimbo edi dia enya Yebuse ba?”
12 Uvi fumu wenji wamuwambelele egi: “Tuajiyilego gubanda mu dimbo dia athu ashigo enya Isalele. Tudi muya uu nu gu Gibea.”
13 Wamuwambele luko egi: “Tukolesele tuhete gu Gibea nga gu Rama ngenyi tuajiya gubandela guene.”
14 Alanduile guya, hahetele ene hehi nu Gibea mu mavu a enya Benjame, tangua diasendesele gushiwuga.
15 Amaganele, ayile mu dimbo dia Gibea ha gubanda guene. Tangua anginyile mu dimbo diene, ayile mukhala ha zando,* uvi guakhalelego nga nu muthu mumoshi waayambele gumbo dienji hagula abande guene.
16 Mu nguenze yene, kota dia yala mumoshi wakatugile gu mahia, wakhalele muvutuga mu dimbo. Wakhalele muenya gu khanda ya milundu ya Efrayime, uvi mu masugu anyinyi wakhalele gu Gibea; enya gu Gibea akhalele enya giphuta gia Benjame.
17 Kota dia yala muene wamonele yala muene ha zando, wamuhudile egi: “Wakatuga gui, udi muya gui?”
18 Wamuvutudile egi: “Tuakatuga gu Beteleheme mu mavu a enya Yuda, tudi muya gualeha gu khanda ya milundu ya Efrayime, guene gumbo dietu. Ngayile gu Beteleheme mu mavu a enya Yuda, uvi henyaha ngudi muvutuga gu inzo ya Yehowa,* uvi mu dimbo edi gushigo nga nu muthu mumoshi wa gunguyamba gumbo dienji.
19 Tudi nu muangu nu ima ya gudia yavula mukunda nu phunda jietu, tudi nji nu mapha nu vinyo mukunda nu ame nu mukaji’ami nu muenya mudimo wetu. Tudi getu nu ima yagasue.”
20 Uvi kota dia yala muene wamuwambelele egi: “Khala mu guhuima! Ngudi gugukuatesa nu ima yagasue udi nayo funu. Uvi ubandjigo ha zando.”
21 Wayile nawo gumbo dienji, wahanele phunda ima ya gudia gungima awevele malu awo, adile nu anuile.
22 Hakhalele ene monzo, mbundudi jia mu dimbo diene jiajietele inzo, jiakhalele mubunda ha mufulo. Jiakhalele muwambela fumi’a inzo egi: “Zola yala wanginyi monzo yaye, hagula tubungise n’enji muila.”
23 Fumi’a inzo wazogele hanze, waawambelele egi: “Ngabuba aphangi, mutshitshigo ndaga yabola. Muthu yowu udi ngenji yami. Mutshitshigo ndaga eyi ya musonyi.
24 Ngudi nu mun’ami wa mukhetu udi khenji gabungishilego muila nu mala. Ngudi gumizolela n’enji nu mukaji’a muthu muene mubungise nawo muila gula yene ndaga mudi diago mutshigina gukalagala.* Uvi mukalagalago ndaga eyi ya musonyi gudi muthu yowu.”
25 Uvi ene atunyile gumutegelela, hene muenya Levi wakuatele mukaji’enji, wamuzolele hanze. Abungishile n’enji muila gu ngolo nu amuzangelele phipha inyi yagasue uu nu mu gimenegena. Hatshiele gisugu, amubembele.
26 Mukhetu muene wajile nu gimenegena giagasue gu inzo yakhalele mulumi’enji,* wabuile ha mufulo, wasalele wa gubanda uu nu hatshiele guma.
27 Tangua mulumi’enji wazogele mu gimenegena, wakangudile mufulo wa inzo ha guya genji, wamonele mukaji’enji wa gubua ha mufulo wa inzo mago enji holu dia khalagaga.*
28 Wamuwambelele egi: “Zuga tuye.” Uvi mukaji’enji gazuelelego nga gima. Gungima wamutuphuile, wamuhagele holu dia phunda wayile n’enji gumbo dienji.
29 Tangua ahetele gumbo dienji, wazudile ga phogo, wabatuile mukaji’enji mu itshinyi 12, watumine gitshinyi gimoshi-gimoshi mu iphuta yagasue ya enya Isalele.
30 Athu agasue ayimonele azuelele egi: “Ndaga ya luholo elu khenji yakalegewe gale ndo, khenji tuamonele gale ndo ndaga ya luholo elu sendese enya Isalele azogele mu mavu a Ejipitu uu nu mangino. Tadilenu mulonga owu muabonga diago mutuwambele itshi tudi naye gutshita.”
Mbimbi goshi'a diyiji
^ Mu Hebelu: “tenta.”
^ Nga “gisalo.”
^ Nga ndo, yajiya gukhala egi: “ngana tshita mudimo mu inzo ya Yehowa.”
^ Nga : mutshite yagasue yamibongela.”
^ Mu Hebelu: “fumi’enji.”
^ Khalagaga idi mutshi nga baya ana haga goshi’a gijidigo.
