Manzuji 2:1-23
2 Muanjelo wa Yehowa wakatugile gu Gilegale wakandugile gu Bokime, wazuelele egi: “Ngamizolele gu Ejipitu ha guminginyisa mu mavu ngalayele akhakh’enu. Ngazuelele nji egi: ‘Mbangushiyigo nga hazonda gikotelo ngakotele n’enu.
2 Mushigo naye gukota gikotelo nu athu a mu gifutshi gigi, mudi naye gumuanga iwotshielo yawo.’ Uvi enue muangutumagelego. Mukunda natshi muatshitshile ngenyi?
3 Gishina giene ngazuelele luko egi: ‘Mbangushigo guakaya gutuama dienu, mbaabua muheto mukunda nu enue, mbaamihuiga ha gukombelela nzambi jiawo.’”
4 Hamanesele muanjelo wa Yehowa guwambela enya Isalele mbimbi eji, athu agasue asendesele gudila mangololo.
5 Atamegele fundo diene egi Bokime,* ahanele Yehowa milambu ha fundo diene.
6 Tangua Yoshua wawambelele enya Isalele ha guvutuga, muthu nu muthu wavutugile mu mavu enji amuhanewe.
7 Athu alanduile gukombelela Yehowa masugu agasue akhalele Yoshua nu monyo, nu mu masugu agasue a akulu a mu tangua dienji anyi asalele nu monyo. Akulu ene amonele ndaga jia gushimana jiakalegele Yehowa mukunda nu enya Isalele.
8 Gungima Yoshua mun’a Nune, mukombeledi wa Yehowa, wafuile nu ivo 110.
9 Amufundjile gu Timenata-Helese, mu mavu enji amuhanewe, mu milundu ya Efrayime gu nord ya mulundu wa Gashi.
10 Athu agasue a gindongo giene afuile. Athu a gindongo giajile gungima ajiyilego Yehowa nga ndaga jiakalegele muene mukunda nu Isalele.
11 Enya Isalele akalegele ndaga jiabola gu meso a Yehowa, asendesele gukombelela nzambi jia Bale.
12 Abembele Yehowa Nzambi wa akhakh’awo waazolele mu mavu a Ejipitu. Asendesele gukombelela nzambi jiko, nzambi jia athu akhalele nawo hehi. Akhalele gujifugamela, ahanele diago Yehowa khabu.
13 Abembele Yehowa, asendesele gukombelela Bale nu ifuanesa ya Ashitolete.
14 Ndaga yene yahanele Yehowa khabu jiavula, wabembele egi mbundudi jikuye ima yawo. Waahanele ha mago a mbalagaji jiawo, akhalelego luko nu luholo lua gubinga mbalagaji jiene.
15 Guagasue guakhalele muya ene, Yehowa wakhalele gualuisa, wakhalele guabatela malamba gifua luholo Yehowa waawambelele, nu luholo Yehowa waalayele. Amonele diago malamba avula.
16 Yehowa wakhalele guahana manzuji akhalele guahuluisa ha mago a athu akhalele guasagesa.
17 Uvi atunyile gutegelela nu ene manzuji, asendesele gukombelela* nzambi jiko, akhalele nji gujifugamela. Abembele muphushi gulandula gifezegeselo gia akhakh’awo akhalele mutumagela mikhuala ya Yehowa. Atshitshilego ndaga gifua akhakh’awo.
18 Tangua diagasue diakhalele Yehowa guazolela nzuji, Yehowa wakhalele mukuatesa nzuji muene; wakhalele guahuluisa ha mago a mbalagaji jiawo hakhalele nzuji muene nu monyo. Yehowa wakhalele guavila khenda handaga akhalele mudila mukunda nu malamba akhalele guamonesa mbalagaji jiawo nu luholo akhalele guasagesa.
19 Uvi gula nzuji muene wafua, akhalele luko mutshita ndaga jiabola gubalega akhakh’awo. Akhalele mutumagela nzambi jiko, gujikombelela nu gujifugamela. Akhalele mito yakola, abembelego makalegelo awo abola.
20 Gungima dienji Yehowa wavuile khabu jiabala, wazuelele egi: “Gifutshi gigi giangulumbugila, giatuna gunemesa gikotelo ngatshitshile nu akhakh’awo,
21 gishina giene, mbangushigo mukaya ifutshi yagasue inyi Yoshua gabingilego hakhalele muene nu monyo.
22 Mbangutshita ngenyi ha gutala gula enya Isalele mbaalandula guwenda mu njila jia Yehowa gifua muatshitshile akhakh’awo.”
23 Yehowa wabembele ifutshi yene, gayikayelego muphushi, gayihanelego nji ha mago a Yoshua.
