Manzuji 20:1-48
-
Isalele yaluisa giphuta gia Benjame (1-48)
20 Gungima enya Isalele agasue akatugile sendese gu Dane* uu nu gu Belesheba nu gu Gileade, mukut’awo agasue adibungishile hunji dimoshi* gutuama dia Yehowa gu Mispa.
2 Mafumu agasue a athu nu a iphuta yagasue ya enya Isalele akhalele mu gudibungisa* guene gua athu a Nzambi. Guakhalele nu masuta 400 000 akhalele nu phogo jia ita.
3 Enya giphuta gia Benjame avuile egi mala a gu Isalele akanduga gu Mispa.
Gungima mala ene a gu Isalele ahudile athu akhalele hene egi: “Tuwambelenu, luholo lutshi ndaga eyi yabola yakalegewe?”
4 Muenya Levi, mulumi’a mukhetu munu washiyiwe, waavutudile egi: “Ame nu mukaji’ami tuahetele gu Gibea mu mavu a enya giphuta gia Benjame ha gubanda guene.
5 Uvi mu phipha enya gu Gibea* akhalele mutshigina gungutshita gubola. Ajietele inzo ngakhalele, atshiginyile gungushiya, uvi abungishile muila nu mukaji’ami gu ngolo, gungima wafuile.
6 Ngazudile kimbi gia mukaji’ami, ngagibatuile itshinyi-itshinyi, ngatumine itshinyi yene mu iphuta yagasue ya enya Isalele, handaga athu awa akalagala ndaga ya musonyi nu ya khuta gu Isalele.
7 Henyaha enue athu agasue a gu Isalele, hanenu matangi nu malongo enu luenyelu.”
8 Athu agasue a gu Isalele azugile hamoshi,* azuelele egi: “Nga muthu mumoshi gashigo muvutuga gu tenta yenji nga gu inzo yenji.
9 Talenu ndaga tuya mutshita enya gu Gibea: Tutenu mubela ha gujiya athu mbaaya gualuisa.
10 Tuza muzula athu 10 mukatshi dia athu 100 mu iphuta yagasue ya Isalele, athu 100 mukatshi dia athu 1 000, athu 1 000 mukatshi dia athu 10 000 ha gukungula ima ya gudia mukunda nu masuta, hagula masuta ene aye aluise enya gu Gibea mu mavu a enya giphuta gia Benjame mukunda nu ndaga ya musonyi yakalagala ene gu Isalele.”
11 Mala agasue a gu Isalele adivuile, adibungishile fundo dimoshi* ha guya muluisa dimbo dia Gibea.
12 Enya iphuta ya Isalele atumine mbimbi gudi mala agasue a mu giphuta gia Benjame egi: “Ndaga itshi yabola yakalegewa mukatshi dienu?
13 Henyaha zolenu mbundudi jia gu Gibea hagula tujishiye ha gukatula ndaga jiabola gu Isalele.” Uvi enya giphuta gia Benjame atunyile gutegelela aphangi’awo enya Isalele.
14 Enya giphuta gia Benjame azogele mu membo awo, adibungishile ha guya muluisa enya Isalele gu Gibea.
15 Mu lusugu luene, enya giphuta gia Benjame abungishile mala 26 000 a mu membo awo, mala ene akhalele nu phogo jia ita. Guakhalele nji nu mala ako 700 atombewe mukatshi dia mala a gu Gibea.
16 Mukatshi dia masuta ene, guakhalele nu mala 700 atombewe anyi akhalele mukuatela ima gu koko dia mahidi. Mukut’awo agasue akhalele mujiya gusonona maseso muabonga; gula asonona, akhalelego gudifula nga gasanga ga gu muto.
17 Enya iphuta iko ya Isalele atamegele mala 400 000 akhalele nu phogo jia ita, mala ene akhalele mujiya gulua ita muabonga.
18 Azugile, akandugile gu Betele ha guhula Nzambi. Enya Isalele ahudile egi: “Nanyi mukatshi dietu udi naye gudiangela guya muluisa enya giphuta gia Benjame?” Yehowa waavutudile egi: “Enya giphuta gia Yuda adi naye gudiangela guya.”
19 Gungima dienji, enya Isalele azugile mu gimenegena, ahagele phundo yawo hehi nu dimbo dia Gibea.
20 Mala a gu Isalele azogele, ayile muluisa enya giphuta gia Benjame; adilondele ha gualuisa hehi nu dimbo dia Gibea.
21 Enya giphuta gia Benjame azogele mu dimbo dia Gibea, ashiyile mala a gu Isalele 22 000 mu lusugu luene.
22 Uvi masuta a enya Isalele amonesele diago gikhesa, adilondele luko ha gulua ita ha fundo akhalele mu lusugu lua thomo.
23 Enya Isalele akandugile gu Betele, adidile gutuama dia Yehowa uu nu mu ngueze; awambelele Yehowa egi: “Tuya luko muluisa aphangi’etu enya giphuta gia Benjame ba?” Yehowa waawambelele egi: “Ndenu mualuise.”
24 Mu lusugu lua mbadi, enya Isalele ayile luko hehi nu enya giphuta gia Benjame.
25 Enya giphuta gia Benjame azogele mu dimbo dia Gibea ha gualuisa mu lusugu lua mbadi, ashiyile mala a gu Isalele 18 000 akhalele nu phogo jia ita.
26 Mala a gu Isalele agasue akandugile gu Betele. Akhalele guene gutuama dia Yehowa, adidile, mu lusugu luene, atunyile gudia uu nu mu ngueze. Ahanele milambu ya guwotshia nu milambu ya guhuima gutuama dia Yehowa.
27 Gungima mala a gu Isalele ahudile Yehowa, handaga mu masugu ene mushete wa gikotelo wa Nzambi wa giamatshidia wakhalele gu Betele.
28 Mu masugu ene, Fineyase mun’a Eleazale mujigulu wa Alona wakhalele mutshita mudimo gutuama dia mushete wa gikotelo. Enya Isalele ahudile egi: “Tuya luko muluisa aphangi’etu enya giphuta gia Benjame nga tubemba getu?” Yehowa waawambelele egi: “Ndenu mualuise, hamene mbangumikuatesa ha guabinga.”
29 Enya Isalele ahagele mala ha gubandemena mu khulo ya dimbo diagasue dia Gibea.
30 Mu lusugu lua thathu, enya Isalele ayile muluisa enya giphuta gia Benjame, adilondele ha guluisa dimbo dia Gibea gifua luholo atshitshile thomo.
31 Tangua enya giphuta gia Benjame azogele ha gualuisa, enya Isalele asendesele guanana gualeha nu dimbo. Enya giphuta gia Benjame atshitshile gifua luholo akalegele thomo, asendesele guluisa enya Isalele nu gushiya ako mu njila jiakoma jidi muya iko gu Betele iko gu Gibea; ashiyile mala a gu Isalele 30 mu temu.
32 Enya giphuta gia Benjame azuelele egi: “Tumuza guabinga gifua luholo tuaabingile thomo.” Uvi enya Isalele azuelele egi: “Tuza mulengela mu njila jiakoma hagula tuanane gualeha nu dimbo.”
33 Mala agasue a gu Isalele akatugile mu mafundo awo, ayile gudilonda gu Bala-Tamale ha gulua ita; mu tangua diene, enya Isalele anyi akhalele mubandemena mu khulo ya dimbo dia Gibea azogele.
34 Gungima masuta 10 000 akhalele mujiya gulua anyi atombewe mukatshi dia mala a gu Isalele ahetele gutuama dia dimbo dia Gibea, ita yakolele diago. Uvi enya giphuta gia Benjame akhalelego mujiya egi ndaga ya lamba yakhalele mutshigina guabuila.
35 Yehowa wakuatesele enya Isalele ha gubinga enya giphuta gia Benjame. Mu lusugu luene enya Isalele ashiyile mala 25 100 a mu giphuta gia Benjame, athu agasue ashiyiwe akhalele nu phogo jia ita.
36 Enya giphuta gia Benjame akhalele mutangiza egi adi mubinga enya Isalele handaga akhalele gualenga. Uvi mu guzuela guabonga enya Isalele akhalele mutshita gifua adi mulenga handaga akhalele musha mutshima gudi masuta akhalele mubandemena mu khulo ya dimbo dia Gibea.
37 Masuta anyi akhalele mubandemena atshitshile muphushi, anginyile mu dimbo dia Gibea. Amuanganene, ashiyile athu agasue a mu dimbo diene nu phogo.
38 Mala a gu Isalele adivuile nu masuta anyi akhalele mubandemena hehi nu dimbo egi adi naye gumba tshuya ha gukanduisa mishi ha guajiyisa egi anginyi gale mu dimbo.
39 Tangua enya Isalele akhalele mutshita gifua adi mulenga ita, enya giphuta gia Benjame asendesele gualuisa, ashiyile mala 30 a gu Isalele. Azuelele egi: “Yadiago, tudi guabinga gifua luholo tuaabingile mu masugu abalega.”
40 Uvi mishi yasendesele guzoga mu dimbo mukanduga gosa, yakhalele gijiyishilo. Tangua enya giphuta gia Benjame abalumugile ha gutala, amonele dimbo diagasue muhia tshuya, mishi mukanduga gosa.
41 Mu tangua diene, enya Isalele abalumugile, asendesele gualuisa. Ndaga yene yahanele enya giphuta gia Benjame woma wakola handaga akotelesele egi lamba diaabuila.
42 Alengele enya Isalele, ayile mu mavu a luselenga, uvi enya Isalele a alanduile; hakhalele mulenga ene, athu ako akhalele muzoga mu membo ha gualuisa.
43 Ajietele enya giphuta gia Benjame, alanduile guahata, ahuidilego. A abingile gutuama dia dimbo dia Gibea gu khanda ya mazogelo a kumbi.
44 Gungima, masuta a enya giphuta gia Benjame 18 000 afuile, mukut’awo agasue akhalele masuta a ngolo.
45 Enya giphuta gia Benjame abalumugile alengele, ayile mu mavu a luselenga gu khanda ya seso diakoma dia Limona. Enya Isalele ashiyile athu 5 000 mu njila jiakoma; a alanduile uu nu gu Gidoma, ashiyile luko athu 2 000.
46 Enya giphuta gia Benjame 25 000 afuile gu ita mu lusugu luene, mukut’awo agasue akhalele nu phogo jia ita, akhalele nji masuta a ngolo.
47 Uvi athu 600 alengele mu mavu a luselenga, adisuegele mu seso ya Limona, akalegele mbeji nguana mukatshi dia seso diene.
48 Enya Isalele abembele gulandula enya giphuta gia Benjame, avutugile mu membo awo, ashiyile athu agasue asalele nu shitu jiawo. Ambile nji membo agasue akhalele mu njila tshuya.
Mbimbi goshi'a diyiji
^ Dane yakhalele gu khanda ya nord, Belesheba yakhalele gu khanda ya sud ya Isalele. Akhalele mukalegela majina awa ha guzuelela gifutshi giagasue gia Isalele.
^ Mu Hebelu: “gifua muthu mumoshi.”
^ Mu Hebelu: “hungu.”
^ Nga ndo, yajiya gukhala egi: “afumi’a mavu.”
^ Mu Hebelu: “gifua muthu mumoshi.”
^ Mu Hebelu: “gifua muthu mumoshi.”
