Manzuji 21:1-25
-
Giphuta gia Benjame giahuluishiwa (1-25)
21 Mala a gu Isalele adilogele gu Mispa egi: “Gushigo nga nu muthu mumoshi mukatshi dietu mbawuhana mun’enji wa mukhetu mu ulo gudi muenya giphuta gia Benjame.”
2 Enya Isalele ajile gu Betele, akhalele hashi gutuama dia Nzambi wa giamatshidia uu nu mu ngueze, akhalele mukaluguga nu gudila mangololo.
3 Akhalele muzuela egi: “Yehowa Nzambi wa Isalele, mukunda natshi ndaga eyi yabua gu Isalele? Mukunda natshi mangino giphuta gimoshi gidi naye gutota gu Isalele?”
4 Mu lusugu lualanduile azugile mu gimenegena, atungile giwotshielo ha fundo diene ha guhana milambu ya guwotshia nu milambu ya guhuima.
5 Enya Isalele azuelele egi: “Mukatshi dia iphuta yagasue ya enya Isalele, nanyi gajilego ha gudibungisa gutuama dia Yehowa?” Handaga adiangele gudiloga egi muthu wagasue watuna guza gutuama dia Yehowa gu Mispa udi naye gushiyiwa.
6 Enya Isalele avuile gikenene giavula mukunda nu ndaga jiabuidile aphangi’awo enya giphuta gia Benjame. Azuelele egi: “Mangino giphuta gimoshi gia Isalele giatota.
7 Itshi tudi naye gutshita ha guhana akhetu gudi mala a enya giphuta gia Benjame anyi asadi? Handaga tuadilogi gale gutuama dia Yehowa egi tuajiyilego guahana an’etu a akhetu ha gudizula nawo mu ulo.”
8 Ahudile egi: “Mukatshi dia iphuta yagasue ya gu Isalele, nanyi gajilego gutuama dia Yehowa gu Mispa?” Akotelesele egi nga muthu mumoshi wa gu Yabeshe ya gu Gileade gajile ndo ha phundo, fundo athu agasue adibungishile.
9 Tangua atangele athu, amonele egi guakhalelego nga nu muthu mumoshi wa gu Yabeshe ya gu Gileade wajile ha fundo diene.
10 Atumine masuta a ngolo 12 000 guene. A awambelele egi: “Ndenu mushiye athu agasue a gu Yabeshe ya gu Gileade ikhale akhetu nga ana.
11 Tala ndaga mudi naye gutshita: Mudi naye gushiya mala agasue; mudi naye nji gushiya akhetu agasue abungishile gale muila nu mala.”
12 Asangele ana a akhetu 400 mukatshi dia enya Yabeshe ya gu Gileade akhalele khenji abungishile gale muila nu mala. Ayile nawo gu phundo yakhalele gu Shilo mu mavu a enya Kanana.
13 Enya Isalele atumile mbimbi gudi mala a enya giphuta gia Benjame anyi akhalele gu seso dia Limona ha gudivua luko nawo.
14 Enya giphuta gia Benjame ajile muvutuga. A ahanele akhetu anyi azanguile gu Yabeshe ya gu Gileade, uvi akhetu ene akhalelego avula mukunda nu mala agasue.
15 Athu avuile gikenene giavula mukunda nu ndaga jiabuidile enya giphuta gia Benjame handaga Yehowa wabatele ukaphumunyi mukatshi dia iphuta ya enya Isalele.
16 Akulu a gu Isalele azuelele egi: “Itshi tutshita ha guhana akhetu gudi mala awa asala? Handaga akhetu agasue a mu giphuta gia Benjame ashiyiwe.”
17 Azuelele egi: “Enya giphuta gia Benjame anyi asala nu monyo adi naye gubamba mavu* awo hagula giphuta gitotshigo mukatshi dia enya Isalele.
18 Uvi tuajiyilego guahana an’etu a akhetu ha gudizula nawo mu ulo, handaga enya Isalele adilogi gale egi: ‘Muthu wagasue mbawuhana mukhetu gudi enya giphuta gia Benjame mbawutewa mukumbu.’”
19 Gungima azuelele egi: “Givo nu givo, wano wa Yehowa wana kalegewa gu Shilo, dimbo didi gu khanda ya nord ya dimbo dia Betele, gu khanda ya mazogelo a kumbi a njila yakoma idi mukatuga gu Betele ha guya gu Shekeme, gu sud ya Lebona.”
20 Awambelele mala a mu giphuta gia Benjame egi: “Ndenu mubandemene mu ilanga ya vinyo.
21 Gula muamona ana a akhetu a gu Shilo azoga ha gukina, muthu wagasue mukatshi dienu azoge mu gilanga gia vinyo adikuatele mukhetu, gungima muvutuge mu mavu enu a enya giphuta gia Benjame.
22 Gula a sh’awo nga aphangi’awo a mala aza gutudidila, mbatuawambele egi: ‘Tuvuilenu khenda mukunda nu athu ene, handaga akhetu atambudiwa gu ita akhalelego avula ha guahana gudi mala agasue. Enue nji muajiyilego guahana an’enu a akhetu handaga muadilogele.’”
23 Mala a mu giphuta gia Benjame atshitshile diago ngenyi. Mukut’awo agasue akuatele mukhetu mumoshi-mumoshi mukatshi dia an’a akhetu akhalele mukina. Gungima avutugile mu mavu awo, atungile luko membo awo, akhalele guene.
24 Mu tangua diene, enya Isalele adimuangele, muthu nu muthu wavutugile mu giphuta gienji nu mu fami yenji; akatugile ha fundo diene, muthu wagasue wavutugile mu mavu enji.
25 Mu masugu ene, gu Isalele guakhalelego nu fumu. Muthu wagasue wakhalele mutshita ndaga jiakhalele gumusuanguluisa.*
