Manzuji 3:1-31
3 Yehowa wabembele egi ifutshi iko isale gu Kanana ha gutala gula enya Isalele anyi amonelego ita ya enya Kanana mbaamutumagela.
2 (Watshitshile ngenyi ha gulongesa indongo ya enya Isalele inyi mbayiza gungima ha gujiya luholo lua gulua ita, handaga akhalele khenji amona galego ndaga jia luholo elu.)
3 Athu asalele enyawa: Mafumu thano a enya Filisitiya, athu agasue a gu Kanana, enya gu Sidona, nu enya Hivi ana khala gu milundu ya Libane, sendese gu mulundu wa Bale-Helemona uu nu gu Lebo-Hamate.*
4 Ifutshi eyi yabembewe ha gutala gula enya Isalele mbaatumagela mikhuala Yehowa wahanele akhakh’awo mu njila ya Moize.
5 Gishina giene enya Kanana nu enya Hete, nu enya Amole, nu enya Phelese, nu enya Hivi, nu enya Yebuse asalele mukatshi dia enya Isalele.
6 Enya Isalele akhalele gudizula mu ulo nu ana a akhetu a mu ifutshi yene, akhalele muhana an’awo a akhetu gudi ana a mala a mu ifutshi yene. Asendesele nji gukombelela nzambi jiawo.
7 Enya Isalele akalegele ndaga jiabola gu meso a Yehowa, abuitshile Yehowa Nzambi wawo mutshima, asendesele gukombelela nzambi jia Bale nu mitshi ya gijila.*
8 Yehowa waavidile khabu jiabala, waahanele ha mago a fumu Kushana-Lishatayima wa gu Mezopotamiya.* Enya Isalele abuile enya mudimo a Kushana-Lishatayima ivo nage.
9 Enya Isalele atogele ukuateshi gudi Yehowa, Yehowa waahanele muhuluishi ha guahuluisa, jina dienji Otenyele mun’a Kenaze, galenge ga Kalebe.
10 Yehowa wamuhanele nyuma, wabuile nzuji ya enya Isalele. Tangua ayile mulua ita, Yehowa wamukuatesele ha gubinga fumu Kushana-Lishatayima wa gu Mezopotamiya.*
11 Gifutshi giakhalele mu guhuima ivo 40. Gungima Otenyele mun’a Kenaze wafuile.
12 Enya Isalele asendesele luko gukalagala ndaga jiabola gu meso a Yehowa. Yehowa wabembele egi fumu Eglone wa gu Moaba a aluise, nu a ahinyine handaga enya Isalele akhalele mukalagala ndaga jiabola gu meso a Yehowa.
13 Eglone wadibungishile nu enya Amona nu enya Amaleke ha guluisa enya Isalele. A aluishile nu atambuile dimbo dia samba.*
14 Enya Isalele abuile enya mudimo wa fumu Eglone wa gu Moaba ivo 18.
15 Gungima enya Isalele atogele ukuateshi gudi Yehowa, Yehowa waahanele muhuluishi, jina dienji Ehuda mun’a Gela muenya giphuta gia Benjame. Ehuda wakhalele mukuatela ima gu koko dia mahidi. Enya Isalele amutumine ha gubatela fumu Eglone wa gu Moaba musomo.
16 Mu tangua diene, Ehuda walondele phogo ya khusa, yakhalele nu ulehelo wa basantimetre 38.* Wayihagele mu shina dia kulu dia madia moshi’a milele.
17 Gungima wayile muhana musomo gudi Eglone fumu wa gu Moaba. Eglone wakhalele muthu wakoma.
18 Tangua Ehuda wahanele musomo, wavutugile nu athu anyi abatele musomo wene.
19 Uvi tangua Ehuda wahetele gu isongo* yakhalele hehi nu Gilegale, wavutugile, wazuelele egi: “Fumu, ngudi nu ndaga imoshi ya gisuegi ya guguwambela.” Gungima fumu wazuelele egi: “Henenu tedie!” Enya mudimo enji agasue azogele.
20 Fumu wakhalele hashi gu sugu yenji ya gosa yahuma. Ehuda wasuenele hehi n’enji, wamuwambelele egi: “Ngumutshigina guguwambela ndaga imoshi yakatuga gudi Nzambi.” Gungima fumu wazugile ha nguasa yenji ya ufumu.
21 Ehuda wazolele phogo nu koko dienji dia mahidi, phogo yene yakhalele gu shina dia kulu dienji dia madia, wayituile fumu mu vumo.
22 Koko dienji dianginyile mu vumo nu phogo yene, maji atshuigile phogo. Ehuda wabembele phogo yene mu vumo dia fumu, tuji tuazogele.
23 Ehuda wakangele mifulo yagasue ya sugu yene, gungima wazogele ha fenetre.*
24 Hayile muene, enya mudimo a fumu anginyile, asangele mifulo ya sugu yene ya gukanga. Azuelele egi: “Yajiya gukhala egi udi gudizunga* mukatshi dia sugu yahuma.”
25 Asendesele gunengena, uvi tangua amonele egi fumu gashigo mukangula mifulo ya sugu yene, avuile gikenene. Gungima azudile saphi akangudile mifulo, asangele fumu wawo hashi* wafui gale!
26 Hakhalele ene mushipha, Ehuda walengele, wabalegele hehi nu isongo,* wahetele muabonga gu Seyila.
27 Tangua diahetele muene gu khanda ya milundu ya Efrayime; washigile phungi, enya Isalele akhalele gu khanda ya milundu abulumugile ha guza gumusanga. Ehuda wasendesele guatuameza.
28 Gungima waawambelele egi: “Ngulandulenu handaga Yehowa wahana mbalagaji jienu enya Moaba ha mago enu. Amulanduile, atambuile mafundo a guzawugila muta wa Yordane ha malu ha gukanga enya Moaba njila hagula azawugago; abembelego nji egi nga mumoshi mukatshi diawo azawuge.
29 Mu tangua diene, enya Isalele ashiyile mala a ngolo nu a gikhesa a enya Moaba 10 000, nga mumoshi galengelego.
30 Mu lusugu luene, enya Isalele abingile enya Moaba; gifutshi giakhalele mu guhuima ivo 80.
31 Gungima dia Ehuda, Shamegala mun’a Anate wazogele, washiyile enya Filisitiya 600 nu mutshi wa sungu-sungu wa gutshingila* ngombe. Muene nji wahuluishile enya Isalele.
Mbimbi goshi'a diyiji
^ Nga “mufulo wa Hamate.”
^ Tala Ukoteleshi wa Mbimbi.
^ Mu Hebelu: “Alama-Nahalayime.”
^ Mu Hebelu: “Alama.”
^ Nga “Yeliko.”
^ Mu Hebelu: “kude imoshi.” Yajiya gukhala kude yahihia. Tala App. B14
^ Nga ndo, yajiya gukotelesa egi, “fundo ana zola maseso.”
^ Nga ndo, yajiya gukhala egi, “mawina ana nginyishila muhehe.”
^ Mu Hebelu: “udi mutshuiga malu enji.” Nga “wazenguluga gu tshutshu.”
^ Mu Hebelu: “mu mavu.”
^ Nga ndo, yajiya gukhala egi, “fundo ana zola maseso.”
^ Nga “guseyela.”
