Manzuji 4:1-24
4 Uvi tangua Ehuda wafuile, enya Isalele asendesele luko gukalagala ndaga jiabola gu meso a Yehowa.
2 Yehowa wabembele egi fumu Yabine ya gu Kanana munu wakhalele mutuameza dimbo dia Hasole a ahinyine. Fumu wa masuta enji wakhalele gu Haloshete-ha-goyime,* jina dienji Sisera.
3 Enya Isalele atogele ukuateshi gudi Yehowa handaga Yabine* wakhalele nu phusu-phusu jia ita 900 jiakhalele nu phogo jia utadi.* Waamonesele lamba ivo 20.
4 Mu sungi yene, profete Debora mukaji’a Lapidota, wakhalele nzuji gu Isalele.
5 Wakhalele mukhala ha mushin’a samba ya Debora. Samba yene yakhalele hakatshi, gugu Rama gugu Betele mu milundu ya Efrayime. Enya Isalele akhalele muya gudi muene ha gujiya matangi a Nzambi.
6 Watumine mbimbi gudi Balaka mun’a Abinowama wa gu dimbo dia Kedeshe-Nefetali egi: “Yehowa Nzambi wa Isalele wazuela egi, ‘zula athu 10 000 a mu giphuta gia Nefetali nu gia Zabulona uye nawo gu mulundu wa Tabola.
7 Mbangudi gugubatela Sisera fumu wa masuta a Yabine nu phusu-phusu jienji jia ita nu masuta enji gu gamuta* ga Kishiona, mbangugukuatesa ha gumubinga.’”
8 Uvi Balaka wamuwambelele egi: “Gula watshigina guya nu ame, ngudi muya naye; uvi gula watuna gaye, ame nji ngushigo muya.”
9 Debora wamuwambelele egi: “Ayi, ngumuya naye. Uvi mbawushigo muheta lutumbu lua ita udi mutshigina guya mulua, handaga Yehowa mbawuhana Sisera ha mago a mukhetu ha gumushiya.” Gungima Debora wayile nu Balaka gu dimbo dia Kedeshe.
10 Balaka watamegele enya giphuta gia Zabulona nu enya giphuta gia Nefetali gu Kedeshe, athu 10 000 amuhatele. Debora nji wakandugile nawo.
11 Hebele muenya Kena wadikaphele nu enya Kena ako, ajigulu a Hobaba givuaji gia Moize. Watungile tenta yenji hehi nu mutshi wakoma wa Sananima udi hehi nu Kedeshe.
12 Awambelele Sisera egi Balaka mun’a Abinowama wakanduga gu mulundu wa Tabola.
13 Mu tangua diene Sisera wabungishile phusu-phusu jienji jiagasue jia ita 900 jiakhalele nu phogo jia utadi,* nu masuta enji agasue anyi akatugile n’enji gu Haloshete-ha-goyime ha gubulumuga gu gamuta* ga Kishiona.
14 Debora wawambelele Balaka egi: “Zuga, handaga mangino Yehowa udi gugukuatesa ha gubinga Sisera. Yehowa udi gugutuameza.” Balaka wabulumugile gu mulundu wa Tabola, athu 10 000 akhalele gumulandula.
15 Tangua Balaka wakhalele muluisa Sisera, Yehowa wabuishile phusu-phusu jiagasue jia ita jia Sisera nu masuta enji agasue tunga-tunga. Gungima Sisera watulugile ha phusu-phusu yenji, walengele ha malu.
16 Balaka walanduile phusu-phusu jia ita jia Sisera uu nu gu Haloshete-ha-goyime. Washiyile masuta agasue a Sisera nu phogo; nga mumoshi gasalelego.
17 Uvi Sisera walengele ha malu, wangina mu tenta ya Yaele mukaji’a Hebele muenya Kena handaga fumu Yabine wa gu Hasole wakhalele gudivua muabonga nu Hebele muenya Kena.
18 Gungima Yaele wayile mutagana Sisera, wamuwambelele egi: “Ngina fumu wami, ngina haha. Uvuigo woma.” Sisera wanginyile mu tenta yenji, Yaele wamutshuigile mbulaketa.
19 Gungima Sisera wawambelele Yaele egi: “Ngabuba nguhane ndambo ya meya ngunue, ngumuvua luhungu.”* Yaele wazanguile miliki yakhalele mu mulondo wa gilema gia shitu wamuhanele ha gunua, gungima wamutshuigile luko mbulaketa.
20 Sisera wamuwambelele egi: “Magana ha mufulo wa tenta, gula muthu weza guguhula egi ‘gudi nu muthu haha?’ muwambele egi: ‘Ndo!’”
21 Sisera wahuidile muavula, tangua diabandele muene tulo tuakola, Yaele mukaji’a Hebele wazudile mutshi ana khokhela tenta nu marto. Wasuenele mage-mage gudi muene, wamukhokhele mutshi wa tenta mu muto, mutshi wene wanginyile uu nu mu mavu, Sisera wafuile.
22 Balaka wayile nu guhata Sisera, Yaele wazogele ha guya gumutagana, wamuwambelele egi: “Za umone muthu udi mukamba.” Anginyile mu tenta, wamonele Sisera hashi wa gufua nu mutshi wa tenta wa gukhokha mu muto wenji.
23 Mu lusugu luene, Nzambi wahanele Yabine fumu wa enya Kanana musonyi gutuama dia enya Isalele.
24 Enya Isalele asendesele guluisa Yabine fumu wa gu Kanana muavula diago uu nu tangua amushiyile.
Mbimbi goshi'a diyiji
^ Nga “Haloshete ya Ifutshi.”
^ Mu Hebelu: “muene.”
^ Mu Hebelu: “phusu-phusu jia utadi.”
^ Nga “baba dia.”
^ Mu Hebelu: “phusu-phusu jia utadi.”
^ Nga “baba.”
^ Nga “phuila.”
