Manzuji 5:1-31
5 Mu lusugu luene, Debora nu Balaka mun’a Abinowama ayimbile lungimbo elu:
2 “Tumbuisenu Yehowa!
Handaga gu Isalele masuta ajitulula masanga awo,Handaga athu adihanyi nu mutshima umoshi.
3 Enue mafumu tegelelenu! Enue atuameji vuenu!
Mbanguyimbila Yehowa.
Mbanguyimba ngimbo ha gutumbuisa* Yehowa Nzambi wa gu Isalele.
4 Yehowa, tangua wakatugile gu Seyile,Tangua wazogele mu mavu a Edome,Mavu adigitshile, dilu dianogesele mvula,Matuta avuavumuine meya.
5 Milundu yashiwugile* gutuama dia Yehowa,Mulundu wa Sinayi washiwugile gutuama dia Yehowa Nzambi wa Isalele.
6 Mu masugu a Shamegala mun’a Anate,Nu mu masugu a Yaele, athu akhalelego mubalega mu njila jiakoma;Athu akhalele muya mu membo ako, akhalele muyila mu tunjila tuazonda.
7 Athu akhalelego luko mu membo azonda-zonda a gu Isalele;Athu akhalelego luko uu nu tangua ame Debora ngazugile,Uu nu tangua ngazugile gifua mama gu Isalele.
8 Athu atombele nzambi jihe-jihe;Ita yakhalele ha mifulo ya dimbo.
Mukatshi dia masuta 40 000 a gu Isalele,Guakhalelego nga nu mumoshi wakhalele nu tshibu nga mulumbu.
9 Mutshima wami udi gu khanda ya bakomanda a gu Isalele,Anyi atshiginyile nu mutshima umoshi ha guya nu athu.
Tumbuisenu Yehowa!
10 Enue athu mudi muwenda holu dia phunda jiabenguluga,Enue mudi yagukhala ha tapi jiabonga,Nu enue athu mudi muwenda mu njila,Tangizenu ndaga eyi!
11 Majui a athu adi mukhapha meya, avuiwe hehi nu fundo diana thayewa meya;Adi muzuelela ndaga jiabonga jiakalagala Yehowa,Nu ndaga jiabonga jiakalagala enya mu membo a gu Isalele.
Gungima akombeledi a Yehowa ayile gu mifulo ya dimbo.
12 Zuga, zuga Debora!
Zuga, zuga, yimba lungimbo!
Zuga Balaka! Aye mun’a Abinowama, zula ahiga aye uye nawo!
13 Athu anyi asalele, ajile gudi enya lutumbu;Akombeledi a Yehowa ajile gungusanga ha guluisa enya ngolo.
14 Athu adi mu baba, akatugile gu Efrayime;Adi gugulandula aye Benjame, mukatshi dia athu aye.
Bakomanda akatugile gu Makile, abulumugile,Athu akhalele musonega* majina a athu adi naye guya gu gisuta akatugile gu Zabulona.
15 Mafumu a giphuta gia Yisakale akhalele nu Debora,Enya giphuta gia Yisakale akhalele n’enji gifua muakhalele Balaka.
Amutumine mu baba ha malu.
Enya giphuta gia Ribene azudilego desizio.
16 Mukunda natshi wakhadi hashi gifua shitu idi mubata ginemo khanda nu khanda?
Mukunda natshi wategelela abambi a imeme adi mushiga lumbinga ha gutamega shitu?
Enya giphuta gia Ribene azudilego desizio.
17 Enya gu Gileade asalele ha sambua dia Yordane;Mukunda natshi enya giphuta gia Dane asalele hehi nu masuwa?
Enya giphuta gia Asele akhalele gawo hashi hehi nu muta, mudimo wa gutshita ndo,Asalele hehi nu mbungu jiawo.
18 Enya giphuta gia Zabulona ahagele mionyo yawo mu gingonza, atshiginyile nji gufua;Enya giphuta gia Nefetali nji ahagele mionyo yawo mu gingonza mu milundu.
19 Mafumu ajile, aluile;Mafumu a gu Kanana aluile gu Tanaka hehi nu meya a Megido.Azanguilego utadi wa siliva.
20 Themua jialuile gosa;Jialuile nu Sisera mu njila jiakhalele jiene mubalegela.
21 Gamuta ga Kishiona gaahungumuine,Gamuta ga mualeha, gamuta ga Kishiona.
Ngadiatele enya ngolo.
22 Phunda jiadiatele mavu mangololoTangua jiakhalele muzula phushi nu khabu jiagasue.
23 Muanjelo wa Yehowa wazuedi egi: ‘Tenu dimbo dia Meloze mukumbu,‘Ayi, tenu athu a mu dimbo diene mukumbu,Handaga akuateselego Yehowa,Akuateselego Yehowa nu athu a ngolo.’
24 Yaele mukaji’a Hebele muenya KenaAtumbuishiwe;Atumbuishiwe muavula mukatshi dia akhetu ana khala mu jinzo jia tenta.
25 Sisera wamulombele meya; muene wamuhanele miliki.
Wamuhanele miliki yanema mu khopho diabonga.
26 Wakuatele mutshi wa gujigila tenta gu koko dienji dia mahidi,Uvi gu koko dia madia wakuatele marto.
Wamubetele marto mu muto, wamumuangele muto,Wamusasumuine muto, wamutobuele mabanda.
27 Wabuile hashi mu malu enji, wabuile, wabandele tandambala;Sisera wabuile hashi mu malu enji;Ha fundo diabuile muene, hene amubingile gu ita.
28 Mukhetu mumoshi wakhalele mutalela ha fenetre,Gin’a Sisera wakhalele mukuelela ha muyingulu wa fenetre,Wakhalele gudihula egi: ‘Mukunda natshi phusu-phusu yenji yashipha ha guza?
Mukunda natshi matululu a phusu-phusu yenji adi mushipha?’
29 Akhetu atema diago mukatshi dia akhetu a lutumbu a monzo yenji amuhanele mvutu;Muene nji wakhalele gudizuelela egi:
30 ‘Yajiya gukhala egi adi gudikaphela ima atambula gu ita,Suta diagasue, mon’a mukhetu mumoshi-mumoshi nga muyadi-muyadi,Mulele umoshi wabenguluga mukunda nu Sisera, ayi mulele umoshi wabenguluga,Mulele ungoshi-ungoshi watungiwe nu ifuanesa, nga mulele ungoshi wabenguluga, nga ndo milele iyadi-iyadi yatungiwe nu ifuanesaMukunda nu shingo jia athu adi mutambula ima.’
31 Yehowa, mbalagaji jiaye jiagasue jifue,Uvi athu ana guguzumba akhale gifua tangua didi muzoga mu lutumbu luadio.”
Gifutshi giakhalele mu guhuima ivo 40.
Mbimbi goshi'a diyiji
^ Nga “gushiga miziki.”
^ Nga ndo, yajiya gukhala egi, “yadigitshile.”
^ Nga ndo, yajiya gukhala egi, “athu adi nu ima ya mulongeshi wa mikhuala.”
