Manzuji 6:1-40
6 Enya Isalele akalegele luko Yehowa gubola, gishina giene Yehowa wabembele egi enya gu Madiana a amonese lamba ivo sambadi.
2 Enya gu Madiana asendesele guhinyina enya Isalele. Enya Isalele akhalele guavila woma, hene alondele mafundo agudisuegela* mu milundu, mu mawina a maseso nu mu mafundo anyi adi lamba hagula athu ahete.
3 Tangua enya Isalele akhalele mukuna mbuto, enya Madiana nu enya Amaleke nu athu a gu khanda ya mazogelo a kumbi akhalele gualuisa.
4 Akhalele mutunga phundo jiawo mu mavu a enya Isalele, akhalele mubolesa mbuto jiawo uu nu gu Gaza. Akhalelego mubembela enya Isalele nga gima gia gudia, nga gimeme nga ngombe nga phunda.
5 Akhalele muza nu shitu jiawo nu tenta jiawo jiavula gifua matulu, yakhalele lamba ha guatanga nu ene nu shamo jiawo. Akhalele muza ha gubolesa gifutshi gia enya Isalele.
6 Enya Madiana abuishile enya Isalele phutu diago, gishina giene enya Isalele atogele ukuateshi gudi Yehowa.
7 Tangua enya Isalele atogele Yehowa ha guakuatesa mukunda nu enya Madiana,
8 Yehowa waatumidile profete. Profete muene waawambelele egi: “Yehowa Nzambi wa Isalele wazuela egi, ‘Ngamizolele gu Ejipitu fundo muakhalele mu uhiga.
9 Ngamihuluishile ha mago a enya Ejipitu nu ha mago a athu agasue akhalele gumisagesa, ngakayele mbalagaji jienu mu gifutshi giawo, ngamihanele gifutshi giene.
10 Ngamiwambelele egi: “Ame Yehowa Nzambi wenu. Mushigo naye guvua woma wa nzambi jia enya Amole mu gifutshi mudi.” Uvi muangutumagelego.’”*
11 Gungima muanjelo wa Yehowa wajile mukhala ha mushin’a mutshi wakoma wa Ofela, mutshi wene wakhalele wa Yoashe muenya Abiezele. Mun’enji Gideona wakhalele musuwa* mbuto jia ble mu gikameno gia vinyo hagula enya Madiana ajimonyigo.
12 Muanjelo wa Yehowa wamonegene gudi muene, wamuwambelele egi: “Yehowa udi nu aye, aye suta dia ngolo.”
13 Uvi Gideona wamuhudile egi: “Ngabuba fumi’ami, gula Yehowa udi nu esue, mukunda natshi ndaga eji jiagasue jiatubuila? Ndaga jia gushimana jiatuwambelele akhakh’etu egi, ‘Yehowa watuzolele gu Ejipitu jidi gui?’ Henyaha Yehowa watubemba, wabemba egi enya Madiana atumonese lamba.”
14 Yehowa wamaganele gutuama dienji, wamuwambelele egi: “Ame ngudi gugutuma, nda, udi nu ngolo, mbawuhuluisa enya Isalele ha mago a enya Madiana.”
15 Gideona wamuwambelele egi: “Ngabuba Yehowa. Luholo lutshi mbanguhuluisa enya Isalele? Tala! Fami yami idi yazonda mukatshi dia enya giphuta gia Manase, ame nji ngudi muthu wa gituhu mukatshi dia enya inzo ya sh’ami.”
16 Uvi Yehowa wamuwambelele egi: “Mbangukhala naye, aye mbawubinga enya Madiana gifua adi muthu mumoshi.”
17 Gideona wamuwambelele egi: “Gula mbawungukuatesa diago, nguhane gijiyishilo gimoshi gidi mumonesa egi tuatshi naye maga.
18 Ngabuba ngunenge uu nu tangua nguza gugubatela ima ya gudia.” Muene wamuvutudile egi: “Ayi ngudi gugunenga uu nu tangua uza muvutuga.”
19 Gideona wayile, watelegele mutumba wa khombo, wazanguile efa* imoshi ya phupha, walondele dipha dishigo nu levire. Wambile musunyi wa khombo mu kinda uvi suphu mu nzungu; wamubatele nayo hanze, wamuhanele nayo ha mushin’a mutshi wakoma.
20 Muanjelo wa Nzambi wa giamatshidia wamuwambelele egi: “Zula musunyi nu dipha dishigo nu levire haga holu dia seso dinyi diakoma, gungima ubundule suphu holu.” Gideona watshitshile gifua muamuwambelele muanjelo.
21 Muanjelo wa Yehowa wasunuine muhango wakhalele ha koko dienji, songi yenji yakuatele musunyi nu dipha dishigo nu levire, tshuya tuazogele mu seso, tuawetshiele musunyi nu dipha diene. Gungima muanjelo wa Yehowa watotele gu meso a Gideona.
22 Gideona wakotelesele egi yakhalele muanjelo wa Yehowa.
Wazuelele mbala imoshi egi: “Oo Yehowa Fumu Wabalega Gukoma, ngafua gami, handaga ngamona muanjelo wa Yehowa nu meso ami!”
23 Yehowa wamuwambelele egi: “Khala mu guhuima, uvuigo woma; mbawushigo mufua.”
24 Gideona watungile giwotshielo ha fundo diene mukunda nu Yehowa, uu nu mangino, giwotshielo giene giana tamegewa egi Yehowa-shalome,* gigi genji giana khala gu Ofela ya enya Abiezele.
25 Mu phipha yene, Yehowa wamuwambelele egi: “Zangula mutumba wa ngombe wa sh’aye, mutumba wa ngombe wa mbadi udi nu ivo sambadi, muanga giwotshielo gia Bale gialondele sh’aye, muanga nji mutshi wa gijila* udi hehi nu giwotshielo.
26 Londa maseso muabonga hagula utungile Yehowa Nzambi waye giwotshielo holu dia mulundu wuwu wakola. Gungima zangula mutumba wa ngombe wa mbadi, hana mulambu holu dia khunyi jia mutshi wa gijila* unu wamuangi.”
27 Gideona wazudile mala kumi mukatshi dia enya mudimo enji, watshitshile ndaga jiamuwambelele Yehowa. Uvi wajitshitshile mu phipha, handaga mu muanya wakhalele muvua woma wa enya inzo ya sh’enji nu athu ako a mu dimbo.
28 Tangua athu a mu dimbo azugile mu gimenegena, amonele egi giwotshielo gia Bale giakhalele gia gumuanga, mutshi wa gijila* wakhalele hehi wakhalele nji wagubogola. Amonele nji egi mutumba wa ngombe wa mbadi wakhalele wahanewa gale mulambu ha giwotshielo giatungiwe.
29 Adihudile egi: “Nanyi watshitshi ndaga ya luholo elu?” Ayile nu guhudisa, gungima azuelele egi: “Gideona mun’a Yoashe muene wakalagala ndaga ya luholo elu.”
30 Athu a mu dimbo awambelele Yoashe egi: “Zola mun’aye ashiyiwe, handaga wamuangi giwotshielo gia Bale, wabogola nji mutshi wa gijila* wakhadi hehi.”
31 Yoashe wawambelele athu agasue akhalele gumumanesa egi: “Enue mudi naye guluila Bale? Enue mudi naye gumuhuluisa? Muthu wagasue udi muluila Bale udi naye gushiyiwa mu gimenegena egi. Gula Bale udi nzambi, adiluile hakhenji handaga amuangi giwotshielo gienji.”
32 Mu lusugu luene, Yoashe watamegele Gideona egi Yerubale* handaga wazuelele egi: “Bale adiluile hakhenji handaga amuangi giwotshielo gienji.”
33 Enya Madiana agasue nu enya Amaleke nu athu a gu khanda ya mazogelo a kumbi adibungishile, azawugile muta, ahagele phundo yawo mu baba dia Yizelele.
34 Gideona wahetele nyuma ya Yehowa, washigile phungi, enya Abiezele ajile gumukuatesa.
35 Watumine athu ha gutamega athu a mu membo agasue a giphuta gia Manase ha guza gumukuatesa. Watumine nji athu ako ha guya mutamega enya giphuta gia Asele, enya Zabulona, nu enya Nefetali. Enya iphuta yene ajile gumusanga.
36 Gungima Gideona wawambelele Nzambi wa giamatshidia egi: “Gula udi diago muhuluisa enya Isalele mu njila yami gifua luholo walayele,
37 ngudi muhaga uvuji wa gimeme ha fundo dia gusuwila* mbuto, gula mame abua phamba holu dia uvuji wene uvi nu gubua ndo holu dia mavu agasue adi hehi nu uvuji wene, ngenyi mbangujiya egi mbawuhuluisa diago Isalele mu njila yami gifua luholo walayele.”
38 Ndaga jiabalegele ngenyi. Mu lusugu lualanduile hajile muene mu gimenegena, wakamene uvuji wene, mame azogele diago avula, ajiya guzalesa longa diakoma.
39 Uvi Gideona wawambelele Nzambi wa giamatshidia egi: “Unguvilago khabu, ngumutshigina gugutoga gima giko. Ngabuba ngumutshigina guphaga gima giko nu uvuji wa gimeme. Tshita egi phamba uvuji wa gimeme ukhale ula ndu, uvi mavu agasue adi ha fundo diene atebe nu mame.”
40 Nzambi watshitshile diago ngenyi mu phipha yene; phamba uvuji wa gimeme wakhalele ula ndu, uvi fundo diene diagasue diakhalele dia guteba nu mame.
Mbimbi goshi'a diyiji
^ Nga ndo, yajiya gukhala egi, “mafundo a gubambela ima goshi’a mavu.”
^ Mu Hebelu: “muavuilego dijui diami.”
^ Nga “gusunguna.”
^ Efa imoshi yakhalele balitre 22. Tala App. B14.
^ Yakotelesa egi, “Yehowa udi guhuima.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Yakotelesa egi, “bemba Bale adisophele milonga yenji.”
^ Nga “gusunguna.”
