Manzuji 7:1-25
7 Gungima Yerubale, yakotelesa egi Gideona, wazugile mu gimenegena nu athu agasue akhalele n’enji, ayile mutunga phundo hehi nu mudidi wa Halode. Phundo ya enya gu Madiana yakhalele mu baba gu khanda ya nord hehi nu mulundu wa Mole.
2 Yehowa wawambelele Gideona egi: “Masuta udi nawo abalega guvula hagula nguhane enya Madiana ha mago awo. Gula ndo enya Isalele mbaadihala egi, ‘tuabingi enya Madiana nu ngolo jietu hakhetu.’
3 Henyaha wambela athu mbimbi eji: ‘Muthu wagasue udi muvua woma nu udi mudigita, avutuge gumbo dienji.’” Gideona wazuelele ndaga eji ha gulola athu. Athu 22 000 avutugile gumbo diawo, uvi athu 10 000 asalele.
4 Uvi Yehowa wawambelele Gideona egi: “Athu wawa gawo avula. Bulumuga nawo gu muta hagula ngugutombele* athu udi naye guya nawo. Muthu mbanguguwambela ha guya n’enji, muene mbawuya n’enji; uvi muthu mbanguguwambela egi ‘guya ndo n’enji,’ muene mbawusala.”
5 Gideona wabulumugile nu masuta gu muta.
Yehowa wamuwambelele egi: “Khaphumuna athu adi munua meya nu mago* nu athu adi mufugama ha mabongo ha gunua meya.”
6 Phamba athu 300 anuile meya nu mago awo, uvi athu ako afugamene ha mabongo ha gunua meya.
7 Yehowa wawambelele Gideona egi: “Mbangumihuluisa nu athu awa 300 anui meya nu mago awo, mbangugukuatesa nji ha gubinga enya Madiana. Uvi athu ako awa agasue asala avutuge gumbo diawo.”
8 Azudile ima ya gudia nu mbinga jiakhalele gudi masuta ene. Gungima Gideona waavutuile gumbo diawo, wasalele phamba nu masuta 300. Phundo ya enya Madiana yakhalele gu mbongo mu baba.
9 Yehowa wawambelele Gideona mu phipha yene egi: “Zuga uluise phundo ya enya Madiana, handaga ngaahana ha mago aye.
10 Uvi gula udi muvua woma ha gualuisa, bulumuga nu muenya mudimo waye Phula gu phundo yawo.
11 Tegelela ndaga adi muzuela, ngenyi mbawuheta ngolo* jia gualuisa.” Gideona nu muenya mudimo wenji Phula abulumugile hehi nu phundo ya enya Madiana.
12 Enya Madiana nu enya Amaleke nu athu agasue a gu mazogelo a kumbi azalele mu baba gifua thundu ya matulu, shamo jiawo nji jiakhalele jiavula gifua gishegele gu khulo ya muta.
13 Tangua Gideona wahetele gu phundo wavuile yala mumoshi mutela futa dienji nzoji, wazuelele egi: “Ngalotshi nzoji imoshi, ngamonyi dipha dialondewe nu phupha ya orje dimuya nu gulangumuga gu phundo ya enya Madiana. Dipha diene diabulumuga uu nu gu tenta imoshi, diakuma tenta yene mangololo, tenta yene yabua. Diakendumuna tenta, tenta yene yamuangana.”
14 Futa dienji wamuwambelele egi: “Idi naye gukhala phogo ya khusa ya Gideona mun’a Yoashe muenya gu Isalele. Nzambi wahana enya Madiana nu phundo yawo yagasue ha mago enji.”
15 Havuile Gideona nzoji yene nu ukoteleshi wenji, washiwugile phala mu mavu ha gukombelela. Gungima wavutugile gu phundo ya enya Isalele, wazuelele egi: “Zugenu, handaga Yehowa wahana enya Madiana ha mago enu.”
16 Wakhaphumuine masuta enji 300 mu mahunji thathu, waahanele mbinga nu mabungu akoma akhalele nu tshuya tuamulemo mukatshi.
17 Waawambelele egi: “Talenu luholo ngudi mutshita, enue nji tshitenu gifua ame. Tangua nguza muheta hehi nu phundo ya enya Madiana, ndaga yagasue nguza mutshita, yene mudi naye nji gutshita.
18 Tangua nguza mushiga phungi nu athu agasue ngudi nawo, mudi naye nji gushiga phungi jienu mu khulo ya phundo ya enya Madiana. Mudi naye gukaluluga nji egi: ‘Ita idi ya Yehowa nu ya Gideona!’”
19 Mukatshi dia phipha,* Gideona nu masuta enji 100 ahetele hehi nu phundo ya enya Madiana, mu tangua diene enya Madiana akhalele asombegesa gale abambi a phundo. Gideona nu athu enji ashigile phungi, abudile mabungu a meya akhalele nawo ha mago.
20 Mahunji thathu a masuta ene ashigile nji phungi, abudile mabungu akoma akhalele nawo. Akuatele tshuya gu mago awo a mahidi, uvi akhalele mushiga phungi gu mago awo a madia. Azuelele mu dijui diakola egi: “Ita* idi ya Yehowa nu ya Gideona!”
21 Mu tangua diene, suta diagasue diamaganele ha fundo dienji hehi nu phundo ya enya Madiana. Masuta a enya Madiana agasue alengele nu gukaluguga.
22 Masuta 300 alanduile gushiga phungi. Yehowa wakalegele egi masuta agasue akhalele mukatshi dia phundo asendese gudishiya; masuta akhalele mu phundo ya enya Madiana alengele uu nu gu Bete-Shita, gu khanda ya Selela, ayile uu nu gu Abele-Mehola idi hehi nu Tabata.
23 Atamegele mala a gu Isalele a mu giphuta gia Nefetali nu gia Asele nu mala agasue a mu giphuta gia Manase, alanduile enya Madiana.
24 Gideona watumine athu gu khanda jiagasue jia milundu ya Efrayime ha guwambela athu egi: “Bulumugenu tuluise enya Madiana, kangenu njila jia mita yagasue uu nu gu Bete-Bala nu gu Yordane.” Mala agasue a mu giphuta gia Efrayime adibungishile, akangele njila jia mita yagasue uu nu gu Bete-Bala nu gu Yordane.
25 Akuatele mafumu mbadi a gu Madiana, Orebe nu Zebe. Ashiyile Orebe gu seso dia Orebe, uvi Zebe amushiyile gu gikameno gia vinyo gia Zebe. Alanduile guhata enya Madiana, abatele muto wa Orebe nu wa Zebe gudi Gideona gu khanda ya Yordane.
Mbimbi goshi'a diyiji
^ Mu Hebelu: “ngualole.”
^ Mu Hebelu: “athu adi munua meya nu ludimi gifua muana nua jimbua.”
^ Mu Hebelu: “hagula mago aye akole.”
^ Mu Hebelu: “mukatshi dia phipha, tangua athu ana sendesa gubamba dimbo.” Sendese mu 22h uu nu mu 2h.
^ Mu Hebelu: “phogo.”
