Manzuji 8:1-35
8 Gungima enya giphuta gia Efrayime awambelele Gideona egi: “Itshi watutshita? Mukunda natshi watunyi gututamega tangua wayi muluisa enya Madiana?” Amumanesele mangololo.
2 Uvi muene waawambelele egi: “Ndaga ngatshitshi ame jishigo jiavula gubalega jinyi muatshitshi. Enue enya Efrayime mumonyigo egi ndaga muakalagala jidi jiazonda, handaga jidi nu ndando yavula gubalega ndaga jiakoma tuakalagala esue enya Abiezele.*
3 Nzambi wahanele mafumu mbadi a enya Madiana ha mago enu, fumu Orebe nu fumu Zebe; ndaga ngatshitshi ame jishigo jiavula gubalega jinyi enue muatshitshi.” Tangua diaawambelele Gideona ngenyi,* ahenele tedie.
4 Gideona wahetele gu Yordane, gungima wazawugile. Muene nu masuta enji 300 akhalele aguhuila, uvi alanduile guhata mbalagaji jiawo.
5 Wawambelele enya gu Sukote egi: “Ngabuba, hanenu masuta ngudi nawo mapha handaga adi a guhuila. Ngudi muhata mafumu a gu Madiana, Zeba nu Zalumuna.”
6 Uvi mafumu a gu Sukote amuvutudile egi: “Aye wakuatshi gale Zeba nu Zalumuna hagula tuhane masuta aye ima ya gudia ba?”
7 Gideona wazuelele egi: “Gima ndo, gula Yehowa wahana Zeba nu Zalumuna ha mago ami, mbangumikhuphula nu miya nu misongi ya mu mavu a luselenga.”
8 Hakatugile muene gu Sukote, wakandugile gu Penuele, waatogele nji ima ya gudia. Uvi enya gu Penuele amuhanele nji mvutu luholo lumoshi gifua enya gu Sukote.
9 Wawambelele enya gu Penuele egi: “Tangua mbanguvutuga mu guhuima, mbangumuanga inzo eyi yaleha.”
10 Zeba nu Zalumuna akhalele gu Kalekole nu masuta awo 15 000. Phamba ene asalele mukatshi dia masuta a enya gu mazogelo a kumbi, handaga ako* 120 000 akhalele ashiyiwa gale.
11 Gideona walanduile gukanduga mu njila ya athu ana khala mu tenta, gu khanda ya mazogelo a kumbi ya Noba nu ya Yogebaha. Waluishile masuta akhalele mutangiza egi akhalele mu ubambi.
12 Tangua mafumu mbadi a enya Madiana Zeba nu Zalumuna alengele, Gideona waahatele, waakuatele. Masuta agasue a mu phundo yawo avuile woma.
13 Hamanesele Gideona mun’a Yoashe gulua ita, wavutugile mu njila idi mukanduga gu Helese.
14 Hakhalele muene mu njila, wakuatele muvuala mumoshi wa gu Sukote, wasendesele gumuhula mihu. Muvuala muene wamusonegele majina a mafumu nu a akulu a gu Sukote, akhalele athu 77.
15 Gungima Gideona wayile gudi enya gu Sukote, waawambelele egi: “Muanguhudile egi: ‘Wakuatshi gale Zeba nu Zalumuna hagula tuhane masuta aye adi a guhuila ima ya gudia ba?’ Talenu, Zeba nu Zalumuna muakhalele gungushingila enyawa”
16 Wazudile akulu a mu dimbo waakhuphudile miya nu misongi ya mu mavu a luselenga, wahanele enya mu dimbo dia Sukote longo.
17 Wamuangele inzo yaleha ya gu Penuele, washiyile nji mala a mu dimbo diene.
18 Wahudile Zeba nu Zalumuna egi: “Athu muashiyile gu Tabola akhalele gikuatshi?” Ene amuwambelele egi: “Akhalele gifua aye, mukut’awo agasue akhalele mumonega gifua an’a mafumu.”
19 Gungima muene waawambelele egi: “Akhalele aphangi’ami, ana a gin’ami. Ngudi gudiloga mu jina dia Yehowa Nzambi wa monyo egi, gula nga muaabembele, nga ngushigo gumishiya.”
20 Gideona wawambelele mun’enji wa somi Yetele egi: “Zuga waashiye.” Uvi Yetele wavuile woma ha guzola phogo yenji handaga wakhalele mona wazonda.
21 Zeba nu Zalumuna awambelele Gideona egi: “Gula udi yala wa ngolo, aye hakhaye zuga utushiye.” Gideona wazugile, washiyile Zeba nu Zalumuna, wazudile ima ya gudisembegela yakhalele mu shingo jia shamo jiawo.
22 Gungima enya Isalele awambelele Gideona egi: “Bua fumu wetu, nu aye nu mun’aye nu mujigulu waye, handaga watuhuluisa ha mago a enya gu Madiana.”
23 Uvi Gideona waawambelele egi: “Mbangushigo mubua fumu wenu, mun’ami nji mbagashigo mubua fumu wenu. Phamba Yehowa mbawubua fumu wenu.”
24 Gideona wazuelele luko egi: “Ngudi gumitoga ndaga imoshi: Muthu wagasue mukatshi dienu anguhane gazeya ga gu mazulu gatambula muene gu ita. (Mbalagaji jiakhalele nu tuzeya tua wolo tua gu mazulu handaga akhalele ajigulu a Ishemayele.)
25 Ene amuwambelele egi: “Ayi tudi guguhana.” Abambele mulele waleha hashi, muthu wagasue mukatshi diawo wambile gazeya ga gu mazulu gatambudile muene gu ita.
26 Tuzeya tua wolo tua gu mazulu tualombele Gideona tuakhalele nu unemelo wa bashekele 1 700.* Amuhanele nji ima ya gudisembegela yakhalele gifua ngonda, nu misanga yakhalele muzenzelela, nu milele yabenguluga yalondewe nu uvuji wa shitu inyi mafumu a gu Madiana akhalele musudiga. Amuhanele nji misanga yakhalele mu shingo jia shamo.
27 Gideona walondele efode nu wolo wene, wayihagele gu dimbo diawo diana tamegewa egi Ofela; enya Isalele agasue asendesele gukombelela* efode yene, yabuile gifua muheto mukunda nu Gideona nu enya inzo yenji.
28 Enya Isalele abingile enya Madiana, ngenyi enya Madiana akhalelego luko nu luholo lua gualuisa;* gifutshi giakhalele mu guhuima ivo 40 hakhalele Gideona nu monyo.
29 Gungima Yerubale mun’a Yoashe wavutugile gumbo dienji, wayile mukhala guene.
30 Gideona wavualele ana a mala 70, handaga wakhalele nu akhetu avula.
31 Mukaji’enji muko wakhalele gu Shekeme wavualele mona wa yala, Gideona wamuhanele jina egi Abimeleke.
32 Gideona mun’a Yoashe wajingile ivo yavula, gungima wafuile, amufundjile mu malumba a sh’enji Yoashe mu dimbo dia Ofela, mu fami ya enya Abiezele.
33 Hafuile Gideona, enya Isalele asendesele luko gukombelela* nzambi jia Bale. Atombele Bala-Belita ha gukhala nzambi wawo.
34 Enya Isalele abuitshile Yehowa Nzambi wawo mutshima, ikhale muene waahuluishile ha mago a mbalagaji jiawo jiagasue jiakhalele nawo hehi;
35 amoneselego nji mutshima wabonga gudi enya fami ya Yerubale, yakotelesa egi Gideona, mukunda nu ndaga jiagasue jiabonga jiakalegele muene gudi enya Isalele.
Mbimbi goshi'a diyiji
^ Mu Hebelu: “mbuto jiana sala mu mahia jianonyi enya Efrayime jidi nu ndando yavula gubalega mbuto jiakatula enya Abiezele.”
^ Mu Hebelu: “mbimbi eji.”
^ Nga “masuta ako akhalele nu jiphogo.”
^ Shekele imoshi yakhalele bagrame 11,4. Tala App. B14.
^ Nga “gutshita uthambi nu efode yene.”
^ Mu Hebelu: “atuphuilego luko mito yawo.”
^ Nga “gutshita uthambi nu Bale.”
