Mukanda wa Matayo 10:1-42
10 Yesu watamegele apostolo enji 12, waahanele ngolo jia gukaya nyuma jiabola nu jia gusaga misongo nu ukhashi wa maluholo agasue.
2 Majina a apostolo enji 12 enyawa: Simona, wana tamegewa egi Phetelo nu phangi’enji Andele; Yakoba mun’a Zebedayo nu phangi’enji Yone;
3 Filipho nu Baletelemi; Toma nu Matayo mufutshishi wa gitadi; Yakoba mun’a Alafayo; Tadayo;
4 Simona Muenya gu Kana* nu Yudasa Isakaliote, yonu wadigile* Yesu gungima.
5 Yesu watumile mala awa 12, waahanele malongo awa: “Muyigo gudi athu a ifutshi, munginyigo nga mu dimbo dimoshi dia enya Samaliya.
6 Uvi landulenu guya gudi imeme ya monzo ya Isalele yatotele.
7 Tangua mudi muya, khalenu mulongesa egi: ‘Ufumu wa mu dilu wasuena hehi.’
8 Sagenu enya misongo, fuzumunenu athu a gufua, sagenu enya hute, kayenu ivule yabola. Muahetele ya khenda, hanenu nji ya khenda.
9 Muyigo nu utadi wa wolo nga wa siliva nga wa mabengedi mu mikaba yenu ya gubatela falanga,
10 nga kuba dia gubatela ima ya gudia mu njila, nga nu milele mbadi,* nga jisaphata, nga muhango, handaga muenya mudimo udi naye guhanewa ima ya gudia.
11 “Tangua muangina mu dimbo diakoma nga diazonda, kambenu athu adi atagana ha gumitegelela, khalenu gumbo diawo uu nu tangua mbamukatuga.
12 Gula muangina monzo, menegenu afumi’a inzo.
13 Gula athu ene adi atagana, guhuima guenu gukhale mukatshi diawo; uvi gula ashigo atagana, guhuima guenu gumivutugile.
14 Inzo yagasue nga dimbo diagasue atuna gumiyamba nga atuna gumitegelela, tangua mudi mukatuga, bundenu malu enu ha gukatula fuphi.
15 Ngudi gumiwambela giamatshidia egi, mu Lusugu lua Gusophesa, lamba dia dimbo dinyi mbadikhala diakola gubalega dia enya gu Sodoma nu Gomola.
16 “Talenu! Ngudi gumituma gifua imeme mukatshi dia mbulu. Hene khalenu atema gifua nyoga; khalenu nu mitshima yaphelegeta gifua mayembe.
17 Temenenu athu, handaga ene mbaamibata gu batribinale nu mbaamibeta mu sinagoga jiawo.
18 Ene mbaamibata gutuama dia ba guvelenele nu mafumu mukunda nu ame. Ngenyi, mbayikhala gijiyishilo mukunda nu ene nu ifutshi.
19 Uvi tangua mbaamisophesa, mudisagesago mukunda nu ndaga mudi naye guzuela nga luholo mudi naye gujizuela, handaga ndaga mudi naye guzuela mbajimihanewa mu tangua dinyinyi;
20 handaga ishigo phamba enue mbamuzuela, uvi nyuma ya Tata wenu mbayizuela ha fundo dienu.
21 Luko, muthu mbawuhana phangi’enji gu gufua, tata mbawuhana mun’enji, ana mbaabalumugila mvuaji jiawo nu mbaajishiyisa.
22 Athu agasue mbaakhala n’enu umbalagaji mukunda nu jina diami. Uvi muthu mbawukolesela* uu nu gu gisugishilo muene mbawuhuluishiwa.
23 Gula amisagesa mu dimbo dimoshi, lengenu mu dimbo diko; ngudi gumiwambela giamatshidia egi tangua mbadiza Mun’a muthu, mbamukhala khenji mumanesela ndo guwenda membo agasue a Isalele.
24 “Mon’a khalasa ganago gubalega mulongeshi wenji, muhiga nji ganago gubalega fumi’enji.
25 Idi yatagana egi mona khalasa abue gifua mulongeshi wenji, muhiga abue nji gifua fumi’enji. Gula athu atamega fumi’a inzo egi Belezebula,* jiyenu egi mbaatamega nji enya inzo yenji ngenyi.
26 Hene, muvuigo woma handaga gima giagasue giasuegewe muabonga mbagisologa, gima giagasue gia gisuegi mbagijiyiwa.
27 Ndaga ngudi gumidijiga mu phipha, jizuelenu mu muanya. Ndaga ngudi gumifetegesa, jilongesenu mu dijui diakola gudi athu agasue.
28 Luko, muvuigo woma wa athu ana shiya muila uvi ajiyilego gushiya monyo; uvi vuenu woma wa muthu wajiya gushiya nu muila nu wene monyo mu Gehena.*
29 Mbodio mbadi jianago gusumbishiwa mu dikuta dimoshi dia ndando yazonda ba? Uvi, gula imoshi mukatshi diawo yabua hashi, Sh’enu wana gujiya.
30 Uvi nu diene sanga dia mu mito yenu, muene wana guditanga diagasue.
31 Hene, muvuigo woma; mudi nu ndando yavula gubalega mbodio jiavula.
32 “Muthu wagasue watshigina ha meso a athu egi udi mulandudi wami, ame nji mbangutshigina gu meso a Tata wami udi mu dilu egi muene udi mulandudi wami.
33 Uvi muthu wangutuna ha meso a athu, ame nji mbangumutuna gu meso a Tata wami udi mu dilu.
34 Mutangizago egi ngajile ha gubata guhuima ha mavu; ngajilego ha gubata guhuima, uvi ngajile ha gubata phogo ya khusa.
35 Handaga ngajile ha gukhaphumuna mon’a yala nu sh’enji, mon’a mukhetu nu gin’enji, mon’a mukhetu nu giwaji gienji gia mukhetu.
36 Yadiago, mbalagaji jia muthu mbajikhala enya fami yenji.
37 Muthu wagasue udi muzumba sh’enji nga gin’enji muavula gungubalega ame, gashigo watagana ha gukhala mulandudi wami. Luko, muthu wagasue udi muzumba mun’enji wa yala nga mun’enji wa mukhetu muavula gungubalega ame, gashigo watagana ha gukhala mulandudi wami.
38 Muthu wagasue watuna mutshi wenji wa lamba* nu gashigo gungulandula ame, muene gashigo watagana ha gukhala mulandudi wami.
39 Muthu wagasue wakamba guhuluisa monyo wenji, mbawuwutotesa. Uvi muthu wagasue watotesa monyo wenji mukunda nu ame, mbawuwuheta.
40 “Muthu wagasue wamiyamba enue, wanguyamba nji ame, muthu wagasue wanguyamba ame, wayamba nji muthu wangutumine.
41 Muthu wagasue wayamba profete handaga udi profete, muene mbawuheta gishimbigo gia profete. Muthu wagasue wayamba muthu wabonga gu meso a Nzambi handaga udi Muthu wabonga gu meso a Nzambi, muene mbawuheta gishimbigo gia muthu wabonga gu meso a Nzambi.
42 Luko, muthu wagasue wahana khopho gia meya atuluga gudi muthu wazonda mukatshi dia athu wawa handaga muene udi mulandudi wami, giamatshidia ngudi gumiwambela egi, muene mbagatotesago gishimbigo gienji nga hazonda.”
Mbimbi goshi'a diyiji
^ Nga “muenya gikhesa.”
^ Nga “wasumbishile.”
^ Nga “mulele uko.”
^ Nga “muthu udi mukolesela.”
^ Jina diko dia Satana, fumu wa bademo.
^ Tala Ukoteleshi wa Mbimbi.
^ Tala Ukoteleshi wa Mbimbi.
